அர்ஜெண்டினாவை அடுத்து போர்ச்சுக்கலும் போச்சு....: பிரான்சுடன் மோதும் உருகுவே!

சோச்சி: உருகுவே அணிக்கு எதிரான உலகக்கோப்பை தொடரின் நாக் அவுட் போட்டியில் போர்ச்சுகல் அணி தோல்வியடைந்து வெளியேறியது.

ரஷ்யாவில் 21-வது உலகக் கோப்பை கால்பந்து தொடர் நடக்கிறது. இதில் லீக் சுற்று போட்டிகள் முடிந்து, நாக் அவுட் சுற்று இன்று துவங்கியது. இதன் இரண்டாவது நாக் அவுட் போட்டியில் உருகுவே, போர்ச்சுகல் அணிகள் மோதின.

ஆரம்பமே அமர்களம்...
இந்நிலையில் இப்போட்டியின் துவக்கத்தில் உருகுவே அணி வீரர்கள் ஆதிக்கம் செலுத்தினர். இதில் போட்டியின் 7வது நிமிடத்தில் உருகுவே அணியின் கவானி முதல் கோல் அடித்தார். இதற்கு எவ்வளவு போராடியும் போர்ச்சுகல் அணி வீரர்களால் பதிலடி கொடுக்க முடியவில்லை.

இதையடுத்து முதல் பாதியின் முடிவில் உருகுவே அணி 1-0 என முன்னிலை பெற்றது.

பெப்பே பதிலடி....
இந்நிலையில் பரபரப்பாக துவங்கிய இரண்டாவது பாதியின் 55வது நிமிடத்தில் போர்ச்சுகல் வீரர் பெப்பே பதிலடி கொடுக்க, போட்டி 1-1 என சமநிலையை எட்டியது.

தொடர்ந்து 62வது நிமிடத்தில் உருகுவே வீரர் கவானி மீண்டும் ஒரு கோல் அடிக்க உருகுவே மீண்டும் முன்னிலை பெற்றது. இதற்கு கடைசி வரை போராடியும் போர்ச்சுகல் வீரர்களால் பதிலடி கொடுக்க முடியாததால், முடிவில், உருகுவே அணி 2-1 என்ற கோல் கணக்கில் வெற்றி பெற்றது.

மெஸ்சியின் அர்ஜெண்டினா அணியைப்போல நட்சத்திர வீரர் ரொனால்டோவின் போர்ச்சுகல் அணியும் உலகக்கோப்பை தொடரில் இருந்து வெளியேறி ஏமாற்றம் அளித்தது.