France vs South Korea: பெண்கள் உலகக்கோப்பை: பிரான்ஸ் வெற்றி துவக்கம்!

பாரீஸ்: தென் கொரியாவுக்கு எதிரான பெண்கள் உலகக்கோப்பை கால்பந்து தொடரின் முதல் போட்டியில் பிரான்ஸ் அணி 4-0 என்ற கோல் கணக்கில் வெற்றி பெற்றது.

பிரான்சு தலைநகர் பாரிஸில் பெண்கள் உலகக் கோப்பை கால்பந்து தொடர் நடக்கிறது. இதில் 24 நாடுகள் பங்கேற்றுள்ளது. முதல் முறையாக சிலி, ஸ்காட்லாந்து, தென் ஆப்பிரிக்கா ஜமைக்கா அணிகள் பங்கேற்கிறது.

நாக் அவுட் சுற்று:
இத்தொடர் 24 அணிகள் 6 பிரிவுகளாக பிரிக்கப்பட்டு லீக் சுற்றில் பங்கேற்கின்றன. இதன் முடிவில் எல்லா பிரிவுகளில் இருந்து முதல் இரண்டு இடங்கள் பிடிக்கும் அணிகள் நேரடியாக நாக் அவுட் போட்டிகளுக்கு முன்னேறும்.
மூன்றாவது அணிகளுக்கு வாய்ப்பு:
தவிர, 6 பிரிவுகளில் மூன்றாவது இடம்பிடித்த அணிகளில் ‘ரேங்கிங்’ அடிப்படையில் முதல் நான்கு இடம் பிடிக்கும் அணிகள் நாக் அவுட் சுற்றுக்கு முன்னேறும். இதன் ஃபைனல் வரும் ஜூலை 7ல் நடக்கிறது.
பிரான்ஸ் அசத்தல்:
இதன் முதல் போட்டியில் பிரான்ஸ் , தென் கொரியா அணிகள் மோதின. இதில் துவக்கம் முதல் பிரான்ஸ் அணியின் ஆதிக்கம் அதிகம் இருந்தது. இதில் பிரான்ஸ் அணி சார்பில் லே சோமர் (9வது நிமிடம்), ரெனார்டு (35, 45+2) 3 கோல்கள் அடித்தனர். இதற்கு முதல் பாதியில் தென் கொரிய அணியால் பதிலடி கொடுக்க முடியவில்லை.
பின் பரபரப்பாக நடந்த இரண்டாவது பாதியிலும் ஆதிக்கத்தை தொடர்ந்த பிரான்ஸ் அணிக்கு ஹென்ரி 85வது நிமித்தில் ஒரு கோல் அடித்தார். இதற்கு பதிலடி கொடுக்க முயன்ற தென் கொரிய அணியால் கடைசி வரை கோல் எதுவும் அடிக்க முடியவில்லை. இறுதியில் பிரான்ஸ் அணி, தென் கொரிய அணியை 4-0 என்ற கோல் கணக்கில் வீழ்த்தியது.