அதிரடி காட்டிய ஜாம்ஷெட்பூர், அதிர்ந்துபோன மும்பை: தொடர்ந்து இரண்டாவது தோல்வி!

இந்தியன் சூப்பர் லீகின் 100-வது ஆட்டம் நேற்று புள்ளிப் பட்டியலில் இரண்டாம் இடத்தில் இருக்கும் மும்பை அணிக்கும் ஏழாவது இடத்தில் இருக்கும் ஜாம்ஷெட்பூர் அணிக்கும் இடையே நடைபெற்றது. இவ்விரு அணிகள் மோதிய முதல் ஆட்டம் 1-1 என்ற கோல் கணக்கில் முடிவடைந்தது. நடப்பு சீசனை அட்டகாசமாக துவங்கிய மும்பை அணியினர் அரையிறுதி சுற்றுக்கு முன்னேறுவது உறுதியான பின்பு தொடர்ந்து கோட்டை விட்டு வருகின்றனர். கடந்த 5 ஆட்டங்களில் ஒரே ஒரு வெற்றியை மட்டும் பதிவு செய்துள்ளனர். மறுமுனையில் ஜாம்ஷெட்பூர் அணி சமீபகாலமாக சிறப்பான ஆட்டத்தை வெளிப்படுத்தி வருகின்றது. அரையிறுதி சுற்றுக்கு முன்னேறும் வாய்ப்பு இல்லை என்றாலும் கடந்த சில ஆட்டங்களாக சிறப்பான ஆட்டத்தை வெளிப்படுத்தி வந்து ரசிகர்களுக்கு ஆறுதல் அளிக்கின்றது.

மும்பை அணியினர் சீசனின் துவக்கத்தில் அட்டகாசமான ஆட்டத்தை வெளிப்படுத்தி புள்ளிப் பட்டியலில் முதலிடத்தை வகித்து வந்தது. கடந்த சில ஆட்டங்களாக மோசமான ஆட்டத்தின் காரணமாக இரண்டாம் இடத்திற்கு தள்ளப்பட்டுள்ளது. மீண்டும் முதல் இடத்தைப் பிடிப்பதற்கு எஞ்சி இருக்கும் 3 ஆட்டங்களிலும் வெற்றி பெற்றால் மட்டுமே கூடும். எனவே இந்த ஆட்டத்தில் வெற்றி பெற வேண்டும் என்ற எண்ணத்தோடு களமிறங்கினர். ஆட்டத்தின் துவக்கத்தில் இருந்து மும்பை அணியினர் அதிக நேரம் பந்தை தங்கள் வசம் வைத்துக் கொண்டனர். மறுமுனையில் ஜாம்ஷெட்பூர் அணியினர் பந்து அவர்களுக்கு கிடைக்கும் போதெல்லாம் தாக்குதல் நடத்தி வந்தனர். ஜாம்ஷெட்பூர் அணி தாக்குதல் ஆட்டத்தில் கவனம் செலுத்தி வந்தாலும்,


அவர்கள் தடுப்பு ஆட்டத்தில் சிறப்பாக செயல்பட்டதால் மும்பை அணியினரால் வாய்ப்புகளை ஏற்படுத்த இயலவில்லை. ஜாம்ஷெட்பூர் அணி நடத்திய தாக்குதல்களில் வேகம் தென்பட்டது. ஆனால் மும்பை அணியின் ஆட்டத்தில் நிதானம் காட்டினார். ஜாம்ஷெட்பூர் அணி சார்பாக ஃபாருக், டுங்கெல், வல்ஸ்கிஸ் ஆகியோர் நடத்திய தாக்குதல்கள் எதுவும் கோலாக மாறவில்லை. மும்பை அணியினரின் ஆட்டம் மிக மந்தமாக அமைந்தது. ஆட்டத்தின் முதல் பாதியில் ஒரே ஒரு முறைதான் கோலைநோக்கி பந்தை அடித்தனர். அதுவும் அணியின் தடுப்பு ஆட்டக்காரரான ஃபால் கோலை நோக்கி தலையால் முட்டியது. முதல் பாதியில் மும்பை அணியின் முன்கள ஆட்டக்காரர்கள் முற்றிலுமாக செயலிழந்தவாறு இருந்தனர். முதல் பாதி இரு அணியினருக்கும் கோல் கிடைக்காமல் 0-0 இன்று முடிந்தது.


இரண்டாம் பாதியிலும் மும்பை அணியினர் கடுமையான தடுப்பு ஆட்டத்தில் ஈடுபட்டனர். அதற்கு நேர் எதிராக ஜாம்ஷெட்பூர் அணியினர் கடுமையான தாக்குதலில் ஈடுபட்டனர். முதல் பாதியை போலவே மும்பை அணியினரின் தடுப்பு ஆட்டத்தை மீறி ஜாம்ஷெட்பூர் அணி பெரிய அளவில் வாய்ப்புகளை உருவாக்க இயலவில்லை. மும்பை அணியின் 11 வீரர்களும் தடுப்பு ஆட்டத்தில் ஈடுபட்டது போல் காட்சியளித்தது. ஜாம்ஷெட்பூர் அணியினர் நடத்திய தாக்குதலுக்கு ஆட்டத்தின் 72வது நிமிடத்தில் பலன் கிடைத்தது. ஜாம்ஷெட்பூர் அணியினர் எடுத்த கார்னர் கிக்கை சரியாக கிளியர் செய்ய தவறிய மும்பை அணியினரை பிபின் சிங் கோல் அடித்து தண்டித்தார். தாக்குதல் ஆட்டத்தில் ஈடுபட்ட ஜாம்ஷெட்பூர் அணியினருக்கு பரிசாக இந்த கோல் கிடைத்தது.

அதன்பின் மும்பை அணியினர் தாக்குதல் நடத்த முற்பட்ட பொழுது ஜாம்ஷெட்பூர் அணியினர் சிறப்பான முறையில் தடுப்பு ஆட்டத்தில் ஈடுபட்டு அவைகளை தடுத்து நின்றனர். மும்பை அணியின் தாக்குதல் ஆட்டம் மிக மோசமாக இருந்ததால் அவர்களுக்கு இறுதிவரை கோல் கிடைக்கவில்லை. மும்பை அணியின் சிறந்த தாக்குதல் ஆட்டக்காரராக செயல்பட்டவர் அணியின் தடுப்பு ஆட்டக்காரரான ஃபால் என்று சொல்லும் அளவிற்கு தாக்குதல் ஆட்டம் ஆட்டத்தில் தாக்கத்தை ஏற்படுத்த தவறியது. ஆட்டத்தின் 91 ஆவது நிமிடத்தில் டேவிட் கிரான்டே ஜாம்ஷெட்பூர் அணிக்கு மேலும் ஒரு கோல் அடிக்க, 2-0 என்ற கோல் கணக்கில் ஜாம்ஷெட்பூர் அணி வெற்றி பெற்றது. இந்த வெற்றியின் மூலம் ஆறாவது இடத்தில் இருக்கும் பெங்களூரு அணியை பின்னுக்குத் தள்ளி ஜாம்ஷெட்பூர் அணி ஆறாம் இடத்தை பிடித்தது.


மேலும் இந்த ஆட்டத்தில் தோல்வி அடைந்த காரணத்தால் மும்பை அணி 34 புள்ளிகளுடன் இரண்டாம் இடத்தில் நீடிக்கிறது. முதலிடத்தில் இருக்கும் மோகன் பேகன் அணியினர் எஞ்சி இருக்கும் இரண்டு ஆட்டங்களில் இரண்டு புள்ளிகள் பெறும் பட்சத்தில் முதல் இடத்தை உறுதிசெய்து லீக் போட்டியை வெற்றி பெற்று ஆசிய சாம்பியன்ஸ் லீக் போட்டிக்கு நேரடியாக தகுதி பெறுவார்கள்.