மெஸ்ஸி சொன்ன அந்த ஒரு வார்த்தை... ஆடிப் போன கால்பந்து உலகம்- அர்ஜெண்டினா நிலை என்ன?

லியோனல் மெஸ்ஸி. சர்வதேச கால்பந்து ரசிகர்களுக்கு நன்கு தெரிந்த பெயர். அவரது ட்ரிப்பிலிங் செய்யும் திறன், கால்பந்தை கடத்திச் செல்லும் வேகம், வலையின் ஓரத்தில் குறிவைத்து கோல் அடிக்கும் ஸ்பெஷல், உடல் உறுதி என ரசிக்க ஏராளமான விஷயங்கள் உண்டு. தற்போது அர்ஜெண்டினா தேசிய கால்பந்து அணியின் கேப்டனாக, பி.எஸ்.ஜி கிளப் அணியின் நட்சத்திரமாக ஜொலித்து கொண்டிருக்கிறார். இவர் தலைமையில் கிளப் அணிகளில் ஏராளமான கோப்பைகளை வாங்கி குவித்திருந்தாலும் தேசிய அணிக்காக பெரிதாக கோப்பைகள் எதுவும் பெறவில்லை என்ற குறை நீடித்து வந்தது.

அதற்கு கடந்த ஆண்டு முற்றுப்புள்ளி வைத்தார். கோபா அமெரிக்கா 2021ஐ வென்று கால்பந்து ரசிகர்களின் ஏக்கத்திற்கு பூர்த்தி செய்தார். ஆனால் உலகக்கோப்பை என்பது இன்னும் நிறைவேறாத கனவாகவே இருக்கிறது. இப்படியொரு சூழலில் அந்த அதிர்ச்சிகரமான செய்தி வெளிவந்து கால்பந்து உலகை சோகத்தில் ஆழ்த்தியிருக்கிறது. அப்படியென்ன மெஸ்ஸி சொல்லிவிட்டார் என்று கேட்கலாம்.

”வரும் 2022 கத்தாரில் நடக்கும் ஃபிஃபா உலகக்கோப்பை தொடரே தன்னுடைய கடைசி உலகக்கோப்பை. உடல் ரீதியாக நன்றாகவே உணர்கிறேன். நடப்பாண்டு ப்ரீ சீசன் ஆட்டங்கள் மிகவும் சிறப்பான முறையிலேயே இருந்தன” என்று லியோனல் மெஸ்ஸி அறிவித்துவிட்டார். என்ன சொல்றீங்க? நிஜமாகவா? என்று தங்களை கிள்ளி பார்த்து கொள்ள வேண்டிய நிலைக்கு ரசிகர்கள் ஆளாகியிருக்கின்றனர்.

மெஸ்ஸிக்கு தற்போது வயது 35. திறமையான இளம் வீரர்கள் பலர் கால்பந்து உலகில் காலடி எடுத்து வரும் சூழலில், அவர்களுக்கு மெஸ்ஸி வழிவிட்டு தான் ஆக வேண்டும். அதேசமயம் தன்னுடைய உடல் உறுதி, அணியை வழிநடத்தும் வல்லமை ஆகியவற்றை இன்னும் எத்தனை நாட்கள் தன் வசம் வைத்திருக்கலாம் என்பதை முடிவு செய்யக் கூடியவர் மெஸ்ஸி ஒருவரே.

எனவே அவரது முடிவை நாம் ஏற்றுக் கொண்டு தான் ஆக வேண்டும். 2007ல் சர்வதேச கால்பந்து அரங்கில் காலடி எடுத்து வைத்த லியோனல் மெஸ்ஸி, அர்ஜெண்டினா அணிக்காக 164 முறை தலைமை ஏற்றிருக்கிறார். 2014ஆம் ஆண்டு உலகக்கோப்பை தொடரில் இறுதிப் போட்டிக்கு முன்னேறியது. 2018ல் ரவுண்ட் ஆஃப் 16ல் வெளியேறியது.

இதுவரை உலகக்கோப்பையை மெஸ்ஸி வெல்லவில்லை. எனவே தனது கடைசி உலகக்கோப்பை தொடரான 2022 கத்தார் கோப்பையை அர்ஜெண்டினாவிற்கு மெஸ்ஸி வென்று தருவாரா? என்ற எதிர்பார்ப்பு ஏற்பட்டுள்ளது. மேனேஜர் லியோனல் ஸ்கலோனி தலைமையில் 35 ஆட்டங்களில் தோல்வியே காணாமல் கடந்து வந்திருக்கிறது அர்ஜெண்டினா.

இவரது வழிகாட்டுதலின் பேரில் தான் கோபா அமெரிக்காவை வென்று காட்டினர். இதனால் உலகக்கோப்பை தொடரில் வெற்றி வாய்ப்பு மிகவும் பிரகாசமாக இருப்பதாக கால்பந்து பார்வையாளர்கள் கூறுகின்றனர். அதற்கேற்ப அணியும் பலம் வாய்ந்து விளங்குகிறது.