சுதிர்மன் கோப்பை: சீனாவிடம் படுதோல்வியடைந்த இந்திய அணி!

நானிங்: சுதிர்மன் கோப்பை பேட்மிண்டன் தொடரில் இந்திய அணி, சீனாவிடம் படுதோல்வியை சந்தித்தது.

சீனாவின் நானிங்கில் 16வது சுதிர்மன் பேட்மிண்டன் கோப்பை தொடரில் இந்திய அணி வீரர்கள் சீன அணியை எதிர்கொண்டனர். இதில் முதலில் நடந்த கலப்பு இரட்டையர் பிரிவில் இந்தியாவின் சிகி ரெட்டி, பிரனாவ் சோப்ரா ஜோடி, சீனாவின் வாங் யீம், குவாங் ஜோடியிடம் 5-21, 11-21 என்ற செட்களில் வீழ்ந்தது.

தொடர்ந்து நடந்த ஆண்கள் ஒற்றையர் பிரிவில், இந்தியாவின் சமீர் வர்மா சென் லாங்கிடம் 17-21, 20-22 என்ற செட்களில் தோல்வியடைந்தார். பின் நடந்த பெண்கள் ஒற்றையர் பிரிவில் சாய்னா நேவல், சீனாவின் சென் யூசெபியிடம் 12-21, 17-21 என்ற செட்களில் போராடி தோற்றார்.

தொடர்ந்து நடந்த ஆண்கள் இரட்டையர் பிரிவில் இந்தியாவின் ராங்கி ரெட்டி, சிராக் செட்டி ஜோடி, சீனாவின் ஹான் செங்காய், ஜோகு ஹாவ்டாங் ஜோடியிடம் 21-18, 15-21, 17-21 என்ற செட்களில் போராடி தோல்வியை சந்தித்தது.
இறுதியாக நடந்த பெண்கள் இரட்டையர் பிரிவு போட்டியிலும் இந்தியாவின் அஷ்வினி பொண்ணப்பா, சிகி ரெட்டி ஜோடி தோல்வியடைந்தது. இதையடுத்து இந்திய அணி , சீனாவிடம் 0-5 என படுதோல்வியை சந்தித்தது.