லிவர்பூல் ரிட்டர்ன்ஸ்: லைப்சிக் அணிக்கு கிடைத்த தண்டனை!

இங்கிலாந்து நாட்டு பிரீமியர் லீகின் நடப்பு சாம்பியனான லிவர்பூல் அணியும் ஜெர்மன் நாட்டைச் சேர்ந்த லைப்சிக் அணியும் சாம்பியன்ஸ் லீக் கால் இறுதிக்கு முந்தைய சுற்றில் மோதின. 2009ஆம் ஆண்டு தோற்றுவிக்கப்பட்ட லைப்சிக் அணி முதன் முறையாக லிவர்பூல் அணியை எதிர்கொள்கிறது. இரு அணிகளும் முற்றிலும் மாறுபட்ட சூழலிலிருந்து களம் கண்டனர்.

கடந்த நான்கு ஆட்டங்களில் வெற்றி பெற்று ஒரு வேகத்தோடு லைப்சிக் களமிறங்க மறுமுனையில் கடந்த மூன்று ஆட்டங்களில் தோல்வி அடைந்து லிவர்பூல் அணி சோகத்தோடு களமிறங்கியது. நடப்பு ஆண்டில் லிவர்பூல் அணி லீக் கோப்பை, எஃப்ஏ கோப்பை, பிரீமியர் லீக் என அனைத்து கோப்பைகளில் இருந்தும் வெளியேறியுள்ளது.


இந்த ஆண்டு சாம்பியன்ஸ் லீக் போட்டியில் மட்டும்தான் லிவர்பூல் அணிக்கு வாய்ப்பு உள்ளது. எனவே லைப்சிக் அணிக்கு எதிராக லிவர்பூல் அணி வென்றாக வேண்டும் என்ற எண்ணத்தில் களமிறங்கினார். மறுமுனையில் லைப்சிக் அணி, வெற்றி பெறுவதற்கு திணறி வரும் லிவர்பூல் அணியை வீழ்த்த வேண்டும் என்ற எண்ணத்தில் களமிறங்கினர்.

முதல் பாதி துவங்கியதிலிருந்து இரு அணிகளும் மாறி மாறி தாக்குதலில் ஈடுபட்டனர். ஆட்டத்தின் ஐந்தாவது நிமிடத்தில் லைப்சிக் அணியின் ஏன்ஜெலீனோ கொடுத்த கிராஸ்ஸை டானி ஒல்மோ தலையால் முட்டி பந்தை கோல் பக்கம் திருப்பினார். ஆனால் பந்து கோல் கம்பத்தின் மேல் பட்டு வெளியேறியது. ஆட்டத்தின் பதினைந்தாவது நிமிடத்தில் லிவர்பூல் அணியின் நட்சத்திர வீரர் சாலா அடித்த பந்தை லைப்சிக் அணியின் கோல்கீப்பர் குலாசி தட்டிவிட்டார்.

லிவர்பூல் அணி சார்பாக மானே, ஃபீர்மினோ ஆகியோர் தங்களுக்கு கிடைத்த வாய்ப்பை நழுவ விட்டனர். மேலும் ஆட்டத்தின் 37ஆவது நிமிடத்தில் ஃபீர்மினோ அடித்த கோல் நிராகரிக்கப்பட்டது. ஏனென்றால் பந்தை அவருக்கு மானே பாஸ் செய்வதற்கு முன்னால் பந்து எல்லைக் கோட்டை விட்டு வெளியேறியதால் நிராகரிக்கப்பட்டது. லைப்சிக் அணி சார்பாக சபிட்சர் மற்றும் ஒல்மோ தங்களுக்கு கிடைத்த வாய்ப்பை நழுவ விட்டனர். இதனால் முதல் பாதி 0-0 என்ற கோல் கணக்கில் முடிவு பெற்றது.


இரண்டாம் பாதியின் துவக்கத்தில் இருந்து லைப்சிக் அணி ஆட்டத்தில் ஆதிக்கம் செலுத்தியது. லிவர்பூல் அணியின் தடுப்பு ஆட்டம் சிறப்பாக செயல்பட்டதால் லைப்சிக் அணியின் தாக்குதல்கள் கோலாக மாறவில்லை. ஆட்டத்தின் 53வது நிமிடத்தில் லைப்சிக் அணியின் கம்பல் கொடுத்த பாசை கோல்ஸ்டர்மன் கோட்டை விட, அதை லிவர்பூல் அணியின் சாலா சாதகமாக பயன்படுத்திக்கொண்டு லிவர்பூல் அணியை முன்னிலை பெறச் செய்தார்.

இரண்டாம் பாதியை சிறப்பாக துவங்கிய லைப்சிக் அணியில் தடுப்பு ஆட்டத்தில் நடந்த தவறின் காரணமாக ஒரு கோல் பின்னடைந்தனர். கண்ணிமைக்கும் நேரத்தில் லைப்சிக் அணியின் மற்றொரு தடுப்பு ஆட்டக்காரரான முக்கிலி பந்தை சரியாக கிளியர் செய்யாமல் வழுக்கி விழ அதை லிவர்பூல் அணியின் மானே சாதகமாக பயன்படுத்திக் கொண்டு லிவர்பூல் அணிக்கு இரண்டாவது கோலை பதிவு செய்தார். சிறப்பான ஆட்டத்தை வெளிப்படுத்தி வந்த லைப்சிக் அணியினர் செய்த 2 தவறுகளை லிவர்பூல் அணி கச்சிதமாக கோல் அடித்து தண்டித்தனர். ஏன்ஜெலீனோ மற்றும் ஒல்மோ லைப்சிக் அணியை எப்படியாவது மீட்டு விட வேண்டும் என்ற முனைப்போடு நடத்திய தாக்குதல்கள் அனைத்தும் வீணாய் செல்ல, லிவர்பூல் அணியிடம் 2-0 என்ற கோல் கணக்கில் தோல்வி அடைந்தனர்.

காலிறுதிக்கு முந்தைய சுற்று இரண்டு ஆட்டங்களாக நடைபெறும். முதல் ஆட்டத்தில் லிவர்பூல் அணி 2-0 என்ற கோல் கணக்கில் வென்றுள்ளது, இரண்டாம் ஆட்டத்தில் லிவர்பூல் அணி வெற்றி பெற்றாலோ அல்லது டிரா செய்தாலோ காலிறுதிப் போட்டிக்கு முன்னேறும். மறுமுனையில் லைப்சிக் குறைந்தபட்சம் 3-1 என்ற கோல் கணக்கில் வெற்றி பெற்றால் மட்டுமே அடுத்த சுற்றுக்கு முன்னேறுவார்கள். இவ்விரு அணிகளுக்கு இடையே நடைபெறும் இரண்டாம் ஆட்டம் வருகின்ற மார்ச் மாதம் 11- ஆம் தேதி நடைபெறும்.