யுஎஸ் ஓபன்: காயத்தால் ஜோகோவிச் விலகல்: பெடரர், செரினா அசத்தல் வெற்றி!

கிராண்ட்ஸ்லாம் டென்னிஸ் தொடரில் ஒன்றான யு.எஸ் ஓபன் டென்னிஸ் தொடர் அமெரிக்காவின் நியூயார்க் நகரில் நடக்கிறது. இதன் ஆண்கள் ஒற்றையர் பிரிவு நான்காவது சுற்றில் உலகின் ‘நம்பர்-1’ வீரரான செர்பியாவின் நோவாக் ஜோகோவிச், சுவிட்சர்லாந்தின் வாவ்ரின்காவை எதிர் கொண்டார்.

வாவ்ரின்கா ஆதிக்கம்:
இதில் துவக்கம் முதல் வாவ்ரின்காவின் ஆதிக்கம் செலுத்தினார். இதன் முதல் செட்டை வாவ்ரின்கா 6-4 என கைப்பற்றினார். தொடர்ந்து நடந்த இரண்டாவது செட்டிலும் மிரட்டிய வாவ்ரின்கா, 7-5 என வென்றார்.


காயம்....
மூன்றாவது செட்டிலும் வாவ்ரின்கா 2-1 என முன்னிலையில் இருந்தார். அப்போது தோள்பட்டை காயத்தால் ஜோகோவிச் அவதிப்பட்டார். இதற்காக சிறிது நேரம் சிகிச்சை எடுத்துக்கொண்ட ஜோகோவிச், தொடர்ந்து வலியால் அவதிப்பட்டதால், விலகுவதாக அறிவித்தார். இதையடுத்து வாவ்ரின்கா, காலிறுதிக்கு முன்னேறினார்.


பெடரர் அபாரம்:
மற்றொரு ஆண்கள் ஒற்றையர் பிரிவு நான்காவது சுற்றில் சுவிட்சர்லாந்தின் ரோஜர் பெடரர், பெல்ஜியமின் டேவிட் காபினை, 6-2, 6-2, 6-0 என்ற செட்களில் வீழ்த்தி காலிறுதிக்குள் நுழைந்தார்.


செரினாவும் காயம்:
இதே போல பெண்கள் ஒற்றையர் பிரிவு நான்காவது சுற்றில் அமெரிக்காவின் செரினா வில்லியம்ஸ், குரோசியாவின் பெட்ரா மார்டிக்கை 6 - 3, 6-4 என்ற செட்களில் வென்று காலிறுதிக்குள் நுழைந்தார்.


ஆனால் இப்போட்டியின் போது செரினா வில்லியம்ஸ் கணுக்காலில் காயம் ஏற்பட்டது. இது கடந்த காலத்தில் ஏற்பட்ட அளவு பாதிப்பை ஏற்படுத்தாது என நினைப்பதாக, செரினா தெரிவித்துள்ளார்.