இந்தியாவில் சர்வதேச கால்பந்து கூட்டமைப்பு (பிபா) நடத்தும் 17 வயதுக்கு உட்பட்டோருக்கான கால்பந்து உலகக் கோப்பை தொடர் இன்று துவங்கியது. இதில் இந்திய அணி உட்பட சுமார் 24 சர்வதேச அணிகள் பங்கேற்கிறது.
இதில் கவுஹாத்தியின் இந்திரா காந்தி மைதானத்தில் நடந்த 'குரூப்-இ’ பிரிவின் லீக் போட்டியில் பிரான்ஸ், நியூ கலிடோனியா அணிகள் மோதின. இதில் துவக்கம் முதல் பிரான்ஸ் வீரர்கள் ஆதிக்கம் செலுத்தினர்.
அந்த அணிக்கு போட்டியின் முதல் பாதியின் 5வது நிமிடத்தில் கலிடோனிய வீரர் இவா ஓன் கோல் அடித்தார். பின் பிரான்ஸ் வீரர் கோயூரி (19, 33வது நிமிடம்) இரட்டை அடி கொடுத்தார். இந்த கேப்பில் கோமஸ் 30வது நிமிடத்தில் ஒரு கோல் அடித்தார்.
தொடர்ந்து காவுரெட் (40) மற்றொரு கோல் அடித்து முடித்தவுடன், கலிடோனிய வீரர் வான்சே (43) மீண்டும் ஒரு ஓன் கோல் அடித்தார். இதையடுத்து பிரான்ஸ் அணி 6-0 என வலுவான முன்னிலை பெற்றது.
பின் இரண்டாவது பாதியிலும் பிரான்ஸ் வீரர்கள் அசத்தலான ஆட்டத்தை வெளிப்படுத்தினர். இந்நிலையில், போட்டியின் கடைசி நிமிடத்தில் கலிடோனிய வீரர் வாடென்னஸ் ஒரு கோல் அடித்தார்.
இதற்கு பிரான்ஸ் வீரர் இஷிதோர் (90+1) அடுத்த நிமிடமே பதிலடி கொடுக்க, பிரான்ஸ் அணி வெற்றி பெற்றது. இறுதியில் பிரான்ஸ் அணி 7-1 என்ற கோல்கணக்கில் அசத்தல் வெற்றி பெற்றது.
இங்கிலாந்து அசத்தல்:
இதே போல கொல்கத்தாவில் நடந்த ‘எப்’ பிரிவு லீக் போட்டியில், இங்கிலாந்து, சிலி அணிகள் மோதின. இதில் இங்கிலாந்து அணிக்கு ஹட்சன் (5), சான்சூ (51,60) கோமஸ் (81) ஆகியோர் கோல் அடித்தனர். இறுதி வரை கோல் அடிக்க முயற்சித்த சிலி அணி வீரர்களின் முயற்சி தோல்வியில் முடிந்தது. முடிவில், இங்கிலாந்து அணி 4- 0 என்ற கோல் கணக்கில் வெற்றி பெற்றது.
Mobile AppDownload Get Updated News