புதிய எஞ்சின் மாற்றிய மெக்லாரன் அணி, பார்முலா 1 கார் பந்தயத்தில் மீண்டும் போட்டியிட விருக்கும் முன்னாள் உலக சாம்பியன் அலோன்சோ, பல ஆண்டுகளுக்குப் பின் பார்முலா 1 கார் பந்தயத்தில் மீண்டும் போட்டியிட விருக்கும் ஆஸ்டன் மார்ட்டின் அணி, பார்முலா1 ஜாம்பவானான ஜெர்மனி நாட்டைச் சேர்ந்த சுமாக்கரின் மகன் மிக் சுமாக்கர் என பல்வேறு சிறப்பு அம்சங்கள் புதிதாய் துவங்கவிருக்கும் சீசனில் இடம்பெற்றுள்ளன. ஞாயிற்றுக்கிழமை நடக்கவிருக்கும் போட்டிக்கான பயிற்சி ஓட்டம் வெள்ளிக்கிழமை இரவு நடைபெற்றது.
இரண்டு பாகங்களாக நடைபெற்ற பயிற்சி ஆட்டத்தின் முதல் பாதியில் ரெட்புல் அணியைச் சேர்ந்த வெர்ஸ்ட்டாப்பன் விரைவான சுற்றை பதிவு செய்தார். நடப்பு சாம்பியனான ஹாமில்டன் நான்காவது இடத்தையே பிடித்தார்.
மெர்சிடஸ் அணியின் மற்றொரு ஓட்டுநரான அதிகம் விமர்சிக்கப்படும் வால்ட்டரி போட்டாஸ் இரண்டாமிடத்தில் முடித்தார். இந்த ஆண்டு எஞ்சின் மாற்றிய ஒரே அணியான மெக்லாரன் அணியின் நாரிஸ் மூன்றாம் இடத்தை பிடித்து அசத்தினார். சென்ற ஆண்டு ஃபெராரி அணிக்காக களம் இறங்கிய முன்னாள் உலக சாம்பியன் வெட்டல் இந்த ஆண்டு ஆஸ்டன் மார்ட்டின் அணிக்காக களம் இறங்குகிறார்.
அவர் மீது ரசிகர்கள் அதிக எதிர்பார்ப்பு வைக்கவில்லை என்றாலும் 12வது இடத்தில் முடித்தது ரசிகர்களுக்கு ஏமாற்றமே அளித்தது. இந்த ஆண்டு புதிதாக களமிறங்கும் சுனோன்டா சிறப்பாக செயல்பட்டு 14-வது இடத்தைப் பிடித்தார். ஹாஸ் அணியைச் சேர்ந்த இரண்டு இளம் வீரர்களும் கடைசி இரண்டு இடத்தை பிடித்தனர், குறிப்பாக மைக்கேல் சுமாக்கரின் மகன் மிக் சுமாக்கர் கடைசிக்கு முந்தைய இடமான 19வது இடத்தை பிடித்தார். ஃபார்முலா 1 கார் பந்தயத்தில் மீண்டும் போட்டியிடும் முன்னாள் உலக சாம்பியன் அலோன்சோ 16வது இடம் பிடித்து ரசிகர்களுக்கு ஏமாற்றம் அளித்தார்.
பயிற்சி ஓட்டத்தின் இரண்டாம் பாதியிலும் ரெட்புல் அணியின் வெர்ஸ்ட்டாப்பன் சிறப்பாக செயல்பட்டு முதலிடத்தை பிடித்தார். மெக்லாரன் அணியின் நாரிஸ் இரண்டாம் இடத்தையும் ரிக்கார்டோ 6-வது இடத்தையும் பிடித்தனர்.
நடப்புச் சாம்பியனான ஹாமில்டன் மூன்றாவது இடத்தைப் பிடித்தார், மெர்சிடிஸ் அணியின் மற்றொரு வீரரான போட்டாஸ் 5வது இடத்தை பிடித்தார். முதல்பாதியில் ஏமாற்றம் அளித்த ஆஸ்டன் மார்ட்டின் அணியின் வெட்டல் இரண்டாம் பாதியிலும் 14-வது இடத்தைப் பிடித்து ரசிகர்களுக்கு ஏமாற்றம் அளித்தார். முதல் பாதியில் அட்டகாசமாக ஆடிய ஆல்ஃபா தாரி அணியின் புதிய வீரர் சுனோடா ஏழாவது இடத்தை பிடித்து பலருக்கு அதிர்ச்சி அளித்தார்.
சோதனை ஓட்டத்திலும் பெரிய அளவில் கவனத்தை ஈர்க்காத மெர்சிடிஸ் அணி, பயிற்சி ஓட்டத்திலும் யாருடைய கவனத்தையும் ஈர்க்க வில்லை. கடந்த சில ஆண்டுகளாக ஆதிக்கம் செலுத்தி வரும் மெர்சிடிஸ் அணியின் ஆதிக்கம் இந்த ஆண்டு முடிவடையும் என்ற எதிர்ப்பார்ப்புகள் கூடியுள்ளன.
Mobile AppDownload Get Updated News