நான்காம் சுற்றில் செல்சீ, மான்செஸ்டர் சிட்டி: எதிரணிகள் சிதறல்!

இங்கிலாந்தில் வெவ்வேறு பகுதிகளில் எஃப்.ஏ கப் நடைபெற்று வருகிறது. இந்நிலையில் இன்று ஸ்டான்போர்ட் பிரிட்ஜ் மைதானத்தில் செல்சீ அணியுடன் நான்காம் நிலை அணியான மொர்காம்பே மோதியது.

சிறிய அணி என்பதால் இரண்டாம் நிலை வீரர்களை களமிறக்குவார் லாம்பர்ட் என்று எதிர்பார்த்த நிலையில் முழு சக்தியுடன் வீரர்களை களமிறக்கினார். கடந்த ஏழு ஆட்டத்தில் ஒரே ஒரு வெற்றியை மட்டும் பதிவு செய்திருந்த செல்சீ அணிக்கு இது நிச்சயம் வெற்றி பெறவேண்டிய ஆட்டமாக அமைந்தது.

ஆட்டத்தின் முதல் நிமிடத்திலிருந்து ஆதிக்கம் செலுத்திய செல்சீ அணிக்கு 18ஆவது நிமிடத்தில் ஒரு கோல் கிடைத்தது. ஹட்சன் ஒடாய் கொடுத்த பந்தை மேசன் மௌண்ட் கோலாக மாற்றினார். தொடர்ந்து செல்சீ அணி வாய்ப்புகளை உருவாக்கியும் அதை கோலாக மாற்ற முடியாமல் போனது, குறிப்பாக ருடிகெர் ஏற்படுத்திக் கொடுத்த அருமையான வாய்ப்பை டிமோ வெர்னர் விட்டது அனைவருக்கும் பெரும் அதிர்ச்சியை ஏற்படுத்தியது. இருந்தும் மனதை தளரவிடாத வெர்னர் 44வது நிமிடத்தில் ஒரு கோல் அடிக்க ஆட்டத்தின் முதல் பாதி 2-0 என்ற கோல் கணக்கில் முடிந்தது.

இரண்டாம் பாதி துவங்கியதும் சியேக் கொடுத்த பாசை ஹட்சன் ஒடாய் அருமையாக கோல் அடித்தார். ஆட்டம் முழுவதும் ஆதிக்கம் செலுத்திய செல்சீ அணிக்கு 85ஆவது நிமிடத்தில் அடுத்த கோல் ஹாவேர்ட்ஸ் மூலம் கிடைத்தது. 4-0 என்ற கோல் கணக்கில் எளிதாக வெற்றி பெற்றது.

மற்றொரு ஆட்டத்தில் பிர்மிங்காம் சிட்டி அணியும் மான்செஸ்டர் சிட்டி அணியும் மோதின. பலர் எதிர்பார்த்ததை போல மான்செஸ்டர் சிட்டி அணி ஆதிக்கம் செலுத்தி வெற்றி பெற்றது. அதிரடியாக தொடங்கிய மான்செஸ்டர் சிட்டி 33 நிமிடத்தில் மூன்று கோல் அடித்து அசத்தியது. நடுகள வீரர் பெர்னார்டோ சில்வா இரண்டு கோல் அடிக்க, இளம் வீரர் ஃபோடென் மற்றொரு கோல் அடிக்க 3-0 என்ற கோல் கணக்கில் மான்செஸ்டர் சிட்டி வெற்றி பெற்று நான்காம் சுற்றுக்கு முன்னேறியது.