மஞ்சள் அட்டை மழை பொழிந்த நடுவர்: சர்ச்சையான ஆட்டம் சமமாக முடிந்தது!

இந்தியன் சூப்பர் லீக் தொடரின் 68வது ஆட்டம் கோவா அணிக்கும் கேரளா அணிக்கும் இடையில் நடைபெற்றது. இரு அணிகளும் மோதிய முதல் ஆட்டத்தில் கோவா அணி ஆதிக்கம் செலுத்த 3-1 என்று கோல் கணக்கில் கோவா அணி வெற்றி பெற்றது. இந்த ஆட்டத்தில் கோவா அணி வெற்றி பெறும் பட்சத்தில் இரண்டாம் இடத்தில் இருக்கும் மோகன் பேகன் அணிக்கு புள்ளிப் பட்டியலில் அழுத்தம் கொடுக்க முடியும், அதுமட்டுமல்லாமல் இந்த ஆட்டத்தில் தோல்வியடைந்தால் அடுத்ததாக நடக்கவிருக்கும் ஆட்டத்தில் ஹைதராபாத் அணி வெல்லும் பட்சத்தில் கோவா அணி 4-ஆம் இடத்திற்கு தள்ளப்படும்.

இதனை கருத்தில் கொண்டு களமிறங்கியது கோவா. மறுமுனையில் 9-வது இடத்தில் இருக்கும் கேரளா அணி இந்த ஆட்டத்தில் வெற்றி பெறும் பட்சத்தில் புள்ளிப் பட்டியலில் 5ஆம் இடத்திற்கு முன்னேறி விடும். மேலும் இவ்விரு அணிகள் சந்தித்த முதல் ஆட்டத்தில் படுதோல்வி அடைந்த கேரளா அணி பழிதீர்க்கும் எண்ணத்தோடு களமிறங்கியது. ஆட்டத்தின் முதல் பாதி துவங்கியதிலிருந்து கோவா அணியினர் பந்தை தங்கள் வசம் வைத்துக் கொண்டு கேரளா அணியினரை விளையாட விடாமல் தடுத்தனர். இருப்பினும் கோவா அணியினரால் பெரிய அளவில் வாய்ப்புகளை ஏற்படுத்த முடியவில்லை.


ஆட்டத்தின் 25ஆவது நிமிடத்தில் கோவா அணியின் ஒர்டிஸ் அடித்த ஃப்ரீ கிக்கை தவறாக சுதாரித்த கேரளா அணியின் கோல் கீப்பர் அல்பினோவின் தலையை தாண்டிச் சென்று கோல் விழுந்தது. முன்னிலை பெற்ற கோவா அணி தொடர்ந்து தாக்குதல் ஆட்டத்தில் ஈடுபட்டு வந்தது. இருப்பினும் கேரளா அணியின் சிறப்பான தடுப்பு ஆட்டத்தை மீறி அவர்களால் பெரிய அளவில் வாய்ப்புகளை ஏற்படுத்த முடியவில்லை. தாக்குதல் ஆட்டத்தில் தயக்கம் காட்டிய கேரளா அணியின் ஸ்டிக்கர் ஹூப்பர் கொடுத்த அழுத்தத்தினால் கோவா அணியின் கோல்கீப்பர் நவீன் குமார் பந்தை ஹூப்பரிடம் கொடுத்தார்.

ஆனால் அந்த வாய்ப்பை ஹூப்பர் நழுவ விட்டார். இதனால் ஆட்டத்தின் முதல் பாதி 1-0 என்று கோல் கணக்கில் நிறைவுபெற்றது. இரண்டாம் பாதியில் முற்றிலும் மாறுபட்ட அணியாக கேரளா அணி களம் இறங்கியது. முதல் பாதி வேறு ஒரு ஆட்டம் போன்றும் இரண்டாம் பாதி வேறு ஒரு ஆட்டம் போன்றும் தோன்றியது. இரண்டாம் பாதியில் கேரளா அணி தாக்குதல் ஆட்டத்தில் ஈடுபட கோவா அணி தடுப்பு ஆட்டத்தில் ஈடுபட்டது. இரண்டாம் பாதியில் கேரளா அணி துவங்கிய வேகத்தில் ஆட்டத்தின் 52 நிமிடத்தில் கேரளா அணியின் நடுகள வீரரான பெரேரா அடித்த கார்னர் கிக்கை அணியின் முன்கள வீரர் ராகுல் தலையால் முட்டி கோலாக மாற்றினார்.

இதனால் ஆட்டம் 1-1 என்ற கோல் கணக்கில் சமநிலை எட்டியது. அதன்பின் தொடர்ந்து தாக்குதல் ஆட்டத்தில் ஈடுபட்ட கேரளா அணி கோவா அணியினருக்கு அழுத்தம் கொடுத்து வந்தது. கோவா அணியினர் அவ்வப்போது தவறுகள் செய்து வந்த நிலையில் அவற்றை சரியாக பயன்படுத்தி கோல் அடிக்காமல் வீணடித்து வந்தனர் கேரளா அணியினர். ஆட்டத்தின் 65ஆவது நிமிடத்தில் கோவா அணியின் தடுப்பு ஆட்டக்காரர் கரிடோ, கேரளா அணியின் முன்கள வீரரான ஹூப்பரை தட்டிவிட அதற்கு மஞ்சள் அட்டை வழங்கப்பட்டது. அதை ஒப்புக் கொள்ளாத கரிடோ தொடர்ந்து வாக்குவாதத்தில் ஈடுபட்டார்.


இதன் காரணமாக மீண்டும் ஒரு மஞ்சள் அட்டை வழங்கி அது சிவப்பு அட்டையாக மாற்றப்பட்டு வெளியேற்றப்பட்டார். இது பெரும் சர்ச்சையை ஏற்படுத்தியது, இதற்காக வாக்குவாதம் செய்த கோவா அணியின் பயிற்சியாளர் யுவானிற்கும் மஞ்சள் அட்டை வழங்கப்பட்டது. இவற்றை மீறி தொடங்கிய ஆட்டத்தில் கோவா அணியினர் கடுமையான தடுப்பு ஆட்டத்தில் ஈடுபட்டு வந்தனர். கேரளா அணியினர் வாய்ப்புகளை உருவாக்க முடியாத காரணத்தால் ஆட்டம் 1-1 என்று சமநிலையில் முடிந்தது. இந்த ஆட்டம் டிரா ஆனதன் மூலம் கேரளா அணி ஏழாம் இடத்திற்கு முன்னேறியுள்ளது.