ரொனால்டோ ஹாட்ரிக்: இரண்டாம் இடத்தை நெருங்கும் யுவன்டஸ்!

இத்தாலி நாட்டில் நடைபெற்று வரும் சிரி அ போட்டியில் இன்று புள்ளி பட்டியலில் மூன்றாம் இடத்தில் இருக்கும் நடப்புச் சாம்பியனான யுவன்டஸ் அணியும் 17வது இடத்தில் இருக்கும் காக்லியாரி அணியும் மோதின. இவ்விரண்டு அணிகளும் மோதிய முதல் ஆட்டத்தில் யுவன்டஸ் அணி 2-0 என்ற கோல் கணக்கில் வெற்றி பெற்றது.

சமீபத்தில் சாம்பியன்ஸ் லீக் போட்டியில் இருந்து வெளியேறிய யுவன்டஸ் அணி ரசிகர்களை கடுமையாக அதிருப்தி அடையச் செய்துள்ளது, அதிலிருந்து மீண்டு ரசிகர்களின் அன்பை பெறுவதற்கு இந்த ஆட்டத்தில் வெற்றி பெறுவது அவசியமான ஒன்றாக பார்க்கப்படுகிறது.

மறுமுனையில் காக்லியாரி அணி மிக மோசமான ஆட்டத்தை வெளிப்படுத்தி வருகிறது, அவர்கள் ஆடிய கடந்த இருபது ஆட்டங்களில் மூன்றே மூன்று வெற்றியை மட்டுமே பதிவு செய்துள்ளது. எனவே இந்த ஆட்டத்தில் வெற்றி பெற்று இரண்டாம் இடத்தில் இருக்கும் மிலான் அணிக்கு அழுத்தம் கொடுக்கும் எண்ணத்தில் யுவன்டஸ் அணி களம் இறங்கியது.

அட்டகாசமாக துவங்கிய யுவன்டஸ் அணிக்கு ஆட்டத்தின் பத்தாவது நிமிடத்தில் குவாட்ராடோ கொடுத்த கார்னர் கிக்கை ரொனால்டோ கோல் அடித்து முன்னிலை பெறச் செய்தார். யுவன்டஸ் அணி ஆட்டத்தில் முற்றிலுமாக ஆதிக்கம் செலுத்தியது காக்லியாரி அணி தடுப்பு ஆட்டத்தில் மட்டுமே கவனம் செலுத்தும் அளவிற்கு யுவன்டஸ் அணி தாக்குதல் ஆட்டத்தில் ஈடுபட்டு காக்லியாரி அணியின் தடுப்பு ஆட்டத்திற்கு தலைவலியாக அமைந்தனர்.

ஆட்டத்தின் 23வது நிமிடத்தில் மொராட்டா தனக்கு கிடைத்த அருமையான வாய்ப்பை நழுவவிட்டார். தொடர்ந்து ஆதிக்கம் செலுத்திய யுவன்டஸ் அணிக்கு ஆட்டத்தின் 26-வது நிமிடத்தில் பெனால்டி கிடைக்க அதை ரொனால்டோ கோலாக மாற்றி அணியை இரண்டு கோல் முன்னிலை பெறச் செய்தார்.

இதனால் காக்லியாரி அணி உடனடியாக கோல் அடிக்க வேண்டும் என்ற எண்ணத்தை நடத்திய தாக்குதலுக்கு கவுண்டர் அட்டாக் செய்த யுவன்டஸ் அணியின் ரொனால்டோ ஹாட்ரிக் அடித்து அசத்தினார். முதல் பாதியை முற்றிலுமாக ஆதிக்கம் செலுத்திய யுவன்டஸ் அணி முதல் பாதியின் முடிவில் 3-0 என்ற கோல் கணக்கில் முன்னிலை பெற்றது.

இரண்டாம் பாதியில் யுவன்டஸ் மணி தடுப்பு ஆட்டத்தில் கவனம் செலுத்தத் தொடங்கியது. காக்லியாரி அணி இதை சாதகமாக எடுத்துக் கொண்டு தாக்குதல் ஆட்டத்தில் ஈடுபட்டது, காக்லியாரி அணியின் தாக்குதலுக்கு கவுண்டர் அட்டாக் செய்ய பல முயற்சிகள் எடுத்த யுவன்டஸ் அணி சிறப்பாக செயல்படாததால் அவர்களுக்கு கோல் எதுவும் கிடைக்கவில்லை.

ஆட்டத்தின் 57வது நிமிடத்தில் யுவன்டஸ் அணியின் கோல் கீப்பர் செஸ்னி இரண்டு முறை பாய்ந்து பந்தை தட்டி விட்டார். காக்லியாரி நடத்திய தாக்குதல்களுக்கு ஆட்டத்தின் 62 ஆவது நிமிடத்தில் சப்பா கொடுத்த கிராஸ்சை சிமியோனே கோல் அடித்து ஆட்டத்தை சூடுபிடிக்க செய்தார்.

காக்லியாரி அணி நடத்திய தாக்குதல்களுக்கு தொடர்ந்து யுவன்டஸ் அணி கவுண்டர் அட்டாக் செய்து வந்தது. ஆட்டத்தின் 75வது நிமிடத்தில் ரொனால்டோ கொடுத்த பாசை ரபியாட் தவறவிட்டார்.

ஆட்டத்தின் இறுதி நிமிடத்தில் கவுண்டர் அட்டாக் செய்த யுவன்டஸ் அணியின் நட்சத்திர வீரர் ரொனால்டோ அடித்த பந்தை காக்லியாரி அணியின் கோல் கீப்பர் கிராக்னோ அட்டகாசமாக தடுத்து, கவுண்டர் அட்டாக்கை செயலிழக்கச் செய்தார். ஆட்டத்தின் இறுதியில் யுவன்டஸ் அணி 3-1 என்ற கோல் கணக்கில் வெற்றி பெற்றது.

இந்த வெற்றியின் மூலம் இரண்டாம் இடத்தில் இருக்கும் மிலான் அணியை விட ஒரு புள்ளி மட்டுமே பின்தங்கி மூன்றாம் இடத்தில் நீடிக்கிறது யுவன்டஸ்