ஐஎஸ்எல் 2018-19: தொடர் தோல்விகளை சந்திக்கும் சென்னை அணி, சோகத்தில் ரசிகர்கள்!!

ஐஎஸ்எல் கால்பந்து தொடரில், இன்று நடைபெற்ற போட்டியில், சென்னை அணி 3-1 என்ற கோல் கணக்கில் கோவா அணியிடம் தோல்வியடைந்துள்ளது.

ஐபிஎல் தொடரைப் போல, இந்தியாவில் கால்பந்து விளையாட்டிற்காக ஐஎஸ்எல் தொடர் நடைபெற்று வருகிறது. இதுவரை நடைபெற்ற 4 ஐஎஸ்எல் தொடர்களில் கொல்கத்தா அணி இருமுறையும், சென்னை அணி இருமுறையும் சாம்பியன் பட்டத்தை வென்றுள்ளன.

இதையடுத்து, 2018-19 ஆண்டு சீசனுக்கான ஐஎஸ்எல் கால்பந்து தொடர் கடந்த சில தினங்களுக்கு முன் தொடங்கியது. சென்னை, கொல்கத்தா, கோவா உள்ளிட்ட 10 அணிகள் இந்தத் தொடரில் பங்கேற்றுள்ளன.

இதில், இன்று நடைபெற்ற போட்டியில், நடப்புச் சாம்பியனான சென்னையின் எப்.சி அணியும் கோவா எப்.சி அணியும் மோதின. சென்னை ஜவஹர்லால் நேரு மைதானத்தில் நடைபெற்ற இப்போட்டியைக் காண, ரசிகர்கள் மைதானத்தில் குவிந்திருந்தனர்.

இதைத் தொடர்ந்து நடைபெற்ற ஆட்டத்தில், கோவா அணி ஆட்டத்தின் தொடக்கத்திலிருந்தே ஆதிக்கம் செலுத்தியது. ஆட்டத்தின் 12வது நிமிடத்தில் கோவா அணியின் எடு பெடியா அந்த அணியின் முதல் கோலை அடித்தார். இதன்பின், கோல் அடிக்க சென்னை அணிக்கு ஒரு சில வாய்ப்புகள் கிடைத்தும், அதை சென்னை அணி கோட்டை விட்டது. இதனால், ஆட்டத்தின் முதல் பாதி முடிவில் கோவா அணி 1-0 என்ற கோல் கணக்கில் முன்னிலை பெற்றது.
பின்னர் நடைபெற்ற இரண்டாவது பாதி ஆட்டத்தில் சென்னை அணியின் நிலைமை இன்னும் மோசமானது. ஆட்டத்தின் 53வது நிமிடத்தில் கோவா அணியின் பெர்ரன் கோரமினாஸ் ஒரு கோலும், 80வது நிமிடத்தில் மொர்தாடா ஃபால் ஒரு கோலும் அடித்தனர். இதனால் கோவா அணி 3-0 என்ற கோல் கணக்கில், ஏறத்தாழ வெற்றியை உறுதிசெய்தது.

இந்நிலையில், இரண்டாவது பாதியின் கூடுதல் நிமிடத்தில் எலி சாபியா சென்னை அணிக்காக ஆறுதல் கோல் ஒன்றை அடித்தார். இறுதியாக ஆட்ட நேர முடிவில் கோவா 3-1 என்ற கோல் கணக்கில் சென்னை அணியை எளிதாக வீழ்த்தியது. இதுவரை இரண்டு போட்டிகளில் விளையாடியுள்ள சென்னை அணி இரண்டு போட்டிகளிலும் படுதோல்வியடைந்து, புள்ளிகள் பட்டியலில் 9வது இடத்தில் உள்ளது.

சாம்பியன் அணியான சென்னை வெற்றி முடியாமல் தடுமாறுவது சென்னை அணி ரசிகர்களை மிகுந்த சோகத்திற்கு உள்ளாக்கியுள்ளது. இதையடுத்து, வரும் 18 ஆம் தேதி நடைபெறும் போட்டியில், சென்னை அணி நார்த்ஈஸ்ட் யுனைடெட் அணியை எதிர்கொள்கிறது.