ரஷ்யாவில் 21-வது உலகக் கோப்பை கால்பந்து தொடர் நடக்கிறது. இதில் லீக் சுற்று போட்டிகள் முடிந்து, நாக் அவுட் சுற்று இன்று துவங்கியது. இதன் இரண்டாவது நாக் அவுட் போட்டியில் உருகுவே, போர்ச்சுகல் அணிகள் மோதின.
ஆரம்பமே அமர்களம்...
இந்நிலையில் இப்போட்டியின் துவக்கத்தில் உருகுவே அணி வீரர்கள் ஆதிக்கம் செலுத்தினர். இதில் போட்டியின் 7வது நிமிடத்தில் உருகுவே அணியின் கவானி முதல் கோல் அடித்தார். இதற்கு எவ்வளவு போராடியும் போர்ச்சுகல் அணி வீரர்களால் பதிலடி கொடுக்க முடியவில்லை.
இதையடுத்து முதல் பாதியின் முடிவில் உருகுவே அணி 1-0 என முன்னிலை பெற்றது.
பெப்பே பதிலடி....
இந்நிலையில் பரபரப்பாக துவங்கிய இரண்டாவது பாதியின் 55வது நிமிடத்தில் போர்ச்சுகல் வீரர் பெப்பே பதிலடி கொடுக்க, போட்டி 1-1 என சமநிலையை எட்டியது.
தொடர்ந்து 62வது நிமிடத்தில் உருகுவே வீரர் கவானி மீண்டும் ஒரு கோல் அடிக்க உருகுவே மீண்டும் முன்னிலை பெற்றது. இதற்கு கடைசி வரை போராடியும் போர்ச்சுகல் வீரர்களால் பதிலடி கொடுக்க முடியாததால், முடிவில், உருகுவே அணி 2-1 என்ற கோல் கணக்கில் வெற்றி பெற்றது.
மெஸ்சியின் அர்ஜெண்டினா அணியைப்போல நட்சத்திர வீரர் ரொனால்டோவின் போர்ச்சுகல் அணியும் உலகக்கோப்பை தொடரில் இருந்து வெளியேறி ஏமாற்றம் அளித்தது.
நான் ஜீரோ இல்ல.... ஹீரோ.....
இதில் போட்டியின் 71வது நிமிடத்தில் இரண்டு கோல் அடித்த உருகுவே வீரர் கவானிக்கு காயம் ஏற்பட்டு நடக்க முடியாமல் திணறினார். இதைப்பார்த்து பதறிய போர்ச்சுகல் கேப்டன் ரொனால்டோ, அவருக்கு உதவி பெவிலியன் திரும்ப உதவினார்.
தனது அணி பின்தங்கியிருந்த நிலையில் எதிரணி வீரருக்கு உதவிய ஹீரோ ரொனால்டோவை இரு அணி ரசிகர்களும் பாராட்டும் விதமாக உற்சாகப்படுத்தினர். போட்டியில் வெற்றி தோல்வி சாதாரணமான விஷயம் என்றாலும் உண்மையான விளையாட்டு உணர்வோடு செயல்பட்ட ரொனால்டோ, விளையாட்டு உணர்வால் ஹீரோவாக ஜொலித்தார்.
Mobile AppDownload Get Updated News