செஸ்ஒலிம்பியாட் போட்டியில் இந்திய அணியின் நிலை ; நான்காவது சுற்று போட்டியில் இந்திய அணியின் புள்ளி விவரம்.

சென்னையை அடுத்த மாமல்லபுரத்தில் செஸ் ஒலிம்பியாட் போட்டியின் இரண்டாவது சுற்று நடைபெற்று வருகிறது. நேற்று 3 மணியளவில் தொடங்கிய 4வது சுற்றுக்கான தொடரில், இந்தியா சார்பில் மொத்தம் 6 அணிகள் களம் இறங்கின. இந்திய அணி சார்பில் விளையாடும் தமிழகத்தை சேர்ந்த 16 வயது இளைஞன் பிரக்ஞானந்தாவிற்கு நடந்து முடிந்த முதல் சுற்று போட்டியில் ஓய்வு அளிக்கப்பட்டிருந்தது. தொடர்ந்து களமிறங்கிய அவர் சிறப்பாக விளையாடி வருகிறார். நேற்றைய தினம் நடந்த நான்காவது சுற்றின் முன்னோட்டம் குறித்து விவரம் பின் வருமாறு,

இந்திய ஓபன் அணி

4-வது நாளான நேற்று நடைபெற்ற ஆட்டத்தில் இந்திய ஏ அணியானது பிரான்ஸுடன் மோதியது. வெள்ளை நிற காய்களுடன் விளையாடிய இந்தியாவின் அர்ஜுன் எரிகைசி, கார்னெட் மாத்தியூக்கு எதிரான ஆட்டத்தை 30-வது நகர்த்தலில் டிராவில் முடித்தார். இதேபோன்று ஹரிகிருஷ்ணா பென்டலா 52-வது நகர்வின் போது மவுஸார்ட் ஜூல்ஸுக்கு எதிரான ஆட்டத்தையும், விதித் குஜராத்தி 31- வது நகர்வின் போது ஃப்ரெசினெட் லாரன்ட்டுக்கு எதிரான ஆட்டத்தையும் டிராவில் முடித்தனர். எஸ்.எல்.நாராயணனும் 51-வது நகர்வின் போது லகார்டே மோஸ்ட்டுக்கு எதிரான ஆட்டத்தை டிரா செய்தார். பிரான்ஸ்க்கு எதிரான ஆட்டத்தை 2-2 என்ற கணக்கில் ட்ராவில் முடித்தது.

தொடர்ந்து விளையாடிய இந்திய பி அணி இத்தாலியுடன் மோதியது. இதில் இந்தியாவின் சத்வானி ரவுனக், சோனிஸ் பிரான்செஸ்கோவுக்கு எதிரான ஆட்டத்தை 30-வது நகர்த்தலில் டிராவில் முடித்தார். வெள்ளை நிற காய்களுடன் விளையாடிய டி.குகேஷ் 34-வது நகர்த்தலில் வோக்துரா டேனியலை தோற்கடித்தார். கருப்பு நிற காய்களுடன் விளையாடிய சரின் நிகில் 51-வது நகர்வின் போது மொரோனி லூகா ஜூனியரை வீழ்த்தினார். இந்திய அணியின் இளம் வீரர் ஆர்.பிரக்ஞானந்தா 42-வது நகர்த்தலின்போது லோடிசி லோரென்சோவுக்கு எதிரான ஆட்டத்தை டிராவில் முடித்து, இத்தாலி அணியை 3-1 என்ற புள்ளிக்கணக்கில் வீழ்த்தியது இந்திய பி அணி.

இந்திய சி அணி, ஸ்பெயினை எதிர்த்து விளையாடியது. இதில் வெள்ளை நிற காய்களுடன் விளையாடிய கங்குலி சூர்யா சேகர், போட்டியை டிராவில் முடித்தார். அதேவேளையில் எஸ்.பி.சேதுராமன் 31-வது நகர்த்தலின் போது வல்லேஜோ போன்ஸ் பிரான்சிஸ்கோவுக்கு எதிரான ஆட்டத்தை டிரா செய்தார். குப்தா அபிஜீத் 41-வது நகர்வின் போது அன்டன் குய்ஜாரோ டேவிட்டிடம் தோல்வியை தழுவினார். கார்த்திகேயன் முரளி, சாண்டோஸ் லதாசா ஜெய்ம் மோதிய ஆட்டமும் 52-வது நகர்வில் டிராவில் முடிவடைந்தது. இதனால் ஸ்பெயின் அணிக்கு எதிரான ஆட்டத்தில் இந்திய சி அணி 2.5-1.5 என்ற புள்ளி கணக்கில் தோல்வியடைந்தது.

இந்திய மகளிர் அணி

மகளிர் பிரிவில் இந்திய ஏ அணி ஹங்கேரியை எதிர்த்து விளையாடியது. இதில் நிறைமாத கர்ப்பிணியான இந்தியாவின் ஹரிகா துரோணவல்லி 13-வது நகர்த்தலின் போது காராடிசியாவுக்கு எதிரான ஆட்டத்தை சமன் செய்தார்.

இதேபோன்று ஆர்.வைஷாலி 35-வது நகர்வின் போது லாசர்னே வஜ்தா சிடோனியாவுக்கு எதிரான ஆட்டத்தை டிராவில் முடித்தார். கோனேரு ஹம்பி 48-வது காய் நகர்த்தலின் போது ஹோங் தான் டிராங்கிற்கு எதிரான ஆட்டத்தை டிரா செய்தார். தானியா சச்தேவ் 52-வது நகர்வின் போது சோகாவை தோற்கடித்தார். இதன் மூலம் இந்திய ஏ அணி 2.5-1.5 என்ற புள்ளி கணக்கில் ஹங்கேரியை வீழ்த்தி அடுத்த சுற்றுக்கு முன்னேறியது.

இந்திய மகளிர் பி அணியானது எஸ்டோனியாவை எதிர்த்து விளையாடியது. இதில் வெள்ளை நிற காய்களுடன் விளையாடிய இந்தியாவின் வந்திகா அகர்வால் 43-வது நகர்வின்போது மேநர்வாவை வீழ்த்தினார். சவுமியா சாமிநாதன் 43-வது நகர்வின் போது சினிட்சினா அனஸ்தேசியாவுக்கு எதிரான ஆட்டத்தையும், திவ்யா தேஷ்முக் 42-வது நகர்வின் போது சோபியா ப்ளாக்கினுக்கு எதிரான ஆட்டத்தையும் பத்மினி ரவுத் 45-வது நகர்வின் போது ஓல்டே மார்கரெட்டுக்கு எதிரான ஆட்டத்தையும் டிராவில் முடித்தனர். இதன் மூலம் இந்திய பி அணியானது 2.5-1.5 என்ற புள்ளி கணக்கில் எஸ்டோனியாவை வீழ்த்தி வெற்றியடைந்தது.

இந்திய மகளிர் சி அணி முதல் 3 சுற்றுகளிலும் வெற்றி பெற்ற நிலையில் நேற்று நடைபெற்ற 4-வது சுற்றில் ஜார்ஜியாவிடம் 3-1 என்ற கணக்கில் தோல்வியடைந்தது.

முதல், இரண்டாம் சுற்று போட்டிகளில் இந்திய அணி சிறப்பாக விளையாடி இருந்தாலும் தொடர்ந்து நடக்கும் தொடர்களில் இந்திய அணி சவால்களை எதிர் கொண்டு வருகிறது, இது மாதிரியான சூழ்நிலையிலும் இந்திய அணி சிறப்பாக விளையாடும் ரசிகர்களால் பெரிதும் எதிர்பார்க்கப்படுகிறது.