கிலாட்பேக் கொடுத்த கம்பேக்: உருக்குலைந்த பேயர்ன் தடுப்பாட்ட வீரர்கள்!

ஜெர்மனியில் புண்டஸ்லிகா கால்பந்து லீக் நடைப்பற்று வருகிறது. இந்நிலையில் இன்று அதிகாலையில் நடைபெற்ற ஆட்டத்தில் நடப்புச் சாம்பியன் பேயர்ன் முனிச் மற்றும் கிலாட்பாக் அணிகள் மோதின.

எப்பொழுதும் போல பேயர்ன் முனிச் தாக்குதல் ஆட்டத்தில் ஈடுபட்டது, ஆட்டத்தின் 20ஆவது நிமிடத்தில் நடுவரின் சர்ச்சைக்குரிய தீர்ப்பால் பேயர்ன்னுக்கு வழங்கப்பட்ட பெனால்டி ஷாட்டை கோலாக மாற்றினார் கோல் மழை பொழியும் கார்மேகம் ராபர்ட் லெவாண்டோஸ்கி.

1-0 என்ற கோல் கணக்கில் முன்னிலை பெற்றது பேயர்ன், உடனடியாக தம் பங்குக்கு கோல் அடித்து மீண்டுவர முனைப்பு காட்டிய கிலாட்பாக் அணிக்கு ஏமாற்றமே மிஞ்சியது, 26ஆவது நிமிடத்தில் பேயர்ன் முனிச்சின் நடுக்கள வீரர் கோரட்ஸ்க்கா ராக்கெட் வேகத்தில் அடுத்த கோல் அடிக்க 2-0 என்று முன்னிலையை வலுப்படுத்தியது.

இதிலிருந்து மீண்டு வரும் முனைப்பில் ஆட்டத்தை கிலாட்பாக் வேகப்படுத்த 35ஆவது நிமிடத்தில் ஸ்டிண்டில் கொடுத்த பாசை கோலாக மாற்றினார் ஹாஃப்மன். தொடர்ந்து வேகத்தை குறைத்துக்கொள்ளாத கிலாட்பாக் 45ஆவது நிமிடத்தில் முதல்கோல் போல ஸ்டின்டில் கொடுத்த த்ரூ பாசை கோலாக மாற்றினார் ஹாஃப்மன், பேயர்ன் முனிச் போட நினைத்த ஆப்சைட் பொறியை முறியடித்து ஹாஃப்மண் அடித்த இந்த கோல் மூலம் 2-2 என்று ஸ்கோர் முதல் பாதியில் முடிந்தது.

இரண்டாம் பாதியை பெரிதும் ஆதிக்கம் செலுத்தியது பேயர்ன் முனிச் இருப்பினும் 49வது நிமிடத்தில் நியூஹாஸ் கிலாட்பாக் அணிக்காக அடித்த கோலால் 3-2 என்ற கோல் கணக்கில் பேயர்ன் முனிச் பின்தங்கியே இருந்தது. தொடர்ந்து தாக்குதலாட்டதில் ஈடுப்பட்ட பேயர்ன் முனிச்சால் ஒரு கோல் கூட அடிக்கமுடியால் நடப்பு சீசனின் இரண்டாவது தோல்வியை தழுவியது.

இந்த சீசனில் மாத்திரம் 24 கோல் வாரிவழங்கியுள்ள பேயர்ன் முனிச்சின் தடுப்பாட்டம் பெரிய கேள்விக்குறியாகவே உள்ளது. இன்றிரவு டார்ட்முண்ட் அணியுடனான ஆட்டத்தில் லைப்சிக் அணி வெற்றி பெற்றால், பேயர்ன் முனிச்சை பின்னுக்கு தள்ளி முதலிடத்தை பிடித்துவிடும்.