நடப்பு சீசனின் துவக்கத்தில் அட்டகாசமாக விளையாடி வந்த மும்பை அணி இறுதிகட்டத்தில் தடுமாற்றத்தை சந்தித்தது ஆனாலும் லீக் சுழற் கேடயம் யாருக்கு என்று நிர்ணயித்த கடைசி ஆட்டத்தில், அப்பொழுது முதல் இடத்தில் இருந்த மோகன் பேகன் அணியை 2-0 என்ற கோல் கணக்கில் வீழ்த்தி சுழற் கேடயத்தை வென்றது. அதே சூட்டுடன் மும்பை அணி களமிறங்கியது. மறுமுனையில் கோவா அணி சிறப்பான ஆட்டத்தை வெளிப்படுத்தி புள்ளி பட்டியலில் நான்காம் இடத்தை பிடித்து. இரண்டு ஆட்டங்களாக நடைபெறும் அரையிறுதிப் போட்டியின் முதல் ஆட்டத்தில் வெற்றியுடன் தொடங்க வேண்டும் என்று இரு அணியினரும் களமிறங்கினர்.
மும்பை அணியினர் ஆட்டத்தை நிதானமாக எடுத்துச் சென்றனர், மறுமுனையில் கோவா அணியினர் மும்பை அணியினரின் தடுப்பு ஆட்டத்தை மீறி வாய்ப்புகளை ஏற்படுத்த காத்திருந்தனர். ஆட்டத்தின் நான்காவது நிமிடத்தில் கோவா அணியின் காமா அடித்த பந்து மும்பை அணியின் தடுப்பு ஆட்டக்காரர்கள் மேல்பட்டு வெளியேறியது. கோவா அணி சார்பாக மார்ட்டின்ஸ் அடித்த பந்து விலகிச் சென்றது. தொடர்ந்து தாக்குதல் நடத்திய கோவா அணிக்கு இருபதாவது நிமிடத்தில் பெனால்டி வழங்கப்பட்டது. அதை எடுக்க முன்வந்த அங்குலோ அதை கச்சிதமாக கோல் அடித்தார்.
வரலாற்றில் முதல்முறை: அன்ஃபீல்ட் மைதானத்தில் லிவர்பூல் அணி தொடர்ச்சியாக ஐந்து தோல்வி
அவர் அடித்த இந்தக் கோல் மூலம் நடப்பு சீசனில் தனது 14வது கோலை பதிவு செய்தார். ஆட்டம் துவங்கிய 20 நிமிடத்திலேயே ஒரு கோல் கொடுத்தது மும்பை அணிக்கு கோல் அடிக்க வேண்டும் என்ற உந்துதல் ஏற்பட்டது. இதனால் நிதானம் காட்டி வந்த மும்பை அணியினர் சற்று வேகம் எடுக்கத் தொடங்கினர். மும்பை அணியின் லெ ஃபான்ட்ரே, பிபின் சிங், ஒக்பேசி என அனைவரும் கோலைநோக்கி பந்தை அடிக்க மும்பை அணிக்கு கோல் எதுவும் கிடைக்கவில்லை. இறுதியாக ஆட்டத்தின் 38வது நிமிடத்தில் அணியின் நட்சத்திர வீரர் பூமஸ் கோல் அடித்து ஆட்டத்தை சமன் செய்தார். முதல் பாதி 1-1 என்ற கோல் கணக்கில் முடிவடைந்தது.
இரண்டாம் பாதி துவங்கியதிலிருந்து மும்பை அணி தொடர்ந்து வாய்ப்புகளை ஏற்படுத்தி வந்தது. மும்பை அணியின் ஒக்பேசி தனக்கு கிடைத்த இரண்டு அருமையான வாய்ப்புகளை நழுவ விட்டார். இரண்டாம் பாதியின் முதல் பத்து நிமிடத்தில் மும்பை அணி செலுத்திய ஆதிக்கத்திற்கு நிச்சயம் கோல் கிடைக்கும் என்று எதிர்பார்த்து காத்திருந்த ரசிகர்களுக்கு ஏமாற்றமே மிஞ்சியது. இரண்டு வாய்ப்புகளை தவற விட்ட மும்பை அணியை கோவா அணி ஆட்டத்தின் 59வது நிமிடத்தில் தண்டித்தது.
கோவா அணியின் காமா பந்தை அருமையாக கடத்திச்சென்று அற்புதமாக கோல் அடித்து கோவா அணியை முன்னிலை பெறச் செய்தார். அதற்கு உடனடியாக பதிலடி கொடுத்த மும்பை அணி ஆட்டத்தின் 61வது நிமிடத்தில் மீண்டும் கோல் அடித்து சமன் செய்தது. மும்பை அணியின் ஜாஹு கொடுத்த கிராஸ்சை ஃபால் தலையால் முட்டி கோல் அடித்தார். தடுப்பு ஆட்டக்காரரான ஃபால் நடப்பு சீசனில் பதிவுசெய்யும் நான்காவது கோலாக இது அமைந்தது. அதன்பின் இரு அணிகளும் தங்களுக்கு கிடைத்த வாய்ப்புகளை நழுவ விட ஆட்டம் 2-2 என்ற கோல் கணக்கில் முடிவடைந்தது.
இந்த ஆட்டம் 2-2 என்ற கோல் கணக்கில் டிராவில் முடிந்தது மும்பை அணிக்கு சாதகமாகவே பார்க்கப்படுகிறது. இந்த ஆட்டத்தில் மும்பை அணி பதிவு செய்த இரண்டு கோல்களும் 'அவே' கோலாக பதிவு செய்யப்படும் எனவே அடுத்த ஆட்டம் 0-0 என்றோ 1-1 என்றோ ஆட்டம் டிரா ஆகும் பட்சத்தில் மும்பை அணி இறுதி சுற்றுக்கு முன்னேறும்.
Mobile AppDownload Get Updated News