2008 ஆம் ஆண்டு மற்றும் 2012 ஆம் ஆண்டு நடைபெற்ற யூரோ கோப்பையையும் வென்ற ஸ்பெயின் அணி மீண்டும் உச்சத்தை தொட வேண்டும் என்ற ஏக்கத்தில் கிரீஸ் அணிக்கு எதிராக களம் இறங்கியது.
சிறப்பான முறையில் ஆட்டத்தை துவங்கிய ஸ்பெயின் அணிக்கு ஆட்டத்தின் இரண்டாவது நிமிடத்திலேயே முதல் வாய்ப்பு கிடைத்தது , ஆனால் அதை அணியின் முன்கள வீரர் ஆல்மோ தவறவிட்டார். ஆட்டம் படு மந்தமாக நகர்ந்தது. ஆட்டத்தின் 14 வது நிமிடத்தில் ஸ்பெயின் அணியின் கோக்கே தனக்கு கிடைத்த வாய்ப்பை நழுவ விட்டார். தொடர்ந்து வாய்ப்புகளை ஏற்படுத்தி எதிரணிகளை திணறடிக்கும் ஸ்பெயின் அணி தற்பொழுது வாய்ப்புகளை ஏற்படுத்த திணறி வந்தனர்.
ஆட்டத்தில் சற்று வேகம் எடுத்த ஸ்பெயின் அணிக்கு ஆட்டத்தின் 33 ஆவது நிமிடத்தில் ஆல்மோ கோலைநோக்கி பந்தை அடிக்க அது கம்பத்தின் மேல் பட்டு வெளியேறியது. தொடர்ந்து தாக்குதல் நடத்திய ஸ்பெயின் அணிக்கு ஆட்டத்தின் 34வது நிமிடத்தில் கோக்கே கொடுத்த பாசை தனது நெஞ்சால் பந்தை கட்டுக்குள் கொண்டுவந்து அட்டகாசமாக கோல் அடித்தார் ஸ்பெயின் அணியின் ஸ்ட்ரைக்கர் மொராட்டா.
ஆட்டத்தை மந்தமாக நகர்த்திச் சென்ற ஸ்பெயின் அணி முன்னிலை பெற்றதும் மீண்டும் நிதானம் காட்டியது. மறுமுனையில் கிரீஸ் அணி தாக்குதல் நடத்துவதற்கான எந்த ஒரு அறிகுறியும் தெரியவில்லை. இரு அணிகளும் ஆட்டத்தில் நிதானம் காட்டியதன் காரணமாக முதல் பாதி படு மந்தமாக முடிந்தது. முதல் பாதியின் முடிவில் ஸ்பெயின் அணி 1-0 என்ற கோல் கணக்கில் முன்னிலை பெற்றது.
இரண்டாம் பாதியின் துவக்கத்தில் சற்று வேகம் காட்டிய ஸ்பெயின் அணிக்கு ஆட்டத்தின் 51வது நிமிடத்தில் டோரஸ் கொடுத்த கிராஸ்சை மொராட்டா கோலாக மாற்ற முற்பட பந்து தவறி சென்றது. ஆட்டத்தின் 57வது நிமிடத்தில் ஸ்பெயின் அணியின் தடுப்பு ஆட்டக்காரரான மார்டினஸ் பந்தை கிளியர் செய்ய அவரை அறியாமல் கிரீஸ் அணியின் வீரரான செக்கா மீது தன்னுடைய கால் பட்டதால் கிரீஸ் அணிக்கு பெனால்டி வழங்கப்பட்டது.
ஆனால் மார்டினஸ் பந்தை எந்த ஒரு தவறும் இன்றி கிளியர் செய்திருந்தார். பொதுவாக இது போன்று இரு அணி வீரர்களும் பந்தை கிளியர் செய்ய முற்படும் பொழுது ஒருவரை ஒருவர் மோதிக் கொள்வது சகஜம் அச்சமயத்தில் யார் பந்தை இரண்டாவதாக தொடுகிறார்கள் அவருக்கு எச்சரிக்கை கொடுக்கப்படும், ஆனால் இந்த சம்பவத்தில் அதற்கு நேர்மாறாக நடைபெற்றது. இதனால் அங்கு சில நேரம் சலசலப்பு ஏற்பட்டது. ஆனால் கிரீஸ் அணிக்கு வழங்கப்பட்ட பெனால்டி திரும்பப் பெறப்படவில்லை.
பெனால்டியை எடுக்க முன்வந்த பக்கசெட்டாஸ் ராக்கெட் வேகத்தில் பந்தை கோலாக மாற்றினார். ஆட்டத்தை சமன் செய்த கிரீஸ் அணி கடுமையான தடுப்பு ஆட்டத்தில் ஈடுபட தொடங்கியது. ஆட்டத்தின் 77-வது நிமிடத்தில் ஸ்பெயின் அணியின் கயா கொடுத்த கிராஸ்சை ஒயார்சபால் கோலாக மாற்றும் அந்த சமயத்தில் கிரீஸ் அணியின் தடுப்பாட்டக்காரர் சிமிக்காஸ் சிறப்பாக செயல்பட்ட அதைத் தடுத்தார். ஆட்டத்தின் இறுதியில் இரு அணிகளும் தலா ஒரு கோல் அடித்து டிரா ஆனது.
கிரீஸ் அணி இந்த ஆட்டம் முழுவதும் ஒருமுறை மட்டுமே கோலை நோக்கி பந்தை செலுத்தினர், அதுவும் பெனால்டி என்பது குறிப்பிடத்தக்கது. வெற்றியோடு துவங்க வேண்டும் என்று இருந்த ஸ்பெயின் அணி சர்ச்சைக்குரிய பெனால்டியால் டிரா ஆனது
Mobile AppDownload Get Updated News