மான்செஸ்டர் சிட்டி மீண்டும் வெற்றி: தொடர்ந்து பதினெட்டாவது வெற்றி

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று அதிகாலை நடைபெற்ற ஆட்டத்தில் புள்ளி பட்டியலில் முதலிடத்தில் இருக்கும் மான்செஸ்டர் சிட்டி அணியும் 10வது இடத்தில் இருக்கும் ஆர்சனல் அணியும் மோதின. இவ்விரு அணிகளும் மோதிய முதல் ஆட்டத்தில் மான்செஸ்டர் சிட்டி அணி 4-1 என்ற கோல் கணக்கில் வெற்றி பெற்றது. கடந்த 17 ஆட்டங்களாக தொடர்ந்து வெற்றி பெற்று வரும் மான்செஸ்டர் சிட்டி அணி, கடந்த ஐந்து ஆட்டங்களில் ஒரே ஒரு வெற்றியை மட்டும் பதிவு செய்திருந்த ஆர்சனல் அணியை எதிர்கொண்டது. மான்செஸ்டர் சிட்டி அணி எப்பொழுதும் போல வெற்றி பெற வேண்டும் என்ற எண்ணத்தில் களமிறங்கியது. ஆர்சனல் அணியினரும் தடுப்பு ஆட்டத்தில் ஈடுபட்டு கவுண்டர் அட்டாக் செய்த வெற்றிபெறலாம் என்ற எண்ணத்தில் களமிறங்கினர்.

ஆட்டம் துவங்கிய முதல் நிமிடத்திலேயே மான்செஸ்டர் சிட்டி அணி கோல் அடித்து முன்னிலை பெற்றது. மாரெஸ் கொடுத்த கிராஸ்சை ஸ்டெர்லிங் தலையால் முட்டி கோல் அடித்தார். முதல் நிமிடத்திலேயே மான்செஸ்டர் சிட்டி அணி கோல் அடித்தது அவர்களுக்கு பெரும் பலமாக அமைந்தது. ஆதிக்கம் செலுத்திய மான்செஸ்டர் சிட்டி அணியை ஆர்சனல் அணியின் சாக்கா கவுண்டர் அட்டாக் செய்தார், ஆனால் அவருக்கு கோல் கிடைக்கவில்லை. ஆட்டத்தில் மான்செஸ்டர் சிட்டி அணியினர் எதிர்பார்த்தது போலவே ஆதிக்கம் செலுத்தியது. மான்செஸ்டர் சிட்டி அணி சார்பாக மாரெஸ் தனக்கு கிடைத்த இரண்டு அருமையான வாய்ப்புகளை நழுவ விட்டார், ஆர்சனல் அணியின் துடுப்பாட்டம் சிறப்பாக செயல்பட்டது.

குறிப்பாக ஹோல்டிங் அட்டகாசமான ஆட்டத்தை வெளிப்படுத்தினார், மான்செஸ்டர் சிட்டி அணி ஒவ்வொரு முறையும் தாக்குதல் நடத்த முற்படும் பொழுது ஏதேனும் ஒரு ஆர்சனல் தடுப்பு ஆட்டக்காரர் அந்தத் தாக்குதலை செயலிழக்கச் செய்தார். ஆர்சனல் அணியின் தாக்குதல் ஆட்டக்காரரான பெப்பே தனக்கு கிடைத்த ஒரு அருமையான வாய்ப்பை நழுவ விட்டார். மான்செஸ்டர் சிட்டி அணி தாக்குதல் ஆட்டத்தை எந்த அளவிர்க்கு கவனம் செலுத்தினார்களோ அதே அளவிற்கு தடுப்பு ஆட்டத்திலும் கவனம் செலுத்தினர். முதல் பாதி 1-0 என்ற கோல் கணக்கில் மான்செஸ்டர் சிட்டி அணிக்கு சாதகமாக முடிந்தது.

இரண்டாம் பாதி சற்று மந்தமாகவே தொடங்கியது, ஆர்சனல் அணியினர் சரியான வாய்ப்புக்காக காத்திருந்தனர், ஆனால் அவர்களால் தங்கழுக்கு கிடைத்த ஓரிரு வாய்ப்புகளை கோலாக மாற்ற இயலவில்லை. மான்செஸ்டர் சிட்டி அணி ஆட்டத்தின் இரண்டாம் பாதியிலும் ஆதிக்கம் செலுத்தியது, ஆர்சனல் அணியின் தடுப்பு ஆட்டம் சிறப்பாக செயல்பட்டு மான்செஸ்டர் சிட்டி அணியின் தாக்குதல் ஆட்டத்திற்கு அழுத்தம் கொடுத்தனர்.

இதனால் மான்செஸ்டர் சிட்டி அணியின் தாக்குதல் ஆட்டத்தின் முழு திறன் வெளிப்படவில்லை. ஆட்டத்தின் இறுதி நிமிடங்களில் ஆர்சனல் அணி சற்று தாக்குதல் ஆட்டத்தில் கவனம் செலுத்தத் தொடங்கினர், ஆட்டத்தின் 79 ஆவது நிமிடத்தில் அபாமயங் கொடுத்த கிராஸ்சை சாக்கா தவறவிட்டார். ஆட்டத்தின் 80வது நிமிடத்தில் ஜீசஸ் கொடுத்த அருமையான பாசை கான்செல்லோ நிச்சயம் கோல் அடிப்பார் என்று நினைத்து சமயத்தில் அதை தவறவிட்டு மான்செஸ்டர் சிட்டி அணிக்கு ஏமாற்றம் அளித்தார். இறுதியில் ஆட்டம் 1-0 என்ற கோல் கணக்கில்மான்செஸ்டர் சிட்டி அணிக்கு சாதகமாக முடிந்தது.


இந்த வெற்றியின் மூலம் மான்செஸ்டர் சிட்டி அணி தொடர்ச்சியாக தனது 18-ஆவது வெற்றியை பதிவு செய்தது. மறுமுனையில் ஆர்சனல் அணி நடப்பு சீசனில் 11வது தோல்வியை பதிவு செய்தது, மேலும் லீட்ஸ் யுனைடெட் அணி அடுத்த ஆட்டத்தில் வெல்லும் பட்சத்தில் ஆர்சனல் அணி 11ஆவது இடத்துக்கு தள்ளப்படும் அபாயம் ஏற்பட்டுள்ளது.