பேயர்ன் மியூனிக் அதிர்ச்சி தோல்வி: காயத்தின் காரணமாக பரிதவிக்கும் பேயர்ன்

ஜெர்மனி நாட்டில் நடைபெற்று வரும் புண்டஸ்லீகாவின் புள்ளி பட்டியலில் முதல் இடத்தில் இருக்கும் பேயர்ன் மியூனிக் அணியும் புள்ளி பட்டியலில் நான்காவது இடத்தில் இருக்கும் ஃபிராங்க்ஃபர்ட் அணியும் மோதின. இவ்விரு அணிகள் மோதிய முதல் ஆட்டத்தில் பேயர்ன் மியூனிக் அணி 5-0 என்ற கோல் கணக்கில் அபார வெற்றி பெற்றது. இந்த ஆட்டத்தில் பேயர்ன் மியூனிக் அணியைச் சார்ந்த இரண்டு முன்னணி வீரர்களான மார்ட்டிநஸ் மற்றும் கோரெட்ஸ்க்கா காயத்திலிருந்து மீண்டு சப்ஸ்டிட்யூட்டில் இடம்பெற்றிருந்தனர்.

அதுபோல மேலும் இரண்டு முன்னணி வீரர்களான முல்லர் மற்றும் பவார்ட் ஆகியோர் கொரோனா தொற்று காரணமாக அணியில் இடம்பெறவில்லை மட்டுமல்லாமல் அணியின் இரண்டாம் நிலை நடுகள வீரரான டோலிசோ காயம் காரணமாக அணியில் இடம்பெறவில்லை. அணியில் ஐந்து முன்னணி வீரர்கள் இடம்பெறாத காரணத்தால் அணிக்கு பெரும் பின்னடைவாக பார்க்கப்பட்டது. அதனால் இந்த சந்தர்ப்பத்தை ஃபிராங்க்ஃபர்ட் அணியினர் சரியாக பயன்படுத்தி பேயர்ன் மியூனிக் அணியை பழி தீர்த்துக் கொள்ள வேண்டும் என்ற எண்ணத்தோடு களமிறங்கியது. மறுமுனையில் பேயர்ன் மியூனிக் அணி சென்ற ஆட்டத்தை டிரா செய்ததால் அதிர்ச்சி அடைந்த ரசிகர்கள் இந்த ஆட்டத்தில் வெற்றி பெற்று உற்சாகப்படுத்த வேண்டும் என்ற எண்ணத்தோடு களமிறங்கினர்.

ஆட்டத்தின் முதல் பாதியில் அனல் பறந்தது. இரு அணியினரும் ஆட்டத்தில் வேகம் காட்டினர். ஆனால் கோல் என்னவோ ஃபிராங்க்ஃபர்ட் அணிக்கு கிடைத்தது. ஆட்டம் துவங்கிய 12 ஆவது நிமிடத்தில் ஃபிராங்க்ஃபர்ட் அணியின் காஸ்டிச் கொடுத்த கிராஸ்ஸை கமாடா கோலாக மாற்றி ஃபிராங்க்ஃபர்ட் அணியை முன்னிலை பெறச் செய்தார். ஆட்டத்தின் துவக்கத்திலேயே பின்னடைவு ஏற்பட்டது பேயர்ன் மியூனிக் அணிக்கு அதிர்ச்சியளித்தது.

அதிர்ச்சியிலிருந்து மீண்டு வருவதற்குள் ஆட்டத்தின் 22வது நிமிடத்தில் யூனஸ் சுமார் 50 அடி தொலைவில் இருந்து கோலை நோக்கி அடிக்க அது கோலில் இருந்து விலகிச் சென்றது. தொடர்ந்து தாக்குதல் நடத்திய ஃபிராங்க்ஃபர்ட் அணியினருக்கு ஆட்டத்தில் 32 ஆவது நிமிடத்தில் யூனஸ் மேலும் ஒரு கோல் அடித்து அணியை 2 கோல் முன்னிலை பெறச் செய்தார். ராக்கெட் வேகத்தில் போய்க்கொண்டிருந்த ஃபிராங்க்ஃபர்ட் அணியின் ஆட்டம் 2 கோல் அடித்ததும் ஆமை வேகத்தில் நகரத் துவங்கியது.

ரியல் மாட்ரிட் அணி வெற்றி: முதலிடத்தை நெருங்கும் ரியல்மாட்ரிட்

பேயர்ன் மியூனிக் அணிக்கு சிந்திக்க நேரம் கொடுக்காமல் ஃபிராங்க்ஃபர்ட் அணியினர் நடத்திய தாக்குதலில் ஸ்தம்பித்து நின்ற பேயர்ன் மியூனிக் அணியினர் விழித்தனர். ஆட்டத்தின் 40வது நிமிடத்தில் கிமிக் மற்றும் கோமன் தொடர்ந்து கோலை நோக்கி அடித்த பந்தை ஃபிராங்க்ஃபர்ட் அணியின் கோல் கீப்பர் டிராப் அட்டகாசமாக கோல் விழாமல் தட்டிவிட்டார். ஆட்டத்தின் முதல் பாதி யாரும் எதிர்பாராத வண்ணம் 2-0 என்று ஃபிராங்க்ஃபர்ட் அணிக்கு சாதகமாக முடிந்தது.

எதிர்பார்த்ததை போல பேயர்ன் மியூனிக் அணியினர் இரண்டாம் பாதியில் முற்றிலும் மாறுபட்ட ஆட்டத்தை வெளிப்படுத்தினர். இரண்டாம் பாதியின் முதல் நிமிடத்தில் இருந்து பேயர்ன் மியூனிக் அணியினர் கடுமையான தாக்குதலில் ஈடுபட்டனர். இரண்டாம் பாதி துவங்கி நான்கே நிமிடங்களில் சானே கொடுத்த கிராஸ்ஸை கோமன் தலையால் முட்ட அது தவறி சென்றது. தொடர்ந்து தாக்குதல் நடத்திய பேயர்ன் மியூனிக் அணிக்கு தங்களது முதல் கோல் ஆட்டத்தின் 54 ஆம் நிமிடத்தில் கிடைத்தது.

சானே கொடுத்த பாசை அணியின் நட்சத்திர வீரர் லெவான்டாஸ்க்கி கோலாக மாற்றி ஆட்டத்தை சூடுபிடிக்கச் செய்தார். ஃபிராங்க்ஃபர்ட் அணியினர் கடுமையான தடுப்பு ஆட்டத்தில் ஈடுபட்டனர் பேயர்ன் மியூனிக் அணியினரால் பெரிய அளவில் வாய்ப்புகளை ஏற்படுத்த இயலவில்லை. பல முறை கோலை நோக்கி பந்தை அடித்தாலும் அவர்களுக்கு கோல் எதுவும் கிடைக்கவில்லை. ஃபிராங்க்ஃபர்ட் அணியின் தடுப்பு ஆட்டம் பேயர்ன் மியூனிக் அணியை வாய்ப்புகளை ஏற்படுத்த விடாமல் பார்த்துக்கொண்டது, அதையும் மீறி பேயர்ன் மியூனிக் அணியின் கோரெட்ஸ்க்கா, கோமன், சுலெ, லெவான்டாஸ்க்கி என பலர் முயற்சி செய்தாலும் அவர்களுக்கு ஆட்டத்தின் இறுதி வரை கோல் கிடைக்கவில்லை. இதனால் 2-1 என்ற கோல் கணக்கில் தோல்வி அடைந்தனர்.

இந்த தோல்வியின் மூலம் புள்ளிப் பட்டியலில் இரண்டாம் இடத்தில் இருக்கும் லைப்சிக் அணியை விட ஒரு ஆட்டம் அதிகம் விளையாடி 5 புள்ளிகள் முன்னிலையுடன் முதல் இடத்தை வகிக்கின்றனர், எஞ்சி இருக்கும் அந்த ஆட்டத்தில் லைப்சிக் அணி வெல்லும் பட்சத்தில் இந்த ஐந்து புள்ளி இடைவேளை இரண்டு புள்ளியாக குறைந்துவிடும்.