அதென்ன Hayya Card? கத்தாரில் ஃபிஃபா உலகக்கோப்பை பார்க்க ஏன் தேவைப்படுகிறது?

உலகின் மிகப்பெரிய விளையாட்டு திருவிழாவான ஃபிஃபா கால்பந்து உலகக்கோப்பை வரும் நவம்பர் 20ஆம் தேதி கத்தார் நாட்டில் தொடங்குகிறது. மத்திய கிழக்கு நாடுகளில் நடைபெறும் முதல் உலகக்கோப்பை என்பதால் பெருமையும், பெரிய எதிர்பார்ப்பும் ஏற்பட்டுள்ளது. உலகக்கோப்பை கால்பந்து போட்டிகளை காண டிக்கெட் முன்பதிவு தொடங்கி நடைபெற்று வருகிறது.

இந்நிலையில் டிக்கெட் வாங்கும் அனைவரும் ஹய்யா கார்டு (Hayya Card) பெறுவதற்கு தனியாக விண்ணப்பிக்க வேண்டும் என்று அறிவுறுத்தப்பட்டுள்ளது. அப்போது தான் உலகக்கோப்பை போட்டிகள் நடைபெறும் மைதானங்களில் அனுமதிக்கப்படுவர். ஏன் கத்தார் நாட்டிற்குள்ளேயே இந்த கார்டு இருந்தால் தான் அனுமதியாம். அப்படியென்ன கார்டு இது. எதற்காக கட்டாயம் ஆக்கப்பட்டுள்ளது என தெரிந்து கொள்ளலாம்.

Hayya Card என்றால் என்ன?

இதுவொரு ஃபேன் ஐடி கார்டு. கால்பந்து ரசிகராக உங்களை அடையாளப்படுத்திக் கொள்ளும் அட்டை. அதுமட்டுமின்றி கத்தார் நாட்டிற்குள் நுழையவும், போட்டி நடைபெறும் மைதானங்களில் செல்வதற்கும், போட்டி நடக்கும் நாட்களில் மெட்ரோ மற்றும் பேருந்துகளில் இலவசமாக பயணிக்கவும் Hayya Card தேவைப்படுகிறது.

யாருக்கெல்லாம் Hayya Card-கள் தேவைப்படுகின்றன?

கத்தார் நாட்டிற்கு சென்று ஃபிஃபா கால்பந்து போட்டிகளை பார்க்கும் அனைவருக்கும் இந்த கார்டு கட்டாயம். குழந்தைகள் மற்றும் 18 வயதுக்கு கீழ் உள்ளவர்கள் என அனைவருக்கும் Hayya Card தேவை. சிறியவர்களுக்கு அவர்களின் பெற்றோர் அல்லது பாதுகாவலர்கள் விண்ணப்பிக்கலாம்.

Hayya Card இருந்தால் Visa தேவையா?

சர்வதேச நாடுகளில் இருந்து கத்தார் நாட்டிற்கு ஃபிஃபா உலகக்கோப்பை கால்பந்து போட்டிகளை காண வருவோர், அங்கீகரிக்கப்பட்ட Hayya Card வைத்திருந்தால் அவர்களுக்கு விசா தேவையில்லை. இந்த கார்டு இருந்தால் ஜனவரி 23, 2023 வரை கத்தார் நாட்டில் தங்கிக் கொள்ளலாம்.

இந்த கார்டை பெற எப்படி விண்ணப்பிப்பது?

ஃபிஃபா உலகக்கோப்பை கத்தார் 2022 அதிகாரப்பூர்வ இணையதளத்தில் Hayya Card பெற விண்ணப்பம் செய்யலாம். இல்லையெனில் ”Hayya to Qatar 2022” என்ற மொபைல் ஆப் மூலமும் விண்ணப்பிக்கலாம்.

Hayya Card விண்ணப்பிக்க எந்தெந்த ஆவணங்கள் தேவைப்படுகின்றன?

முதலில் ஆன்லைனில் சுய விவரங்களை பதிவு செய்து Hayya அக்கவுண்ட் உருவாக்க வேண்டும். அதில் Login செய்த பின்னர், போட்டிக்கான டிக்கெட் அப்ளிகேஷன் நம்பர் அளிக்க வேண்டும். மேலும் தனிப்பட்ட விவரங்கள், பாஸ்போர்ட் தகவல்கள், வீட்டு முகவரி ஆகியவற்றை பதிவிட வேண்டும். சர்வதேச பார்வையாளர்களாக இருந்தால் எங்கே தங்கியிருக்கிறீர்கள் என்ற விவரம் வேண்டும். மேலும் அவசர தொடர்பிற்கு ஒரு தொலைபேசி எண் அளிக்க வேண்டும். பாஸ்போர்ட் சைஸ் போட்டோ ஒன்று டிஜிட்டல் வடிவில் வைத்திருப்பது அவசியம்.

இந்த கார்டிற்கு ஒப்புதல் கிடைக்க எவ்வளவு நாட்கள் ஆகும்?

சர்வதேச பயணிகள் Hayya Cardக்கு விண்ணப்பம் செய்தால் 5 நாட்களில் ஒப்புதல் கிடைத்துவிடும். அதுவே உள்நாட்டு பயணிகளாக இருந்தால் 3 நாட்களில் ஒப்புதல் கிடைத்துவிடும்.