பிரெஞ்சு ஓபன்: 11 ஆண்டில் இல்லாத தோல்வியை சந்தித்த பெடரர்...: ஃபைனலில் நடால்!

பாரிஸ்: பிரெஞ்சு ஓபன் டென்னிஸ் தொடரின் அரையிறுதியில் ஸ்பெயினின் ரபெல் நடால், 12வது முறையாக ஃபைனலுக்கு முன்னேறினார்.

பிரான்ஸ் தலைநகர் பாரிசில் பிரெஞ்சு ஓபன் டென்னிஸ் தொடர் நடக்கிறது. இதன் ஆண்கள் ஒற்றையர் பிரிவு அரையிறுதியில் ஸ்பெயினின் ரபெல் நடால், சுவிட்சர்லாந்தின் ரோஜர் பெடரரை எதிர் கொண்டார்.
இதில் துவக்க முதல் ஆதிக்கம் செலுத்திய நடால் முதல் செட்டை 6–3 என வென்றார். தொடர்ந்து நடந்த இரண்டாவது செட்டிலும் அசத்திய நடால் 6–4 என கைப்பற்றினார். மீண்டும் ஆதிக்கம் செலுத்திய நடால் மூன்றாவது செட்டையும் 6-2 என தன்வசப்படுத்தினார்.

முடிவில், ஸ்பெயினின் ரபெல் நடால், சுவிட்சர்லாந்தின் ரோஜர் பெடரரை 6-3, 6-4, 6-2 என்ற நேர் செட்களில் வீழ்த்தி 12வது முறையாக ஃபைனலுக்கு தகுதி பெற்றார்.
11 ஆண்டில் மோசமான தோல்வி:
இந்த தோல்வியின் மூலம் கிராண்ட்ஸ்லாம் அரங்கில் சுமார் 11 ஆண்டுகளில் சந்திக்காத தோல்வியை சுவிட்சர்லாந்தின் ரோஜர் பெடரர் சந்தித்து, பிரெஞ்ச் ஓபன் டென்னிஸ் தொடரில் இருந்து வெளியேறினார்.
ஆஸ்லே பார்டி அசத்தல்:
இதே போல பெண்கள் ஒற்றையர் பிரிவு அரையிறுதியில் ஆஸ்திரேலியாவின் ஆஸ்லே பார்டி, அமெரிக்காவின் அன்சிமோவாவை 6-7(4), 6-3, 6-3 என்ற செட்களில் வீழ்த்தி ஃபைனலுக்கு முன்னேறினார்.
மற்றொரு பெண்கள் ஒற்றையர் பிரிவு அரையிறுதியில் செக் குடியரசின் மார்கெடா வான்ரோசோவா, பிரிட்டனின் ஜோஹானா கோண்டாவை 7-5 7-6(2) என விழ்த்தி ஃபைனலுக்கு தகுதி பெற்றார்.