உலகக்கோப்பை கபடி: கொரியா, தாய்லாந்து அணிகள் வெற்றி

அகமதாபாத்: உலகக்கோப்பை கபடி போட்டியில் இன்று நடைபெற்ற ஆட்டங்களில் கொரியா, தாய்லாந்து அணிகள் வெற்றி பெற்றன.

குஜராத் மாநிலம் அகமதாபாத்தில் 3வது உலகக்கோப்பை கபடி போட்டிகள் நடைபெற்று வருகின்றன. இதில் கொரிய குடியரசு மற்றும் வங்கதேச அணிகள் மோதின. முதல் 10 நிமிடங்களில் வங்கதேசத்திற்கு சாதகமாக இருந்தது. ஆனால் அடுத்த 10 நிமிடங்கள் ஆட்டம் கொரியாவின் பக்கம் சாய்ந்தது. இதையடுத்து முதல் பாதியில் 15-15 என இரு அணிகளும் சமநிலை பெற்றன.

2வது பாதியில் இரு அணிகளும் கடுமையாக போராடின. இறுதியில் 35-32 என்ற புள்ளிகள் கணக்கில் கொரியா அணி வெற்றி பெற்றது. இதில் கொரிய அணியின் ஜாங் குன்லி சிறப்பாக விளையாடி அணிக்கு 15 புள்ளிகள் பெற்று தந்தார். மற்றொரு ஆட்டத்தில் தாய்லாந்து, கென்யா அணிகள் மோதின.

இதில் 53-21 என்ற புள்ளிகள் கணக்கில் தாய்லாந்து அணி அபார வெற்றி பெற்றது. சிறப்பாக விளையாடிய தாய்லாந்து அணியின் கேப்டன் 14 புள்ளிகள் பெற்றுத் தந்தார். இதன்மூலம் பி பிரிவில் இடம்பெற்றுள்ள தாய்லாந்து அணி, 10 புள்ளிகளுடன் 3வது இடத்தில் உள்ளது.

Kabaddi World Cup 2016: Republic of Korea comeback stuns Bangladesh, Thailand crush Kenya.