மோட்டோ ஜீபி அட்டவணையில் மாற்றம்!

மார்ச் மாதம் 2021ஆம் ஆண்டிற்கான மோட்டோ ஜீபி சீசன் துவங்கவிருக்கிறது. இந்நிலையில் ஏப்ரல் மாதம் 11ஆம் தேதி நடக்கவிருந்த அர்ஜென்டினா ஜிபி ஒத்திவைக்கப்பட்டுள்ளது, மட்டுமல்லாமல் ஏப்ரல் மாதம் 18ஆம் தேதி நடக்கவிருந்த அமெரிக்கன் ஜீபியும் ஒத்திவைக்கப்பட்டுள்ளது.

இவ்விரு போட்டிகளும் எப்பொழுது நடைபெறும் என்பது விரைவில் அறிவிக்கப்படும் என்றும் புதிதாக ஏப்ரல் மாதம் 4ஆம் தேதி தோஹாவில் ஒரு போட்டியும், ஏப்ரல் மாதம் 18ஆம் தேதி அமெரிக்காவிற்கு பதிலாக போர்ச்சுகல் நாட்டில் நடைபெறும் என்றும் அறிவிக்கப்பட்டுள்ளது.

சென்ற ஆண்டு பெரிய அளவில் போட்டி இன்றி தனது முதல் சாம்பியன்ஷிப் வென்ற யோஹன் மிர் இந்த ஆண்டும் சாம்பியன்ஷிப்பை நோக்கி தனது பயணத்தை தொடருவார். 2019ஆம் ஆண்டு சாம்பியன்ஷிப் வென்ற மார்க் மார்க்கஸ் 2020ஆம் ஆண்டு காயம் காரணமாக விலகினார், 2021ஆம் ஆண்டு துவக்கத்தில் சில போட்டிகளில் பங்கேற்பது சந்தேகமே. மோட்டோ ஜீபியின் ஜாம்பவான் வாலண்டைனோ ரோசி சென்ற ஆண்டு 7 போட்டிகள் மட்டுமே முழுதாக ஓட்டி முடித்தார்.

5 முறை பாதியில் வெளியேறினார் மேலும் இரண்டு போட்டிகளில் அவர் பங்கேற்கவே இல்லை, இதனால் சென்ற ஆண்டு முதல் முறையாக அவர் 100 புள்ளிகளுக்கும் குறைவாக வென்றார். மேலும் கடந்த மூன்று ஆண்டுகளாக ஒரு வெற்றிகூட பதிவு செய்யாமல் இருப்பது அவர் ரசிகர்களை ஏமாற்றம் அடயச்செய்தது. இந்த ஆண்டு மோட்டோ ஜீபியை பலர் ஆவலுடன் எதிர்பார்த்து காத்திருக்கின்றனர்.

மேலும் மின்சார மோட்டார் பைக்கிற்கான போட்டிகள் ஸ்பெயின், பிரான்ஸ், காட்டல்லுன்யா, நெதர்லாந்து, ஆஸ்திரியா மற்றும் சான் மரினோ ஆகிய இடங்களில், மோட்டோ ஜீபி நடைபெறும் அன்றே நடைபெறும் என்று அறிவிக்கப்பட்டுள்ளது. 2019 ஆம் ஆண்டு துவங்கப்பட்ட மின்சார மோட்டார் பைக்கிற்கான மோட்டோ ஈ (Moto E), தொடர்ச்சியாக மக்களிடையே நல்ல வரவேற்பை பெற்றுள்ளது.