‘ஃபார்முலா-1’ ஜப்பான் கிராண்ட் பிரிக்ஸ் : ஹாமில்டன் சாம்பியன், வெட்டல் ஆறாவது இடம்!

உலகின் பல்வேறு நாடுகளில் ஆண்டுதோறும் ஃபார்முலா-1 கார்பந்தயம் நடப்பது வழக்கம். இந்த ஆண்டுக்கான தொடர் மொத்தம் 21 சுற்றுகளாக நடக்கிறது. இதன் 17வது சுற்றுக்கான ஃபைனல் போட்டி இன்று ஜப்பானின் சுசூக்காவில் நடந்தது.

சீறிப்பாய்ந்த ஹாமில்டன்.....
இதில் மெர்சிடஸ் அணியின் லீவிஸ் ஹாமில்டன் முதலிடம் பிடித்தார். மொத்தமாக 53 சுற்றுகள் கொண்ட இந்த போட்டியில் ஹாமில்டன், பந்தய எல்லையை 1.27.17.062 நிமிடத்தில் கடந்து முதலிடம் பிடித்தார்.

இவரைவிட கூடுதலாக 12.919 வினாடிகள் எடுத்துக்கொண்ட மற்றொரு மெர்சிடஸ் வீரர் வால்டேரி போடஸ் இரண்டாவது இடம் பிடித்தார். ரெட் புல் வீரர் மேக்ஸ் வெர்ஸ்டாபென் (+14.29 நிமிடங்கள்) மூன்றாவது இடம் பிடித்தார். பெராரி அணியின் நட்சத்திர வீரர் செபாஸ்டியன் வெட்டல் (+69.873) ஆறாவது இடத்துக்கு தள்ளப்பட்டார்.

50வது வெற்றி:
இதன் மூலம் ஜப்பான் கிராண்ட் பிரிக்ஸில் மெர்சிடஸ் அணியின் லீவிஸ் ஹாமில்டன் தொடர்ந்து 5வது முறையாக சாம்பியன் பட்டம் வென்று ஹாமில்டன் ஆதிக்கம் செலுத்துகிறார்.

சூமேக்கருக்கு பின்....
தவிர, ஹாமில்டன் வெல்லும் 71வது பட்டமாகும், மெர்சிடஸ் அணிக்காக வெல்லும் 50வது பட்டமாகும். இதன் மூலம் ஒரே அணிக்காக அதிக முறை சாம்பியன் பட்டம் வென்ற வீரர்கள் பட்டியலில் ஜாம்பவான் சூமேக்கருக்கு (72 வெற்றிகள், பெராரி அணி) பின் ஹாமில்டன் இரண்டாவது இடம் பிடித்தார்.

நம்பர்-1 ஹாமில்டன்.....
இந்த வெற்றியின் மூலம் ஹாமில்டனுக்கு 25 புள்ளிகள் கிடைத்தது. இதையடுத்து இந்த ஆண்டுக்கான தொடரில் மொத்தமாக 331 புள்ளிகள் பெற்ற லீவிஸ் ஹாமில்டன் சாம்பியன்ஷிப் வீரர்கள் பட்டியலில் ‘நம்பர்-1’ இடத்தில் நீடிக்கிறார். செபாஸ்டியன் வெட்டல் (264 புள்ளிகள்) இரண்டவது இடத்திலும்,
மற்றொரு மெர்சிடஸ் வீரர் வால்டேரி போடஸ் (207) மூன்றாவது இடத்திலும் உள்ளனர்.