யுவன்டஸ் அபார வெற்றி: ஏசி மிலான் அணிக்கு நெருக்கடி!

இத்தாலி நாட்டில் நடைபெற்று வரும் சிரி அ லீகின் புள்ளி பட்டியலில் நான்காம் இடத்தில் இருக்கும் நடப்பு சாம்பியனான யுவன்டஸ் அணியும், புள்ளி பட்டியலில் ஏழாவது இடத்தில் இருக்கும் லாசியோ அணியும் மோதின. இவ்விரு அணிகள் மோதிய முதல் ஆட்டம் 1-1 என்ற கோல் கணக்கில் முடிவடைந்தது. சீசனின் துவக்கத்தில் மிக மோசமான ஆட்டத்தை வெளிப்படுத்தி வந்த யுவன்டஸ் சமீபகாலமாக தொடர்ந்து வெற்றிகளை குவித்து வருகிறது.


யுவன்டஸ் அணி ஆடிய கடந்த 5 லீக் ஆட்டத்தில் 3 வெற்றிகளை பதிவு செய்துள்ளது. மறுமுனையில் லாசியோ அணியும் கடந்த 5 லீக் ஆட்டத்தில் மூன்று வெற்றிகளை பதிவு செய்துள்ளது. இந்த ஆட்டத்தை யுவன்டஸ் அணி வெல்லும் பட்சத்தில் புள்ளி பட்டியலில் இரண்டாம் இடத்திற்கு முன்னேறும். மறுமுனையில் லாசியோ அணி ஆறாம் இடத்திற்கு முன்னேறும். இரு அணிகளும் வெற்றியை நோக்கி களமிறங்கினர்.

ஆட்டம் துவங்கியதிலிருந்து யுவன்டஸ் அணி சற்று தடுமாறியது. அணியின் வீரர்கள் கொடுத்த பாஸ் எதுவும் துல்லியமாக இல்லை. மேலும் லாசியோ அணியின் தாக்குதல்கள் யுவன்டஸ் அணியின் தடுப்பு ஆட்டத்திற்கு சற்று தலைவலியாக அமைந்தது. லாசியோ அணி தொடர்ந்து யுவன்டஸ் அணியின் வீரர்களுக்கு அழுதம் கொடுத்து வந்தனர். அதன் விளைவாக ஆட்டத்தின் 15வது நிமிடத்தில் யுவன்டஸ் அணியின் குலுசேவ்ஸ்க்கி கொடுத்த பாசை இடைமறித்த லாசியோ அணியின் கொரேயா பந்தை கடத்திச்சென்று கோல் அடித்து லாசியோ அணியை முன்னிலை பெறச் செய்தார்.

லாசியோ அணி யுவன்டஸ் அணிக்கு தொடர்ந்து அழுத்தம் கொடுத்து வந்தது. ஆட்டத்தின் 21ஆவது நிமிடத்தில் லாசியோ அணியின் சாவிச் தனக்கு கிடைத்த வாய்ப்பை நழுவ விட யுவன்டஸ் அணி தெளிவடைந்தது. ஆட்டத்தை யுவன்டஸ் அணி நிதானமாக எடுத்துச் சென்றது, ஆட்டத்தின் 40வது நிமிடத்தில் மொராட்டா கொடுத்த பாஸை ரபியொட் அட்டகாசமாக கோல் அடித்து ஆட்டத்தை சமன் செய்தார். லாசியோ அணி முன்னிலையுடன் முதல் பாதியை நிறைவு செய்யும் என்று எதிர்பார்க்கப்பட்ட நிலையில், 1-1 என்ற கோல் கணக்கில் முதல் பாதி முடிவடைந்தது.

முதல் பாதியை போலவே இரண்டாம் பாதியிலும் லாசியோ அணி தாக்குதல் ஆட்டத்தில் ஈடுபட்டது ஆட்டத்தின் 53வது நிமிடத்தில் சாவிச் தனக்கு கிடைத்த அருமையான வாய்ப்பை தலையால் முட்டி கோல் பக்கம் திருப்பி விட பந்து கம்பத்தில் பட்டு வெளியேறியது. ஆட்டத்தின் 58-வது நிமிடத்தில் ஆட்டத்தின் போக்கிற்கு நேரெதிராக கவுண்டர் அட்டாக் செய்த யுவன்டஸ் அணியின் கியேஸா கொடுத்த பாசை மொராட்டா கோலாக மாற்ற யுவன்டஸ் அணி முன்னிலை பெற்றது.


தொடர்ந்து தாக்குதல் நடத்திய யுவன்டஸ் அணியின் ராம்செவை லாசியோ அணியின் சாவிச் தட்டி விட யுவன்டஸ் அணிக்கு பெனால்டி வழங்கப்பட்டது. அதை மொராட்டா கோலாக மாற்ற யுவன்டஸ் 3-1 என்ற கோல் கணக்கில் முன்னிலை பெற்றது. இதனால் லாசியோ அணி கடுமையான தாக்குதல் ஆட்டத்தில் ஈடுபட்டது. ஆனால் யுவன்டஸ் அணியின் தடுப்பு ஆட்டம் அட்டகாசமாக செயல்பட்டதால் லாசியோ அணிக்கு கோல் எதுவும் கிடைக்கவில்லை. இறுதியாக ஆட்டம் 3-1 என்ற கோல் கணக்கில் முடிவடைந்தது.

இந்த வெற்றியால் யுவன்டஸ் அணி மூன்றாம் இடத்திற்கு முன்னேறியுள்ளது. இதுமட்டுமல்லாமல் இரண்டாம் இடத்தில் இருக்கும் ஏசி மிலான் அணிக்கும் யுவன்டஸ் அணிக்கும் இடையே இருக்கும் புள்ளி கணக்கு ஒன்றாக குறைத்துள்ளது.