சிகரம் நோக்கி நகரும் சிந்து! சாய்னாவுக்கு சரிவு!

பேட்மிண்டன் ஆசியா சாம்பியன்ஷிப் தொடரின் முதல் சுற்று ஆட்டத்தில் இந்திய வீராங்கனை பிவி சிந்து எளிதில் வென்று அடுத்த சுற்றுக்கு முன்னேறினார்.

சீனாவில் பேட்மிண்டன் ஆசியா சாம்பியன்ஷிப் தொடர் நேற்று (செவ்வாய்க்கிழமை) தொடங்கியது. இதில் முதல் சுற்று ஆட்டத்தில் இந்திய வீராங்கனை பி.வி.சிந்து இந்தோனேஷியாவின் தினர் அயூஸ்டினை எதிர்த்து விளையாடினார். இதில், அசத்தலாக விளையாடிய பிவி சிந்து 21-8, 21-18 என்ற நேர் செட்களில் வெற்றி பெற்று இரண்டாவது சுற்றுக்கு முன்னேறினார். வெறும் 31 நிமிடங்களில் வெற்றியை தனதாக்கிய சிந்து ரசிகர்களை மகிழ்ச்சியில் ஆழ்த்தினார்.

மற்றொரு இந்திய வீராங்கனை சாய்னா நேவால் தனது முதல் சுற்று ஆட்டத்தில் ஜப்பான் வீராங்கனை சயகா சாடோவை எதிர்கொண்டார். கடுமையாகப் போராடிய சாய்னா 19-21, 21-16, 21-18 என்ற செட் கணக்கில் தோல்வியைத் தழுவினார்.

ஆடவர் ஒற்றையர் பிரிவில் இந்திய வீரர் அஜய் ஜெயராம் சீன வீரர் டை ஹோவேயை 21-18, 18-21, 21-19 என்ற செட் கணக்கில் தோற்கடித்தார். கலப்பு இரட்டையர் பிரிவில் இந்தியாவின் பிரணவ் ஜெர்ரி சோப்ரா, சிக்கி ரெட்டி இணை சீன இணையை வீழ்த்தியது. மகளிர் இரட்டையர் பிரிவில் அஸ்வினி பொன்னப்பா, சிக்கி இணை தென்கொரிய இணையிடம் தோற்றது. ஆடவர் இரட்டையர் பிரிவிலும் இந்தியாவின் மனு அத்ரி, சுமீத் ரெட்டி இணை சீன இணையிடம் வெற்றியை பறிகொடுத்தது.