ஆசிய விளையாட்டு: வெண்கலம் வென்றது மணிகா – சரத் இணை

ஆசிய விளையாட்டு டேபிள் டென்னிஸ் போட்டியில் கலப்பு இரட்டையர் பிரிவில் இந்தியாவின் மணிகா பத்ரா – சரத் கமல் இணை வெண்கலப் பதக்கம் வென்றுள்ளது.

18வது ஆசிய விளையாட்டு போட்டிகள் இந்தோனேஷியா நாட்டின் ஜகர்தா மற்றும் பால்ம்பேங் நகரங்களில் ஆகஸ்டு 18 முதல் செப்டம்பர் 2 வரை நடைபெறுகிறது.

இதில் இன்று நடைபெற்ற டேபிள் டென்னிஸ் கலப்பு இரட்டையர் பிரிவு அரையிறுதிப் போட்டியில் இந்தியா சார்பில் மணிகா பத்ரா – சரத் கமல் இணை பங்குபெற்றது.

இப்போட்டியில் இந்திய இணை 9-11, 5-11, 13-11, 4-11, 8-11 என்ற செட்களில் சீனாவின் இங்ஷா சன் - சூகி வாங்கின் இணையிடம் தோல்வியைத் தழுவியது. இந்த ஆட்டம் வெறும் 39 நிமிடங்களிலேயே முடிவுக்கு வந்துவிட்டது. இருப்பினும் இந்திய இணை வெண்கலப் பதக்கத்தைப் பெற்றுள்ளது.

ஏற்கெனவே அணிகளுக்கான டேபிள் டென்னிஸ் போட்டியில் இந்திய அணி வெண்கலம் வென்றது குறிப்பிடத்தக்கது.