டோட்டன்ஹாம் மீண்டும் தோல்வி: 4வது இடத்திற்கு முன்னேறிய வெஸ்ட் ஹாம்!

இங்கிலாந்து நாட்டில் நடைபெற்று வரும் பிரீமியர் லீக் கால்பந்து போட்டியில் புள்ளிப் பட்டியலில் ஐந்தாம் இடத்தில் இருக்கும் வெஸ்ட் ஹாம் அணியும், ஒன்பதாம் இடத்தில் இருக்கும் டோட்டன்ஹாம் அணியும் மோதின. இவ்விரு அணிகள் மோதிய முதல் ஆட்டத்தின் கடைசி பத்து நிமிடங்களில் வெஸ்ட் ஹாம் அணியினர் 3 கோல் அடித்து ஆட்டத்தை 3-3 என்ற கோல் கணக்கில் டிரா செய்தனர். டோட்டன்ஹாம் அணி ஆடிய கடந்த ஐந்து லீக் ஆட்டங்களில் 4 ஆட்டங்கள் தோல்வியடைந்துள்ளது. மறுமுனையில் வெஸ்ட் ஹாம் அணியினர் ஆடிய கடந்த ஐந்து ஆட்டங்களில் மூன்று வெற்றிகளை பதிவு செய்துள்ளனர். இந்த ஆட்டத்தில் வெற்றி பெறும் பட்சத்தில் வெஸ்ட் ஹாம் அணி நான்காம் இடத்தில் இருக்கும் செல்சீ அணியை பின்னுக்கு தள்ளி மூன்றாம் இடத்திற்கு முன்னேறும்.

மறுமுனையில் டோட்டன்ஹாம் அணி எஞ்சியிருக்கும் இரண்டு ஆட்டங்களையும் வெல்லும் பட்சத்தில் ஆறாம் இடத்திற்கு முன்னேறும். தொடர்ந்து மோசமான ஆட்டத்தை வெளிப்படுத்தி வரும் டோட்டன்ஹாம் அணியினர் மீண்டும் வெற்றிப் பாதைக்கு திரும்பத் தவறினால், அடுத்த சீசன் ஐரோப்பிய போட்டிகளில் பங்கேற்பது கேள்விக்குறியாகி விடும். எனவே வெற்றி பெற வேண்டும் என்ற எண்ணத்தோடு டோட்டன்ஹாம் அணியினர் களமிறங்கினர். கவுண்டர் அட்டாக் முறையை பின்பற்றி ஆட்டங்களை அணுகும் வெஸ்ட் ஹாம் அணியினர் எப்பொழுதும் ஆட்டத்தின் துவக்கத்தில் கோல் அடித்து, அதன் பின் கடுமையான தடுப்பு ஆட்டத்தில் ஈடுபட்டு வெற்றி பெறுவது வழக்கம்.


அதைப்போலவே ஆட்டத்தின் மூன்றாவது நிமிடத்தில் வெஸ்ட் ஹாம் அணியின் ஸ்ட்ரைக்கர் அண்டோனியோ கோல் அடித்து அணியை முன்னிலை பெறச் செய்தார். எதிர்பார்த்ததைப் போல வெஸ்ட் ஹாம் அணி அதன்பின் கடுமையான தடுப்பு ஆட்டத்தில் ஈடுபட்டது. ஆட்டத்தின் பத்தாவது நிமிடத்தில் வெஸ்ட் ஹாம் அணியினருக்கு மீண்டும் ஒரு வாய்ப்பு கிடைக்க அதை லின்கார்ட் தவறவிட்டார். டோட்டன்ஹாம் அணியினர் அதன்பின் தாக்குதல் நடத்த துவங்கினர். ஆனால் அவர்களால் வெஸ்ட் ஹாம் அணியின் தடுப்பு ஆட்டத்தை மீறி அதிக அளவில் வாய்ப்புகளை ஏற்படுத்த தவறினர். டோட்டன்ஹாம் அணியின் சார்பாக லமெலா மற்றும் கேன் ஆகியோருக்கு மட்டுமே தெளிவான வாய்ப்புகள் கிடைத்தன. ஆனால் அதையும் அவர்கள் தவற விட்டனர்.


வெஸ்ட் ஹாம் அணியின் தடுப்பு ஆட்டம் சிறப்பாக செயல்பட்ட காரணத்தால் டோட்டன்ஹாம் அணிக்கு முதல் பாதியில் கோல் எதுவும் கிடைக்கவில்லை. 1-0 என்ற கோல் கணக்கில் வெஸ்ட் ஹாம் அணிக்கு சாதகமாக முதல்பாதி முடிந்தது. முதல் பாதியை போலவே இரண்டாம் பாதியை ராக்கெட் வேகத்தில் துவங்கிய வெஸ்ட் ஹாம் அணிக்கு ஆட்டத்தின் 48வது நிமிடத்தில் இரண்டாவது கோல் கிடைத்தது. மான்செஸ்டர் யுனைடெட் அணியில் இருந்து தற்காலிகமாக வெஸ்ட் ஹாம் அணியில் இணைந்த லின்கார்ட் இம்முறை கோல் அடித்தார். வெஸ்ட் ஹாம் அணியில் இணைந்த பின் அவர் பதிவுசெய்யும் மூன்றாவது கோலாக இது அமைந்தது. ஆட்டத்தின் 60வது நிமிடத்தில் கேன் அடித்த ஃப்ரீகிக் கோல் கம்பத்திலிருந்து விலகிச் சென்றது.

டோட்டன்ஹாம் அணியினர் நடத்திய தாக்குதலுக்கு ஆட்டத்தின் 65வது நிமிடத்தில் பலன் கிடைத்தது. பேல் எடுத்த கார்னர் கிக்கை லூக்கஸ் தலையால் முட்டி கோல் அடித்தார். அதைத்தொடர்ந்து ஆட்டத்தில் சூடுபிடிக்க தொடங்கியது. டோட்டன்ஹாம் அணியின் ஆட்டத்தில் வேகம் கூடியது. ஆட்டத்தின் 73வது நிமிடத்தில் அணியின் நட்சத்திர வீரர் கேன் அடித்த பந்து கோல் கம்பத்தில் இருந்து விலகிச் சென்றது. அதைத்தொடர்ந்து பேல் அடித்த பந்து கோல் கம்பத்தின் மேல் பட்டு வெளியேறியது.


சற்றும் வேகத்தை குறைத்துக் கொள்ளாத டோட்டன்ஹாம் அணியினர் தொடர்ந்து தாக்குதல் நடத்த ஆட்டத்தின் கடைசி நிமிடத்தில் சன் அடித்த பந்து மீண்டும் கோல் கம்பத்தின் மேல் பட்டு வெளியேறியது. ஆட்டத்தின் இறுதியில் வெஸ்ட் ஹாம் அணி 2-1 என்ற கோல் கணக்கில் வெற்றி பெற்றது. இந்த வெற்றியின் மூலம் வெஸ்ட் ஹாம் அணி புள்ளி பட்டியல் நான்காம் இடத்தில் இருக்கும் செல்சீ அணியை பின்னுக்குத் தள்ளி நான்காம் இடத்தைப் பிடித்தது.