வரும் 2019ல் ஐக்கிய அரபு எமிரேட்சில், ஆசிய கோப்பை கால்பந்து தொடர் நடக்கவுள்ளது. இதற்கான மூன்றாவது தகுதிச்சுற்று போட்டியில், இந்திய அணி, மியான்மர் அணியை எதிர்கொண்டது.
இதில் போட்டி துவங்கிய 13 வினாடியிலேயே மியான்மர் அணிக்கு நாயிங் முதல் கோல் அடித்து அசத்தினார். இதற்கு இந்திய கேப்டன் சுனில் சேத்ரி, 13வது நிமிடத்தில் கிடைத்த பெனால்டி வாய்ப்பில் பதிலடி கொடுத்தார்.
தொடர்ந்து மியான்மர் அணி வீரர்கள் ஆதிக்கம் செலுத்த துவங்கினர். 19வது நிமிடத்தில் அந்த அணிக்கு கோ கோ கியா இரண்டாவது கோல் அடித்தார். இதற்கு முதல் பாதியின் முடிவு வரை இந்திய அணி வீரர்களால் பதிலடி கொடுக்க முடியவில்லை.
இதனால் முதல் பாதியின் முடிவில் மியான்மர் அணி, 2-1 என்ற கோல் கணக்கில் முன்னிலை பெற்றது. பின் பரபரப்பாக துவங்கிய இரண்டாவது பாதியில், 69 வது நிமிடத்தில் இந்தியாவின் ஜிஜி ஒருகோல் அடித்தார்.
இதன் பின் இரு அணிகளும் கடைசி வரை போராடியும் கோல் அடிக்க முடியவில்லை. இதையடுத்து போட்டி, 2-2 என்ற கோல் கணக்கில் டிராவில் முடிந்தது. ஆசிய கோப்பை தொடருக்கு இந்திய அணி ஏற்கனவே தகுதி பெற்றுவிட்டது.
Mobile AppDownload Get Updated News