சாக்‌ஷிக்கு கொடுக்க எதுவுமில்ல : கைவிரித்த கூட்டமைப்பு !

மும்பை: ஒலிம்பிக்கில் சாதித்த இந்திய வீராங்கனை சாக்‌ஷிக்கு பரிசாக கொடுக்க எங்களிடம் ஒன்றுமில்லை என மல்யுத்த கூட்டமைப்பு தெரிவித்துள்ளது.

பிரேசிலின் ரியோ ஒலிம்பிக்கில் இந்திய வீராங்கனைகளான சாக்‌ஷி மாலிக், பி.வி.சிந்து ஆகியோருக்கு அவர்களின் மாநில அரசாங்கள் மாறி மாறி பாராட்டு விழாக்கள் மற்றும் பரிசுத்தொகைகளை அறிவித்துள்ளன.

தவிர, இந்திய பேட்மிண்டன் சங்கம் சிந்துவிற்கு ரூ. 50 லட்சம் பரிசாக அறிவித்தது. ஆனால் மல்யுத்த கூட்டமைப்பு சாக்‌ஷிக்கு பரிசாக கொடுக்க எங்களிடம் ஒன்னுமில்லை என தெரிவித்தது சர்ச்சையை ஏற்படுத்தியுள்ளது.

இதுகுறித்து இந்திய மல்யுத்த கூட்டமைப்பு தலைவர் பிரிஜ் பூசன் சரண் சிங் கூறியது:
மல்யுத்த கூட்டமைப்பு சார்பாக சாக்‌ஷிக்கு கொடுக்க பரிசுத்தொகை எதுவுமில்லை. அரசாங்கம் தேசிய அளவிலான போட்டிகளை நடத்த ரூ. 2 லட்சம் மட்டுமே கொடுக்கிறது. சீனியர் அளவிலான போட்டிகளை நடத்த ரூ.1 கோடிவரை என்னுடைய சொந்த பணத்தை செலவு செய்தேன். எங்களுக்கு பக்க பலமாக எந்த மிகப்பெரிய ஸ்பான்சர்களும் இல்லை. இந்திய விளையாட்டு கழகத்தில் பயிற்சி பெறும் குழந்தைகள் அனைவரும் ஒரு மாதத்துக்கு ரூ.700ல் பயிற்சி மேற்கொள்கின்றனர். ஆனால் ஒருமாதத்துக்கு குறைந்தது ரூ. 7000மாவது தேவைப்படும். நிலைமை இப்படி இருக்க, எப்படி சீனா, ஜப்பான், உள்ளிட்ட நாடுகளுடன் எப்படி இந்திய வீரர்களை ஒப்பிட முடியும்.
இவ்வாறு அவர் கூறினார்.