செஸ்ஒலிம்பியாட் போட்டியில் இந்திய அணி தொடர்ந்து ஆதிக்கம் ; இந்திய வீரர்களின் புள்ளி விவரம்.

இந்தியாவில் முதல் முறையாக நடக்கும் செஸ்ஒலிம்பியாட் போட்டி தமிழகத்தில் தொடங்கி வெகு சிறப்பாக நடைபெற்று வருகிறது. இந்திய பிரதமர் நரேந்திர மோடி பங்கேற்ற செஸ்ஒலிம்பியாட் துவக்க விழா வெகு சிறப்பாக நடைபெற்றது.

போட்டி தொடங்கிய முதல் சுற்றில் இந்திய அணி சிறப்பாக விளையாடினாலும், தொடர்ந்து நடந்த போட்டிகளில் சில தோல்விகளை சந்தித்துள்ளது. செஸ் ஒலிம்பியாட் தொடரின் 5-வது சுற்றில் ஆடவர் 'பி' அணியில் தமிழக வீரர் பிரக்ஞானந்தா தோல்வியைத் தழுவினார். இருந்த போதும், எஞ்சிய வீரர்கள் சிறப்பாக விளையாடியதால் 'பி' அணி தொடர் வெற்றியை பதிவு செய்து, முதலிடத்தில் நீடித்து வருகிறது.

வெற்றியை நோக்கி இந்திய அணி

நடந்து முடிந்த 5-வது சுற்றில் ஆடவர் பிரிவில் இந்திய 'ஏ' அணி ருமேனியாவை எதிர்கொண்டது. முந்தைய சுற்றில் டிராவை சந்தித்த, இந்திய அணி இதில், வெள்ளை நிற காய்களுடன் சிறப்பாக விளையாடியது. இந்திய வீரர் அர்ஜூன், ருமேனிய வீரர் மிர்சியா எமிலியயை வீழ்த்தி அசத்தினார். மேலும், ஹரிகிருஷ்ணா, விதித் சந்தோஷ், நாராயணன் ஆகியோர் போட்டியை டிரா செய்ததால், இந்திய ஏ அணி போராடி வெற்றிபெற்றது.

தமிழக வீரர் தோல்வி

இந்திய ஆடவர் 'பி' அணி, ஸ்பெயின் அணிக்கு எதிராக களம் கண்டது. இப்பிரிவில் பெரிதும் எதிர்பார்க்கப்பட்ட தமிழக வீரர் பிரக்ஞானந்தா, ஸ்பெயின் வீரர் சேன்டோஸிடம் 85-வது நகர்த்தலில் தோல்வியடைந்தார். இருப்பினும், தமிழக வீரர்களான குகேஷ் மற்றும் அதிபன் ஆகியோர் சிறப்பாக விளையாடி வெற்றியை பெற்று, ஸ்பெயினை வீழ்த்தி தனது வெற்றி பயணத்தை தொடர்ந்தது.

ஐந்தாவது சுற்றிலும் வெற்றி

இந்திய ஆடவர் 'சி' அணி, சிலி அணியுடன் மோதியது. 4-வது சுற்றில் தோல்வி கண்டதால், 5-வது சுற்றில் வெற்றி பெரும் நோக்கில் கலமிறங்கியது. இந்த பிரிவில் தமிழக வீரர் கார்த்திகேயன் முரளி தோல்வியை சந்தித்தார். அதேவேளையில், அபிமன்யு, சேதுராமன் வெற்றி பெற்றதால் , சி அணி சிலியை வீழ்த்தி வெற்றி வாகை சூடியது.

இந்திய மகளிர் பிரிவு

இந்திய அணி மகளிர் பிரிவு ஐந்தாவது சுற்றில் இந்திய 'ஏ' அணி, பிரான்ஸ் அணியை சந்தித்தது. இந்திய வீராங்கனை தானியா, 38-வது நகர்த்தலில் பிரான்சின் ஆண்ட்ரியாவை வீழ்த்தி, மேலும் கொனேரு ஹம்பி, ஹரிகா, வைஷாலி டிராவை சந்தித்ததாலும், இந்திய அணி பிரான்சை வீழ்த்தி வெற்றியை தொடர்ந்தது.

ஜார்ஜியாவிடம் தோல்வி

இந்திய மகளிர் 'பி' அணி ஜார்ஜியாவுடன் மோதியது. இப்பிரிவில் வந்திகா அகர்வால், பத்மினி டிராவை சந்தித்த நிலையில், சவுமியா சாமிநாதன், திவ்யா தேஷ்முக் ஆகியோரும் தோல்வியை தழுவியதால் இந்திய பி அணி ஜார்ஜியாவிடம் தோல்வியடைந்தது.

தமிழக வீராங்கனையின் தொடர் வெற்றி

இந்திய மகளிர் 'சி' அணி பிரேசில் அணியை எதிர்த்து விளையாடியது. இப்பிரிவில், தமிழக வீராங்கனை நந்திதா 33-து நகர்த்தலில், தன்னை எதிர்த்து ஆடிய பிரேசில் வீராங்கனை லிப்ரலொதோ-வை வீழ்த்தினாலும், பிரேசில் அணியுடன் போட்டியை டிரா மட்டுமே செய்ய முடிந்தது. இன்று நடந்த போட்டியில் நந்திதா வெற்றி பெற்றதன் மூலம் தொடர்ந்து ஐந்து சுற்றுகளிலும் வெற்றிபெற்று அனைவரின் கவனத்தையும் ஈர்த்துள்ளார்.