சென்ற ஆட்டத்தில் செர்பியா அணிக்கு எதிராக டிரா செய்ததை தொடர்ந்து லக்சம்பர்க் அணிக்கு எதிரான ஆட்டத்தில் வெற்றி பெற வேண்டும் என்ற முனைப்பில் போர்ச்சுகல் அணி களமிறங்கியது. சென்ற ஆட்டத்தை அயர்லாந்து அணிக்கு எதிராக வெற்றி பெற்ற லக்சம்பர்க் அணி சிறப்பான ஆட்டத்தை வெளிப்படுத்தி வருகிறது. ஆனாலும் லக்சம்பர்க் அணியை வீழ்த்துவது என்பது போர்ச்சுகல் அணிக்கு அத்தனை கடினமான ஒன்றாக அமையாது.
ஆட்டத்தை லக்சம்பர்க் அணி பிரகாசமான துவங்கியது, அதிக அளவில் தாக்குதல்களை நடத்தா விட்டாலும் தொடர்ந்து தாக்குதல்கள் நடப்பதற்கு முனைப்பு காட்டினர். ஆட்டம் துவங்கியதும் லக்சம்பர்க் அணி வெற்றி பெறுவதற்காக களமிறங்கியுள்ளனர் என்பது தெரிந்தது.
ஆனால் போர்ச்சுகல் அணியின் தடுப்பு ஆட்டக்காரர்கள் சிறப்பாக செயல்பட்ட காரணத்தால் அணி நடத்திய ஓரிரு தாக்குதல்களை வாய்ப்புகளாக மாற்ற இயலவில்லை. ஆட்டத்தின் 15வது நிமிடத்தில் லக்சம்பர்க் அணியின் முன்கள வீரரான சினாணி தனக்கு கிடைத்த வாய்ப்பை கோல் பக்கம் திருப்பி விட போர்ச்சுகல் அணியின் தடுப்பு ஆட்டக்காரர் ஃபான்ட்டே கோல் விடாமல் பந்தை தடுத்து நின்றார். மறுமுனையில் போர்ச்சுகல் அணி சார்பாக ரொனால்டோ, சான்ச்சஸ் ஆகிய இருவருக்கும் கிடைத்த வாய்ப்பை தவற விட்டனர்.
ஆட்டத்தின் 39வது நிமிடத்தில் லக்சம்பர்க் அணியின் சினானி கொடுத்த கிராஸ்சை ராட்ரிகஸ் தலையால் முட்டி கோல் அடித்து அணியை முன்னிலை பெறச் செய்தார். இதனால் அதிர்ச்சி அடைந்த போர்ச்சுகல் அணி தொடர்ந்து தாக்குதல் ஆட்டத்தில் ஈடுபட்டது ஆட்டத்தின் 45வது நிமிடத்தில் ரொனால்டோ கிடைத்த அருமையான வாய்ப்பை மீண்டும் நழுவவிட முதல் பாதி 1-0 என்ற முடிவை நோக்கி நகர்ந்தது.
முதல் பாதியின் கடைசி நிமிடத்தில் நெட்டோ கொடுத்த கிராஸ்சை ஜோட்டா தலையால் முட்டி கோல் அடித்து ஆட்டத்தை சமன் செய்தார். இதனால் முதல் பாதி 1-1 என்ற கோல் கணக்கில் முடிவடைந்தது.
இரண்டாம் பாதியை அட்டகாசமாக தொடங்கிய போர்ச்சுகல் அணிக்கு ஆட்டத்தின் 50 ஆவது நிமிடத்தில் கான்செல்லோ கொடுத்த கிராஸ்சை ரொனால்டோ தலையால் முட்டி கோல் அடித்து அணியை ஒரு கோல் முன்னிலை பெறச் செய்தார். தொடர்ந்து தாக்குதல் நடத்திய போர்ச்சுகல் அணிக்கு ஆட்டத்தின் 60 ஆவது நிமிடத்தில் சான்ச்சஸ் கொடுத்த கார்னர் கிக்கை ஜோட்டா தலையால் முட்டி கோல் பக்கம் திருப்பி விட பந்து கோல் கம்பத்தின் மேல் பட்டு வெளியேறியது.
சற்று வேகத்தைக் குறைத்துக் கொள்ளாத போர்ச்சுகல் அணிக்கு ஆட்டத்தின் 77-வது நிமிடத்தில் ரொனால்டோ தாக்குதல் நடத்த நிச்சயம் கோல் அடிப்பார் என்று எதிர்பார்த்த நிலையில் அவர் பந்தை எதிரணியின் கோல் கீப்பருக்கு நேரே அடித்து தன்னுடைய வாய்ப்பை தவறவிட்டார். அதற்கு அடுத்த நிமிடமே போர்ச்சுகல் அணியின் கான்செல்லோ கொடுத்த கிராஸ்சை ரொனால்டோ மீண்டும் தவறவிட்டார். ஆட்டத்தின் 80வது நிமிடத்தில் பல்ஹின்ஹா கோல் அடித்து போர்ச்சுகல் அணியை 3-1 என்ற கோல் கணக்கில் வெற்றி பெறச் செய்தார்.
இந்த வெற்றியின் மூலம் புள்ளிப் பட்டியலில் முதலிடத்திற்கு போர்ச்சுகல் அணி நகர்ந்துள்ளது.
Mobile AppDownload Get Updated News