கால்பந்து உலகின் ஜாம்பவானாக திகழ்பவர் கிரிஸ்டியானோ ரொனால்டோ. போர்ச்சுகல் தேசிய அணியைச் சேர்ந்த இவர், உலகின் சிறந்த கிளப்பான ரியல் மெட்ரிட் அணிக்காக விளையாடி வருகிறார்.
தற்போது நடந்த கிளப் உலகக்கோப்பை இறுதிபோட்டியில் கிரிமியோ அணிக்கு எதிராக கோல் அடித்து ரியல் மெட்ரிட் அணிக்கு கோப்பையைக் கைப்பற்றி தந்தார். மேலும், தொடரில் அதிக கோல்கள் அடித்த வீரர் என்ற பெருமையையும் பெற்றார்.
இந்நிலையில், ரொனால்டோவிடம் ரியல் மெட்ரிட் அணியிலிருந்து விலகுவீர்களா என்று கேள்வி எழுப்பப்பட்டது. அதற்கு ரொனால்டோ,”அணியிலிருந்து விலக எனக்கு விருப்பம்தான்” என்று தெரிவித்துள்ளார்.
தொடர்ந்து பேசும்போது, “ மைதானத்தில் நடப்பது மட்டுமே எனது கட்டுப்பாட்டில் இருக்கும். மைதானத்துக்கு வெளியே, அணியில் இடம்பெறுவது என்னைத் தக்க வைத்துக் கொள்வது எல்லாம் அணியின் நிர்வாகிகள்தான் முடிவு செய்ய வேண்டும். அதை நான் முடிவு செய்ய முடியாது” என்று தெரிவித்துள்ளார்.
முன்னதாக, கடந்த ஆண்டு ரியல் மெட்ரிட் அணி ரொனால்டோ உடனான ஒப்பந்தத்தை 2021 ஆம் ஆண்டு வரை நீட்டித்தது. இந்நிலையில், சமீபத்தில் வரி ஏய்ப்பு செய்ததாக ரொனால்டோ மீது தொடரப்பட்ட வழக்கில் ரியல் மெட்ரிட் அணி ரொனால்டோவுக்கு உறுதுணையாக இல்லை என குற்றச்சாட்டுகள் எழுந்தன. இதனால், ரொனால்டோவுக்கும் ரியல் மெட்ரிட் அணிக்கும் இடையே கருத்து வேறுபாடு இருந்ததாக கூறப்படுகிறது.
Mobile AppDownload Get Updated News