மான்செஸ்டர் சிட்டி தோல்வி: வெற்றி ஓட்டத்தை தவிடு பொடியாக்கியது மான்செஸ்டர் யுனைடெட்.!

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று அதிகாலை நடை பெற்று முடிந்த ஆட்டத்தில் புள்ளி பட்டியலில் முதல் இடத்தில் இருக்கும் மான்செஸ்டர் சிட்டி அணியும், மூன்றாம் இடத்தில் இருக்கும் மான்செஸ்டர் யுனைடெட் அணியும் மோதின. இவ்விரு அணிகளும் மோதிய முதல் ஆட்டம் 0-0 என்று டிரா ஆனது.மான்செஸ்டர் சிட்டி அணி ஆடிய கடந்த 21 ஆட்டங்களாக வெற்றி பெற்று வருகிறது, எப்படி வீழ்த்துவது என்பதை அறியாமல் மான்செஸ்டர் சிட்டி அணிக்கு எதிரான ஆட்டத்தில் அனைத்து அணிகளும் திணறி வந்தனர்.

இந்நிலையில் சமீபகாலமாக கோல் அடிப்பதற்கு திணறி வரும் மான்செஸ்டர் யுனைடெட் அணி எதிர்கொண்டது. இரு அணிகளுக்கும் இடையே 14 புள்ளிகள் இடைவேளை இருந்த நிலையில் மான்செஸ்டர் யுனைடெட் அணி இந்த ஆட்டத்தை வெற்றி பெற்றால் அதை 11 புள்ளியாக குறைத்துவிடலாம். நடப்பு சீசனில் இன்னும் 11 ஆட்டங்கள் மட்டுமே எஞ்சியுள்ள நிலையில் மான்செஸ்டர் சிட்டி அணியை வீழ்த்துவது என்பது அத்தனை சுலபமான காரியமல்ல.

ஆட்டம் துவங்கிய முதல் நிமிடத்திலேயே மான்செஸ்டர் யுனைடெட் அணியின் மார்சியலை மான்செஸ்டர் சிட்டி ஜீசஸ் தட்டி விட்டதால் பெனால்டி வழங்கப்பட்டது. இதை எடுக்க முன்வந்த புருனோ கோலாக மாற்றி மான்செஸ்டர் யுனைடெட் அணியை முன்னிலை பெறச் செய்தார். தொடர்ந்து தாக்குதல் நடத்திய மான்செஸ்டர் யுனைடெட் அணிக்கு ஆட்டத்தின் 4வது நிமிடத்தில் மீண்டும் ஒரு வாய்ப்பு கிடைக்க அதை லூக் ஷா நழுவவிட்டார். எப்பொழுதும் போல மான்செஸ்டர் யுனைடெட் அணி கடுமையான தடுப்பு ஆட்டத்தில் ஈடுபட்டது,

அவ்வப்போது கவுண்டர் அட்டாக் செய்து மான்செஸ்டர் சிட்டி அணியின் தடுப்பு ஆட்டத்திற்கு தலைவழியாக விளங்கினர். மான்செஸ்டர் சிட்டி அணி அதிக நேரம் தாக்குதல் ஆட்டத்தில் கவனம் செலுத்தியும் அவர்களுக்கு கிடைத்த வாய்ப்புகளை தொடர்ந்து நழுவ விட்டு வந்தனர். மான்செஸ்டர் சிட்டி அணியின் சார்பாக மாரஸ், ஸ்டெர்லிங், சின்ச்சன்க்கோ, குன்டோகன் என யார் அடித்த பந்தும் கோலாக மாறவில்லை. முதல் பாதியின் முடிவில் மான்செஸ்டர் யுனைடெட் அணி 1-0 என்ற கோல் கணக்கில் முன்னிலை பெற்றது.

முதல் பாதியை போலவே இரண்டாம் பாதியையும் புயல் வேகத்தில் தொடங்கியது மான்செஸ்டர் யுனைடெட் அணி. மான்செஸ்டர் சிட்டி அணி கடுமையான தாக்குதல் ஆட்டத்தில் ஈடுபட ஆட்டத்தின் 49வது நிமிடத்தில் மான்செஸ்டர் யுனைடெட் அணியின் ராஷ்ஃபோர்ட் மற்றும் ஷா ஆகியோர் நடத்திய கவுண்டர் அட்டாக்கின் இறுதியில் ஷா மான்செஸ்டர் யுனைடெட் அணிக்கு இரண்டாவது கோலை பதிவு செய்து அணியை 2 கோல் முன்னிலை பெறச் செய்தார். கடுமையான தாக்குதல் ஆட்டத்தில் ஈடுபட்டுவந்த மான்செஸ்டர் சிட்டி அணிக்கு இது பெரும் அதிர்ச்சியாக அமைந்தது. மீண்டும் முதல் பாதியை போலவே மான்செஸ்டர் சிட்டி அணி ஏற்படுத்திய வாய்ப்புகளை கோலாக மாற்றுவதில் சிரமப்பட்டனர்.

ஆட்டத்தின் 75வது நிமிடத்தில் ஃபோடன் தனக்கு கிடைத்த வாய்ப்பை நழுவ விட 79 ஆவது நிமிடத்தில் ஸ்டெர்லிங் அவருக்கு கிடைத்த வாய்ப்பை நழுவ விட்டார். மான்செஸ்டர் யுனைடெட் அணியில் தடுப்பு சட்டத்தை மீறி மான்செஸ்டர் சிட்டி அணியினர் அதிக அளவிற்கு வாய்ப்புகளை ஏற்படுத்தவில்லை. அதேசமயம் ஏற்படுத்திய பல வாய்ப்புகளை நழுவி விட்டனர். ஆட்டத்தின் இறுதி நிமிடம் வரை மான்செஸ்டர் சிட்டி கடுமையான தாக்குதல் ஆட்டத்தில் ஈடுபட்டது. இறுதியில் மான்செஸ்டர் யுனைடெட் அணி 2-0 என்ற கோல் கணக்கில் வெற்றி பெற்றது.

இந்த வெற்றியின் மூலம் மான்செஸ்டர் யுனைடெட் அணி இரண்டாம் இடத்திற்கு முன்னேறியுள்ளது, ஆனால் முதல் இடத்தில் இருக்கும் மான்செஸ்டர் சிட்டி அணியை விட 11 புள்ளிகள் குறைவாகவே பெற்றுள்ளது. மறுமுனையில் மான்செஸ்டர் சிட்டி அணியினர் தொடர்ந்து 21 ஆட்டங்கள் வெற்றி பெற்று வந்த ஓட்டம் முடிவடைந்தது.