லிவர்பூல் அணி ஆடிய கடந்த ஆறு லீக் ஆட்டத்தில் ஐந்து தோல்விகளை தழுவியுள்ளனர். மறுமுனையில் ஃபுல்ஹாம் அணி ஆடிய கடந்த ஆறு லீக் ஆட்டத்தில் ஒரே ஒரு தோல்வியை மட்டுமே தழுவியுள்ளது. மேலும் இந்த ஆட்டத்தை வெற்றி பெறும் பட்சத்தில் ஃபுல்ஹாம் அணி புள்ளி பட்டியலில் 17வது இடத்தில் இருக்கும் பிரைட்டன் அணியின் புள்ளிக் கணக்கை சமன் செய்யும். லிவர்பூல் அணி இந்த ஆட்டத்தை வெல்லும் பட்சத்தில் புள்ளி பட்டியலில் ஐந்தாம் இடத்திற்கு முன்னேறும். இரு அணிகளும் வெற்றியை நோக்கி களமிறங்கியது.
லிவர்பூல் அணி பல மாற்றங்கள் செய்யப்பட்டு களமிறங்கினர். லிவர்பூல் அணி எப்பொழுதும் போல தாக்குதல் ஆட்டத்தில் ஈடுபட்டது, ஃபுல்ஹாம் அணியும் சமீபகாலமாக தாக்குதல் ஆட்டத்தை கையாண்டு பல ஆட்டங்களை எதிர்கொள்கின்றனர், அதைப்போல இந்த ஆட்டத்திலும் சற்று தாக்குதல் ஆட்டத்தை கையாண்டனர் ஆனாலும் லிவர்பூல் அணியின் தாக்குதல்களை சமாளிப்பதற்காக ஃபுல்ஹாம் அணி தடுப்பு ஆட்டத்திலும் சற்று கவனம் செலுத்தி வந்தது. ஆட்டத்தின் 12 ஆவது நிமிடத்தில் ஃபுல்ஹாம் அணியின் லுக்மன்னிர்க்கு அருமையான வாய்ப்பு கிடைக்க அவர் அடித்த பந்து கோல் கம்பத்தை விட்டு விலகிச் சென்றது. மறுமுனையில் லிவர்பூல் அணி சார்பாக சாலாவிர்க்கு ஆட்டத்தின் 17வது நிமிடத்தில் ஒரு வாய்ப்பும் 20வது நிமிடத்தில் மற்றொரு வாய்ப்பும் கிடைக்க இரண்டும் தவறியது.
ஆட்டத்தின் 30வது நிமிடத்தில் ஃபுல்ஹாம் அணியின் மாஜாவிர்க்கு அருமையான வாய்ப்பு ஏற்படுத்தித் தந்தார் டெட்டே ஆனால் அதை அவர் தவறி விட்டார். முதல் பாதி 0-0 என்ற முடிவை நோக்கி சென்று கொண்டிருக்க, முதல் பாதியின் இறுதி நிமிடத்தில் சாலாவிடமிருந்து பந்தை பிடுங்கிய லெமினா அதை கோலாக மாற்றி ஃபுல்ஹாம் அணிக்கு முன்னிலை பெற்றுத் தந்தார். முதல் பாதி 1-0 என்ற கோல் கணக்கில் முடிவடைந்தது.
இரண்டாம் பாதியில் ஆட்டம் தலைகீழாக மாறியது. முதல் பாதியில் முன்னிலை பெற்ற ஃபுல்ஹாம் அணி இரண்டாம்பாதியில் கடுமையான தடுப்பு ஆட்டத்தில் ஈடுபட்டது. நடப்பு சீசனில் முற்றிலுமாக தடுப்பு ஆட்டத்தில் ஈடுபடும் அணிகளுக்கு எதிராக லிவர்பூல் அணி கோல் பதிவு செய்ய முடியாமல் திணறி வந்ததை உன்னிப்பாக கவனித்து இருந்த ஃபுல்ஹாம் அணியின் மேலாளர் ஸ்காட் பார்க்கர் ஃபுல்ஹாம் அணியை முற்றிலும் தடுப்பு ஆட்டத்தில் ஈடுபட ஆணையிட்டார்.
அதை கச்சிதமாக செய்த ஃபுல்ஹாம் அணியின் தடுப்பு ஆட்டக்காரர்கள் செய்து காட்டினர். ஃபுல்ஹாம் அணியின் கோல்கீப்பர் அரியோலா அட்டகாசமான ஆட்டத்தை வெளிப்படுத்தி லிவர்பூல் அணியின் தாக்குதல்களை மதில் போல் நின்று தடுத்தார். லிவர்பூல் அணி சார்பாக ஜோட்டா, சாலா, கெய்ட்டா என அனைவர் அடித்த பந்துகளையும் அவர் கோல் விழாமல் தடுத்து நின்றார். இரண்டாம் பாதியில் லிவர்பூல் அணி நடத்திய தாக்குதல்கள் எதுவும் பெரிய அளவில் வாய்ப்புகளை ஏற்படுத்தக் கூடியதாக இல்லை. இறுதியில் ஆட்டத்தை ஃபுல்ஹாம் அணியினர் 1-0 என்ற கோல் கணக்கில் வெற்றி பெற்றனர்.
இந்த வெற்றியின் மூலம் புள்ளிப் பட்டியலில் 17 ஆம் இடத்தில் இருக்கும் பிரைட்டன் அணியோடு புள்ளி கணக்கை சமன் செய்துள்ளது. லிவர்பூல் அணி ஒன்பதாம் இடத்திற்கு தள்ளப்படும் அபாயம் ஏற்பட்டுள்ளது.
Mobile AppDownload Get Updated News