வரலாற்றில் முதல்முறை: அன்ஃபீல்ட் மைதானத்தில் லிவர்பூல் அணி தொடர்ச்சியாக ஐந்து தோல்வி

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று புள்ளிப் பட்டியலில் ஆறாவது இடத்தில் இருக்கும் செல்சீ அணியும் ஏழாவது இடத்தில் இருக்கும் லிவர்பூல் அணியும் மோதின. இவ்விரு அணிகள் ஆடிய முதல் ஆட்டத்தில் லிவர்பூல் அணி 2-0 என்ற கோல் கணக்கில் வெற்றி பெற்றது. இந்த ஆட்டத்தில் வெற்றி பெறுபவர்கள் நான்காம் இடத்திற்கு முன்னேறுவார்கள், எனவே இரு அணிகளும் வெற்றி பெற வேண்டும் என்ற முனைப்பில் களமிறங்கினர். லிவர்பூல் அணி சமீபகாலமாக மிக மோசமான ஆட்டத்தை வெளிப்படுத்தி வருவதால் சொந்த மைதானமான அன்ஃபீல்ட் மைதானத்தில் ஆடிய கடந்த நான்கு ஆட்டங்களில் தோல்வி அடைந்துள்ளது எனவே இந்த ஆட்டத்தில் வெற்றி பெற்று மீண்டும் வெற்றிப் பாதைக்கு திரும்பும் முனைப்பில் லிவர்பூல் அணி களமிறங்கியது.

இரு அணிகளும் தாக்குதல் ஆட்டத்தில் கவனம் செலுத்தினர், இரு அணிகளும் யார் முதல் கோல் அடிப்பது என்று மாறி மாறி தாக்குதல் நடத்தி வந்தனர் ஆட்டத்தின் 7-வது நிமிடத்தில் லிவர்பூல் அணியின் தடுப்பு ஆட்டக்காரரான ராபர்ட்சன் அடித்த பந்து கோல் கம்பத்தை விட்டு விலகிச் சென்றது, லிவர்பூல் அணிக்கு ஆட்டத்தில் கிடைத்த முதல் வாய்ப்பு நழுவ விடப்பட்டது. மறுமுனையில் செல்சீ அணியின் வெர்னர் அடித்த பந்து சற்று உயர சென்றது. தொடர்ந்து தாக்குதல் நடத்திய செல்சீ அணியின் வெர்னர் ஆட்டத்தின் 16 வது நிமிடத்தில் மீண்டும் ஒரு வாய்ப்பை நழுவவிட்டார். இரண்டு வாய்ப்புகளை தவறவிட்ட வெர்னர் ஆட்டத்தின் 24வது நிமிடத்தில் ஜார்ஜின்யோ கொடுத்த பாசை அருமையாக கடத்திச்சென்று கோலாக மாற்றினார்.

ஆனால் மறுபரிசீலனை செய்த பின்பு ஆஃப் சைட் காரணமாக கோல் நிராகரிக்கப்பட்டது. மறுமுனையில் லிவர்பூல் அணியின் சாலா கொடுத்த கிராஸ் மானேவின் கால்களுக்கு வர அவர் நிச்சயம் கோல் அடிப்பார் என்று எதிர்பார்த்த நிலையில் பந்தை முற்றிலுமாக தவறவிட்டார். தொடர்ந்து தாக்குதல் நடத்திய லிவர்பூல் அணி வாய்ப்புகளை ஏற்படுத்த திணறி வந்தனர். ஆட்டத்தின் 43ஆவது நிமிடத்தில் கான்ட்டே கொடுத்த பாசை மவுண்ட் அட்டகாசமாக கோல் அடித்து செல்சீ அணியை முன்னிலை பெறச் செய்தார். முதல் பாதி 1-0 என்ற கோல் கணக்கில் முடிவடைந்தது.


இரண்டாம் பாதியை அருமையாக தொடங்கிய செல்சீ அணிக்கு ஆட்டத்தின் 54 ஆவது நிமிடத்தில் சில்வெல் அடித்த பந்தை அலிசன் தட்டி விட பந்து சியக்கின் கால்களுக்கு சென்றது, அதை கோல் அடிப்பார் என்று எதிர்பார்த்த நிலையில் லிவர்பூல் அணியின் ராபர்ட்சன் இறுதிகட்டத்தில் தடுத்துவிட்டார். செல்சீ அணியின் தடுப்பு ஆட்டத்தை மீறி லிவர்பூல் அணியினரால் பெரிய அளவில் வாய்ப்புகளை ஏற்படுத்த இயலவில்லை. ஆட்டத்தின் 64வது நிமிடத்தில் ராபர்ட்சன் கொடுத்த கிராஸ்சை ஃபிர்மினோ தலையால் முட்ட பந்து விலகிச் சென்றது.

ஆட்டத்தின் 77-வது நிமிடத்தில் மவுண்ட் கொடுத்த பாசை வெர்னர் கோலை நோக்கி அடிக்க லிவர்பூல் அணியின் கோல்கீப்பர் அலிசன் மதில் போல் இருந்து தடுத்து விட்டார். ஆட்டம் துவங்கியதிலிருந்து லிவர்பூல் அணி வாய்ப்புகளை ஏற்படுத்த முடியாமல் திணறி வந்தனர். செல்சீ அணியின் தடுப்பு ஆட்டம் சிறப்பாக அமைந்தது மேலும் தாக்குதல் ஆட்டத்தில் பல வாய்ப்புகளை நழுவவிட்ட பொழுதிலும் மவுண்ட் அடித்த ஒரு கோல் போதுமானதாக அமைந்தது. ஆட்டத்தின் முடிவில் செல்சீ அணி 1-0 என்ற கோல் கணக்கில் வெற்றி பெற்றது.

இந்த வெற்றியின் மூலம் செல்சீ அணி புள்ளிப் பட்டியலில் நான்காம் இடத்திற்கு முன்னேறியுள்ளது. மேலும் லிவர்பூல் அணியின் 128 ஆண்டுகால வரலாற்றில் முதன்முறையாக தொடர்ச்சியாக ஐந்து முறை அன்ஃபீல்ட் மைதானத்தில் தோல்வியடைகிறது.