மீண்டும் நார்த் ஈஸ்ட் அணியிடம் வீழ்ந்தது மும்பை!

இந்தியன் சூப்பர் லீக் தொடரின் 76வது ஆட்டத்தில் இன்று மும்பை அணியும் நார்த் ஈஸ்ட் அணியும் மோதின. இவ்விரு அணிகளும் மோதிய முதல் ஆட்டத்தில் நார்த் ஈஸ்ட் அணி 1-0 என்ற கோல் கணக்கில் வெற்றி பெற்றது. முதல் ஆட்டத்தில் தோல்வி அடைந்த மும்பை அணி அதன்பின் ஆடிய 12 ஆட்டங்களில் தோல்வி அடையாமல் ஒன்பது வெற்றிகளை பதிவு செய்து புள்ளி பட்டியலில் முதலிடத்தில் இருக்கின்றது. சீசனில் முதல் ஆட்டத்தில் தோல்வியடைந்த மும்பை அணிக்கு பழிவாங்குவதற்கு சரியான தருணம். அதேபோல நார்த் ஈஸ்ட் அணி முன்னாள் மேலாளர் ஆன ஜெரார்ட் நஸ்ஸை பணிநீக்கம் செய்ததிலிருந்து ஆடிய இரண்டு ஆட்டங்களிலும் வெற்றி பெற்றுள்ளது. மேலும் இந்த ஆட்டத்தில் வெற்றி பெறும் பட்சத்தில் பிளே ஆஃப் ஸ்பாட்டுக்கு முன்னேறும்.

ஆட்டத்தில் வெற்றி என்பது இரு அணிகளுக்கும் முக்கியமான ஒன்றாக இருக்கும். குறிப்பாக முதல் ஆட்டத்தில் தோல்வி அடைந்ததற்காக பழி வாங்க வேண்டும் என்ற எண்ணத்தோடு ஒரு அணியும், இதில் வெற்றி பெறும் பட்சத்தில் பிளே ஆஃப் ஸ்பாட்டிற்கு முன்னேறி விடலாம் என்று மற்றொரு அணியும் களமிறங்கியது. முதல் ஆட்டத்திற்கு பழி வாங்க வேண்டும் என்ற எண்ணத்தோடு களமிறங்கிய மும்பை அணிக்கு ஆரம்பமே அதிர்ச்சியாக அமைந்தது. ஆட்டத்தின் ஆறாவது நிமிடத்தில் நிம் டார்ஜி கொடுத்த பாசை கோலாக மாற்றினார் நார்த் ஈஸ்ட் அணியின் ஸ்ட்ரைக்கர் பிரவுன்.


ஆட்டத்தின் துவக்கம் சிறப்பானதாக அமைய சற்றும் வேகத்தைக் குறைத்துக் கொள்ளாத நார்த் ஈஸ்ட் அணிக்கு ஒன்பதாவது நிமிடத்தில் மீண்டும் ஒரு கோல் கிடைத்தது. இம்முறை நார்த் ஈஸ்ட் அணியின் நட்சத்திர வீரரான மச்சாடோ கொடுத்த பாசை பிரவுன் மீண்டும் கோலாக மாற்றினார். ஆட்டத்தின் துவக்கத்திலேயே இரண்டு கோல் முன்னிலை பெற்ற நார்த் ஈஸ்ட் அணி அதன்பின் தடுப்பு ஆட்டத்தில் ஈடுபடத் தொடங்கியது. ஆனாலும் முற்றிலுமாக தடுப்பு ஆட்டத்தை சாராமல் மும்பை அணிக்கு அவ்வப்போது அதிர்ச்சி அளிக்கும் விதமாக கவுண்டர் அட்டாக் செய்து வந்தனர்.

தடுப்பு ஆட்டத்தில் சிறப்பாக செயல்பட்டதால் மும்பை அணியினரால் பெரிய அளவில் வாய்ப்புகளை ஏற்படுத்த முடியவில்லை. இருப்பினும் நார்த் ஈஸ்ட் அணியின் தடுப்பு ஆட்டத்தை மீறி மும்பை அணியின் ஸ்ட்ரைக்கரான ஒக்பேசிக்கு பலமுறை வாய்ப்புகள் அமைத்து தரப்பட்டும் அவர் அவைகளை தவறவிட்டார். கிடைத்த வாய்ப்புகளை தவறவிட்ட காரணத்தால் முதல் பாதி 2-0 என்ற கோல் கணக்கில் முடிந்தது. இரண்டாம் பாதி துவங்கியதிலிருந்து ஆட்டத்தை முடிந்த அளவிற்கு மெதுவாக எடுத்துச் சென்றனர். நார்த் ஈஸ்ட் அணியினர், மறுமுனையில் மும்பை அணியினர் தொடர்ச்சியாக கடும் தாக்குதலில் ஈடுபட்டு வந்தனர்.

முதல் பாதியில் தடுப்பு ஆட்டத்தில் ஈடுபட்டு வந்த நார்த் ஈஸ்ட் அணியினர் இரண்டாம் பாதியில் முற்றிலுமாக தடுப்பு ஆட்டத்தில் இறங்கினர். இதனால் மும்பை அணியினர் பந்தை அதிக நேரம் தங்கள் வசம் வைத்துக் கொண்டாலும் அவர்களால் பெரிய அளவில் வாய்ப்புகளை ஏற்படுத்த முடியவில்லை. அதை மீறி ஏற்படுத்திய வாய்ப்புகளையும் தொடர்ந்து கோட்டை விட்டு வந்தனர். ஆட்டத்தின் 84 வது நிமிடத்தில் மும்பையின் ஒக்பேசி கொடுத்த பாசை லெ ஃபாண்ட்ரே கோலாக மாற்றி மும்பை அணிக்கு நம்பிக்கையை மீட்டுத் தந்தார்.


ஆனால் நார்த் ஈஸ்ட் அணியின் தடுப்பு ஆட்டத்தை மீறி அவர்களால் கோல் அடிக்க முடியவில்லை. ஆட்டத்தின் துவக்கத்திலேயே மும்பை அணி செய்த தவறுகளை சரியாக கண்டறிந்து அதை கோலாக மாற்றிய நார்த் ஈஸ்ட் அணி 2-1 இந்த கோல் கணக்கில் வெற்றி பெற்றது. இந்த வெற்றியின் மூலம் புள்ளி பட்டியலில் 4வது இடத்திற்கு முன்னேறியது. லீக் போட்டியில் இன்னும் ஆறு ஆட்டங்கள் மட்டுமே எஞ்சியுள்ள நிலையில் நார்த் ஈஸ்ட் அணி பிளே ஆஃப் கதவை தட்ட துவங்கியுள்ளது.