பழி தீர்த்தது ஆர்சனல்: டோட்டன்ஹாம் அணியின் வெற்றி ஓட்டம் முடிவு!

இங்கிலாந்து நாட்டில் நடைபெற்று வரும் பிரீமியர் லீக் போட்டியில் புள்ளி பட்டியல் 10வது இடத்தில் இருக்கும் ஆர்சனல் அணியும் ஏழாவது இடத்தில் இருக்கும் டோட்டன்ஹாம் அணியும் மோதின.

இவ்விரண்டு அணிகள் மோதிய முதல் ஆட்டத்தில் டோட்டன்ஹாம் அணி 2-0 என்ற கோல் கணக்கில் வெற்றி பெற்றது. சீசனின் துவக்கத்தில் சிறப்பான ஆட்டத்தை வெளிப்படுத்தி வந்த டோட்டன்ஹாம் அணி இடையில் தொடர்ந்து தோல்வியை தழுவியது.

அதிலிருந்து மீண்டு வந்த டோட்டன்ஹாம் அணியினர் தற்பொழுது கடந்த 5 ஆட்டங்களில் தொடர்ந்து வெற்றியை பதிவு செய்துள்ளது மேலும் கடந்த 5 ஆட்டங்களில் 15 கோல் பதிவு செய்து சிறப்பான ஆட்டத்தை வெளிப்படுத்தி வருகிறது.

ஆர்சனல் அணி மறுமுனையில் தாக்குதல் ஆட்டத்தில் சிறப்பாக செயல்பட்ட போதிலும் தடுப்பு ஆட்டத்தில் கோட்டை விடுகின்றது, கடந்த 9 ஆட்டங்களில் ஒவ்வொரு ஆட்டங்களிலும் குறைந்தபட்சம் ஒரு கோல் கொடுத்திருப்பது குறிப்பிடத்தக்கது.

எனவே டோட்டன்ஹாம் அணி போன்ற கவுண்டர் அட்டாக் அணிகளுக்கு எதிராக ஆர்சனல் அணியின் தடுப்பு ஆட்டம் சிறப்பாக செயல்பட்டால் மட்டுமே ஆர்சனல் அணிக்கு வெற்றி கிடைக்கும்.

டோட்டன்ஹாம் அணி எப்பொழுதும் போல கடுமையான தடுப்பு ஆட்டத்தில் ஈடுபட்டு வந்தது, ஆர்சனல் அணி அதை மீறி வாய்ப்புகளை ஏற்படுத்த முற்பட்டது, பொதுவாக கடுமையான தடுப்பு ஆட்டத்தில் ஈடுபடும் அணிகளுக்கு எதிராக தாக்குதலில் ஈடுபடும் போது உள்ள கவனம் தடுப்பு ஆட்டத்தில் இல்லை என்றால் கவுண்டர் அட்டாக் மூலம் கோல் கொடுப்பதற்கு அதிக வாய்ப்புகள் உள்ளது.

எனவே ஆர்சனல் அணி தடுப்பு ஆட்டத்திலும் கவனம் செலுத்தி வந்தது. ஆட்டத்தின் 17 ஆவது நிமிடத்தில் ஆர்சனல் அணியின் ஸ்மித் ரோ சுழற்றி விட்ட பந்து கம்பத்தின் மேல் பட்டு வெளியேறியது. அதைத்தொடர்ந்து ஆட்டத்தின் 20வது நிமிடத்தில் டோட்டன்ஹாம் அணியின் நட்சத்திர வீரரான சன் காயம் காரணமாக வெளியேறினார்.

டோட்டன்ஹாம் அணியின் மிக முக்கியமான வீரரான அவர் கவுண்டர் அட்டாக் செய்வதில் கைதேர்ந்தவர், டோட்டன்ஹாம் அணியின் தாக்குதல்களின் மூலதனமாக இருக்கும் அவர் வெளியேறியது அணிக்கு பெரும் பின்னடைவாக அமைந்தது.

அவருக்கு பதிலாக களமிறக்கப்பட்ட லமெலா ஆட்டத்தின் 33 ஆவது நிமிடத்தில் லூகாஸ் கொடுத்த பாசை 'ரபோனா' முறையில் கோல் அடித்து அசத்தினார். ஒரு காலுக்கு பின்னால் மற்றொரு காலை வைத்து பந்தை அடிப்பதற்கு பெயர் ரபோனா என்று கூறுவர். முன்னிலை பெற்ற டோட்டன்ஹாம் அணிக்கு ஆர்சனல் அணியின் ஒடேகார்ட் ஆட்டத்தின் 44 ஆவது நிமிடத்தில் பதிலடி கொடுத்தார். டியர்ணி கொடுத்த கிராஸ்சை அவர் கோலாக மாற்றினார். இதனால் முதல் பாதி 1-1 என்ற கோல் கணக்கில் முடிவடைந்தது.

இரண்டாம் பாதியை சிறப்பாக தொடங்கிய ஆர்சனல் அணியின் லக்காசைட் ஆட்டத்தின் 56வது நிமிடத்தில் கோலை நோக்கி அடிக்க பந்து டோட்டன்ஹாம் அணியின் கோல் கீப்பர் லாரிஸ் கைகளுக்கு செல்ல அதை அவர் எளிதாக பிடித்தார்.

ஆட்டத்தில் 64வது நிமிடத்தில் லக்காசைடை தட்டி விட்டதர்க்காக சான்செஸ்ஸிர்க்கு மஞ்சள் அட்டை வழங்கப்பட்டு ஆர்சனல் அணிக்கு பெனால்டி வழங்கப்பட்டது, அதை லக்காசைட் கோலாக மாற்றி ஆர்சனல் அணியை முன்னிலை பெறச் செய்தார்.

முன்னிலை பெற்ற ஆர்சனல் அணி தடுப்பு ஆட்டத்தில் இறங்கியது. ஆட்டத்தின் 77-வது நிமிடத்தில் டோட்டன்ஹாம் அணியின் லமேலா சிவப்பு அட்டை வழங்கப்பட்டு வெளியேற்றப்பட்டார், இது டோட்டன்ஹாம் அணிக்கு பெரும் பின்னடைவாக அமைந்தது.

ஆட்டத்தின் 84வது நிமிடத்தில் லூகாஸ் கொடுத்த கிராஸ்சை கேன் தலையால் முட்டி கோல் அடிக்க ஆஃப் சைட் காரணமாக அது நிராகரிக்கப்பட்டது. தொடர்ந்து தாக்குதல் நடத்திய டோட்டன்ஹாம் அணிக்கு ஆட்டத்தின் கடைசி நிமிடத்தில் கேன் தனக்கு கிடைத்த ஃப்ரீகிக்கை ராக்கெட் வேகத்தில் கோலை நோக்கி அடித்தார் ஆனால் பந்து கம்பத்தின் மேல் பட்டு வெளியேறியது. இறுதியில் ஆர்சனல் அணி 2-1 என்ற கோல் கணக்கில் வெற்றி பெற்றது.

இந்த ஆட்டத்தில் தோல்வி அடைந்ததன் மூலம் ஐந்தாம் இடத்திற்கு முன்னேறும் வாய்ப்பை நழுவ விட்டது டோட்டன்ஹாம் அணி. மேலும் ஆர்சனல் அணி இந்த ஆட்டத்தில் வெற்றி பெற்றதன் மூலம் 10-வது இடத்தை தக்கவைத்துக் கொண்டது.