அபாமயெங் ஹாட்ரிக்: ஆர்சனல் அணி அபார வெற்றி

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று அதிகாலை நடந்து முடிந்த ஆட்டத்தில் புள்ளி பட்டியலில் பத்தாமிடத்தில் இருக்கும் லீட்ஸ் யுனைடெட் அணியும் பதினோராவது இடத்தில் இருக்கும் ஆர்சனல் அணியும் மோதின.

இந்த ஆட்டத்தை ஆர்சனல் அணி வெல்லும் பட்சத்தில் லீட்ஸ் யுனைடெட் அணியை பின்னுக்கு தள்ளி 10ஆம் இடத்தைப் பிடிக்கும். அதுபோல லீட்ஸ் யுனைடெட் அணி வெல்லும்பட்சத்தில் டோட்டன்ஹாம் அணிக்கு அழுத்தம் கொடுக்க முடியும், மேலும் ஆர்சனல் அணியிடம் இருந்து நான்கு புள்ளிகள் முன்னிலை பெற முடியும்.


இவ்விரண்டு அணிகள் மோதிய முதல் ஆட்டம் கோலின்றி டிரா ஆனது. ஆர்சனல் அணி ஆடிய கடந்த 5 ஆண்டுகளில் மூன்று தோல்விகளை பதிவு செய்துள்ளது, மேலும் கடந்த 2 ஆட்டங்களில் தொடர்ச்சியாக தோல்வி அடைந்துள்ளது, எனவே மீண்டும் வெற்றி பாதைக்கு திரும்புவதற்கு லீட்ஸ் யுனைடெட் அணிக்கு எதிரான இந்த ஆட்டம் மிக முக்கியமான ஒன்றாக பார்க்கப்பட்டது. மறுமுனையில் லீட்ஸ் யுனைடெட் அணி கடந்த ஐந்து ஆண்டுகளில் மூன்று வெற்றிகளைப் பதிவு செய்து சிறப்பான ஆட்டத்தை வெளிப்படுத்தி வருகிறது. இந்த ஆட்டத்தில் வெல்லும் அணி புள்ளி பட்டியலில் முதல் பாதிக்கும் முன்னேறும்.

ஆட்டம் துவங்கியதும் லீட்ஸ் யுனைடெட் அணி தாக்குதல் நடத்தியது. அணியின் ஸ்டிக்கர் பம்ஃபோர்ட் தலையால் முட்டி கோல் பக்கமாக பந்தை திருப்பி விட்டார். ஆனால் ஆர்சனல் அணியின் கோல்கீப்பர் லெனோ அதை எளிதாக பிடித்துவிட்டார். அதைத் தொடர்ந்து ஆர்சனல் அணி நடத்திய தாக்குதலில் அணியின் நட்சத்திர வீரர் அபாமயெங் கோல் அடித்து ஆர்சனல் அணி முன்னிலை பெறச் செய்தார்.

லீட்ஸ் யுனைடெட் அணி கடுமையான தாக்குதல் ஆட்டத்திற்கு பேர் போனவர்கள், ஆனால் ஆர்சனல் அணியின் சிறப்பான தடுப்பு ஆட்டத்தினால் லீட்ஸ் யுனைடெட் அணியினர் தாக்குதல் நடத்த திணறி வந்தனர். ஆட்டத்தின் 27-வது நிமிடத்தில் லீட்ஸ் யுனைடெட் அணியின் ரஃபின்யா ஆர்சனல் வீரர்களை தாண்டி பந்தை கடத்திச்சென்று ஹாரிசன்னிர்க்கு பாஸ் செய்ய அவர் அதை லெனோவின் கால்களுக்கு நேராக அடித்துவிட்டார்.


ஆட்டத்தின் 36ஆவது நிமிடத்தில் ஆர்சனல் அணிக்கு பெனால்டி கிடைத்தது. ஆனால் மறுபரிசீலனை செய்த பின்பு பெனால்டி திரும்ப பெறப்பட்டது. கண்ணிமைக்கும் நேரத்தில் ஆர்சனல் அணிக்கு மீண்டும் ஒரு பெனால்டி கிடைக்க அதை அபாமயெங் கோலாக மாற்றினார். முதல் பாதியிலேயே ஆட்டத்தை முடித்து விட வேண்டும் என்ற எண்ணத்தோடு மீண்டும் தாக்குதல் நடத்திய ஆர்சனல் அணிக்கு பெல்லரின் மூன்றாவது கோல் அடித்து முதல்பாதியில் 3-0 என்ற கோல் கணக்கில் முன்னிலை பெற்று முடித்தது.

முதல் பாதியை விட்ட இடத்திலிருந்தே இரண்டாம் பாதியை ஆர்சனல் அணி தொடங்கியது. ஆட்டத்தின் 47ஆவது நிமிடத்தில் அபாமயெங் தலையால் முட்டி கோல் அடிக்க, நான்கு கோல் முன்னிலை பெற்றது ஆர்சனல் அணி. ஆர்சனல் அணி ஆட்டத்தில் சற்று நிதானம் காட்டியது. லீட்ஸ் யுனைடெட் அணியின் தாக்குதலில் சுற்று வேகத்தைக் கூட்டியது. அதன் பலனாக ஆட்டத்தின் 58-வது நிமிடத்தில் ஸ்ட்ரவுக் தலையால் முட்டி கோல் அடித்தார்.

தொடர்ந்து தாக்குதல் நடத்திய லீட்ஸ் யுனைடெட் அணிக்கு கோஸ்ட்டா 70ஆவது நிமிடத்தில் இரண்டாவது கோலை பதிவு செய்தார். லீட்ஸ் யுனைடெட் அணி மீண்டும் ஆட்டத்தில் பரபரப்பை ஏற்படுத்தியது. ஆனால் அதன் பின்னர் ஆர்சனல் அணி தொடர்ந்து கவுண்டர் அட்டாக்கில் ஈடுபட்டனர். ஆனால் இரு அணியினருக்கும் கோல் எதுவும் கிடைக்காத காரணத்தால் இறுதியில் 4-2 என்ற கோல் கணக்கில் ஆர்சனல் அணி வெற்றி பெற்றது.

இந்த வெற்றியின் மூலம் லீட்ஸ் யுனைடெட் அணியை பின்னுக்குத்தள்ளி ஆர்சனல் அணி 10வது இடத்தை பிடித்தது. லீட்ஸ் யுனைடெட் அணிக்கு மேலும் ஒரு ஆட்டம் எஞ்சியுள்ள நிலையில் அதை வெற்றிபெறும் பட்சத்தில் மீண்டும் பத்தாவது இடத்திற்கு முன்னேறலாம். அபாமயெங் இந்த ஆட்டத்தில் ஹாட்ரிக் அடித்ததன் மூலம் பிரீமியர் லீக்கில் தனது முதல் ஹாட்ரிக்கை பதிவு செய்தார்.