ஒரே ஆட்டத்தில் 10 புதிய வீரர்களை களமிறக்கி இந்தியா சாதனை: ஓமான் அணிக்கு எதிரான ஆட்டம் டிரா!

ஏறத்தாழ ஒன்றரை ஆண்டுகள் கழித்து இந்திய கால்பந்து அணி மீண்டும் களமிறங்கியது. இந்த ஆண்டு இந்தியன் சூப்பர் லீக் போட்டியில் சிறப்பாக ஆடிய பல வீரர்கள் அணியில் இடம் பெற்று இருந்தனர். இந்திய அணியில் பல்வேறு இளம் வீரர்கள் இடம் பெற்றிருந்தனர்.

இது இந்திய நாட்டில் கால் பந்து ஆட்டத்தில் முன்னேற்றத்தை குறிக்கும் அற்புதமான ஒரு அடையாளம். இம்முறை தேர்ந்தெடுக்கப்பட்ட 27 வீரர்களின் சராசரி வயது 24 மட்டுமே. இது பல்வேறு முன்னணி அணிகளை விட குறைவு. குறிப்பாக 2018 ஆம் ஆண்டு உலகக் கோப்பை வென்ற பிரான்ஸ் அணியின் சராசரி வயது 27 ஆக இருந்தது. மட்டுமல்லாமல் சென்ற முறை இந்திய அணியில் களமிறங்கிய வீரர்களின் சராசரி வயது 25 என்பதும் குறிப்பிடத்தக்கது.

ஒன்றரை ஆண்டுகளில் அணியின் சராசரி வயது 25 லிருந்து 24 ஆக குறைந்திருப்பது இந்திய அணியின் வளர்ச்சியை குறிக்கக் கூடிய ஒன்றாக அமைகிறது. 2015 ஆம் ஆண்டில் இருந்து ஒமான் அணியை இந்திய அணி நான்கு முறை சந்தித்துள்ளது, ஆனால் நான்கு முறையும் தோல்வியையே தழுவியது. இம்முறை சிறப்பான அணியோடு களம் இறங்கிய இந்திய அணி சிறப்பான ஆட்டத்தை வெளிப்படுத்த வேண்டும் என்ற எண்ணத்தில் களமிறங்கியது.

ஆட்டம் துவங்கிய முதல் நிமிடத்திலிருந்து ஓமான் அணி ஆதிக்கம் செலுத்தியது, இது எதிர்பார்த்ததே. இந்திய அணி சற்று தடுமாறியது, தாக்குதல் நடத்த வேண்டும் என்று முற்படும்போதெல்லாம் ஓமான் நாட்டின் தடுப்பு ஆட்டக்காரர்கள் சிறப்பாக செயல்பட்டு அதை தடுத்து நிறுத்தினர். இந்திய அணியின் தாக்குதல்கள் எதுவும் எதிரணியை சோதிக்கவில்லை.

ஓமான் நாட்டின் அழுத்தத்தை இந்திய அணியின் வீரர்கள் கையாள்வதில் சற்று திணறினர். ஓமான் அணி முதல் பாதியை ஆதிக்கம் செலுத்தியது, தொடர்ந்து வாய்ப்புகளை ஏற்படுத்தி வந்த ஓமான் அணிக்கு ஆட்டத்தின் 27 ஆவது நிமிடத்தில் பெனால்டி கிடைத்தது அதை எடுக்க முன்வந்த ஓமான் அணியின் அல் மக்பாலி அடித்த பந்தை இந்திய அணியின் கோல்கீப்பர் அம்ரிந்தர் சிங் பாய்ந்து தடுத்தார்.

தொடர்ந்து தாக்குதல் ஆட்டத்தில் ஈடுபட்ட ஓமான் அணியின் அல் அக்பாரி கொடுத்த கிராஸ்சை இந்திய அணியைச் சேர்ந்த சிங்கல்சனா கிளியர் செய்ய முற்பட்ட பந்து இந்திய அணியின் கோல் கீப்பர் அம்ரிந்தர் சிங் மேல்பட்டு ஓன் கோலாக மாறியது. முதல் பாதியின் முடிவில் ஓமான் அணி 1-0 என்ற கோல் கணக்கில் முன்னிலை பெற்றது.

இரண்டாம் பாதியை சிறப்பாக துவங்கிய இந்திய அணி ஆட்டத்தின் 55 ஆவது நிமிடத்தில் கோல் அடித்து ஆட்டத்தை சமன் செய்தது. இந்திய அணியின் தடுப்பு ஆட்டக்காரர் மேத்தா ஓமான் அணியில் வீரர்களுக்கு அழுத்தம் கொடுத்து பந்தை வென்றார், அவர் வென்ற பந்தை இந்திய அணியின் பிபின் சிங்கிர்க்கு பாஸ் செய்தார், அதை நிதானமாக பெற்ற அவர் கொடுத்த கிராஸ்சை மண்வீர் சிங் தலையால் முட்டி கோல் அடித்து ஆட்டத்தை சமன் செய்தார்.

ஆட்டத்தை சமன் செய்த இந்திய அணி அதன்பின் கடுமையான தடுப்பு ஆட்டத்தில் ஈடுபட்டது. முதல் பாதியை கடுமையாக ஆதிக்கம் செலுத்திய ஓமான் அணியினரால் இரண்டாம்பாதியில் இந்திய அணியின் தடுப்புச் ஆட்டத்தை மீறி வாய்ப்புகளை ஏற்படுத்த முடியாமல் திணறினர். ஓமான் அணியின் தாக்குதல்கள் இந்திய அணியின் தடுப்பு ஆட்டக்காரர்களால் சிறப்பாக தடுத்து நிறுத்தப்பட்டது. ஓமான் அணி இரண்டாம் பாதியில்பெரிய அளவில் பாதிப்புகளை ஏற்படுத்த வில்லை. இறுதியாக ஆட்டம் 1-1 என்ற கோல் கணக்கில் முடிவடைந்தது

இந்த ஆட்டத்தில் புதிதாக 10 வீரர்கள் இந்திய அணிக்காக களம் இறக்கப்பட்டனர். இந்திய அணியின் அடுத்த தலைமுறை, அணியை உலகக்கோப்பைக்கு அழைத்துச்செல்லும் என்று பலர் நம்பிக்கை தெரிவித்துள்ளனர். வருகிற 29-ஆம் தேதி இந்திய அணி ஐக்கிய அரபு அமீரகத்திர்க்கு எதிராக நட்புரீதியான ஆட்டத்தில் பங்கு பெறுகின்றனர்