லெஸ்டர் சிட்டி அணி நடப்பு சீசனில் சிறப்பான ஆட்டத்தை வெளிப்படுத்தி வரும் காரணத்தால் இந்த ஆட்டத்தை அவர்கள் வெற்றி பெற்று அடுத்த சுற்றுக்கு முன்னேற வேண்டும் என்ற எண்ணத்தோடு களமிறங்கினர். மறுமுனையில் இரண்டு அணிகளும் மோதிய முதல் ஆட்டத்தில் சிறப்பான தடுப்பு ஆட்டத்தை வெளிப்படுத்தி ஆட்டத்தை டிரா செய்த ஸ்லாவியா பிராகா அணியும் இந்த ஆட்டத்தை வென்று அடுத்த சுற்றுக்கு முன்னேற வேண்டும் என்ற எண்ணத்தில் களமிறங்கினர்.
ஆட்டம் துவங்கிய முதல் ஐந்து நிமிடத்திற்குள் லெஸ்டர் சிட்டி அணி சார்பாக சொயன்சு மற்றும் உண்டர் ஆகியோர் தங்களுக்கு கிடைத்த வாய்ப்பை நழுவவிட்டனர். பொதுவாக கவுண்டர் அட்டாக் செய்து வெற்றி பெறும் லெஸ்டர் அணிக்கு எதிராக ஸ்லாவியா பிராகா கடுமையான தடுப்பு ஆட்டத்தை கையாண்டது லெஸ்டர் அணியின் தாக்குதல்களை சீர்குலைத்தது. லெஸ்டர் அணியின் உண்டர் ஸ்லாவியா பிராகா அணியின் தடுப்பு ஆட்டத்திற்கு பெரும் தலைவலியாக இருந்தார், அவரது வேகமும் பந்தை கடத்திச் செல்லும் திறனும் பலரை வியக்கச் செய்தது. லெஸ்டர் அணி சார்பாக அல்பிரைட்டன், என்டிடி, உண்டர் ஆகியோர் தொடர்ந்து பந்தை கோலைநோக்கி அடித்து வந்தனர் ஆனால் அவர்களுக்கு கோல் எதுவும் கிடைக்கவில்லை. முதல் பாதியில் ஸ்லாவியா பிராகா அணியின் சிறப்பான தடுப்பு ஆட்டத்தின் காரணமாக 0-0 என்ற கோல் கணக்கில் முதல் பாதி முடிந்தது.
இரண்டாம் பாதி துவங்கிய மூன்றாவது நிமிடத்தில் ஸ்லாவியா பிராகா அணியின் ஸ்டன்சியு கொடுத்த கிராஸ்சை பிரோவோட் கோலாக மாற்ற ஸ்லாவியா பிராகா முன்னிலை பெற்றது. முதல்பாதியில் கோல் அடிக்க முடியாமல் தவித்து வந்த லெஸ்டர் அணி தற்பொழுது இரண்டாம்பாதியில் இரண்டு கோல் அடித்தால் மட்டுமே அடுத்த சுற்றுக்கு முன்னேற முடியும் என்ற நிலை ஏற்பட்டது. இதனால் லெஸ்டர் அணி தாக்குதல் ஆட்டத்தில் ஈடுபடத் தொடங்கியது, அணியின் உண்டர், வார்டி, பார்ன்ஸ் என அனைத்து முன்கள வீரர்களும் கோலை நோக்கி அடித்த பந்துகள் அனைத்தும் தவறிசென்றது.
ஸ்லாவியா பிராகா அணியின் தடுப்பு ஆட்டம் லெஸ்டர் அணி தாக்குதல் நடத்துவதற்கு சற்றும் இடம் தராமல் சிறப்பாக செயல்பட்டனர். கடுமையான தடுப்பு ஆட்டத்தில் இருந்து திடீரென ஸ்லாவியா பிராகா தாக்குதல் நடத்த ஆட்டத்தின் 78-வது நிமிடத்தில் சிமா ஸ்லாவியா பிராகா அணியின் இரண்டாவது கோலை பதிவு செய்து வெற்றிப் பாதைக்கு அழைத்துச் சென்றார்.
லெஸ்டர் சிட்டி அணி இந்த ஆட்டத்தில் தோல்வி அடைந்ததன் மூலம் யூரோப்பா லீகில் இருந்து வெளியேறியுள்ளது. மேலும் ஸ்லாவியா பிராகா 2000ஆவது ஆண்டிற்கு பின் முதன் முறையாக இங்கிலாந்து நாட்டை சேர்ந்த அணியை வீழ்த்துகிறது. ஸ்லாவியா பிராகா அணி அனைவரின் எதிர்பார்ப்புகளையும் துவம்சம் செய்து வெற்றியை பதிவு செய்து அடுத்த சுற்றுக்கு முன்னேறியுள்ளது.
Mobile AppDownload Get Updated News