தொடர்ச்சியாக 5வது வெற்றி: நான்காம் இடத்திற்கு முன்னேறியது செல்சீ

இங்கிலாந்து நாட்டில் நடைபெற்று வரும் பிரீமியர் லீக் போட்டியில் இன்று புள்ளிப் பட்டியலில் 6ஆம் இடத்தில் இருக்கும் செல்சீ அணியும், 17வது இடத்திலிருக்கும் நியூகாசில் அணியும் மோதின. இவ்விரண்டு அணிகள் மோதிய முதல் ஆட்டத்தில் செல்சீ அணி 2-0 என்ற கோல் கணக்கில் வெற்றி பெற்றது. செல்சீ அணிக்கு புதிய மேலாளர் நியமிக்கப்பட்டதிலிருந்து ஆடிய 5 ஆட்டங்களில் 4 வெற்றிகளை பதிவு செய்துள்ளது, மட்டுமல்லாமல் இன்னும் ஒரு தோல்வியும் பதிவு செய்யவில்லை என்பது குறிப்பிடத்தக்கது.

இந்த ஆட்டத்தை வெல்லும் பட்சத்தில் 4ஆம் இடத்தில் இருக்கும் வெஸ்ட் ஹாம் அணியை பின்னுக்குத்தள்ளி 4ஆம் இடத்தை பிடிக்கும். மறுமுனையில் நியூகாசில் அணி கடந்த 10 ஆட்டங்களில் ஏழு தோல்விகளை தழுவியுள்ளது, சென்ற வாரம் சௌதம்ப்டன் அணிக்கு எதிராக வெற்றியை பதிவு செய்திருந்தாலும் ஆட்டத்தில் சிறப்பாக எதுவும் தென்படவில்லை, முக்கியமாக அணியின் நட்சத்திர வீரரான வில்சன் காயம் காரணமாக இந்த ஆட்டத்தில் விளையாடாதது நியூகாசில் அணிக்கு பெரும் பின்னடைவாக அமைந்தது.

ஆட்டத்தின் முதல் நிமிடத்தில் இருந்து செல்சீ அணியினர் தாக்குதல் ஆட்டத்தில் ஈடுபட்டனர், ஆட்டம் துவங்கி முதல் பத்து நிமிடத்தில் அலோன்சோ மற்றும் அஸ்பிலிகுவேட்டா தலா ஒரு ஷாட் அடிக்க கோல் தவறியது. தொடர்ந்து தாக்குதல் நடத்திய செல்சீ அணிக்கு ஆட்டத்தின் 17 ஆவது நிமிடத்தில் ஆப்ரகாமை நியூகாசில் அணியின் லசெல்ஸ் தட்டிவிட செல்சீ அணியினர் பெனால்டி கேட்க அவர்களுக்கு அது நிராகரிக்கப்பட்டது, லசெல்ல தட்டி விட்டதில் ஆப்ரகாம் காயமடைந்தார், இதனால் அவருக்கு மாற்றாக ஜிரூட் களமிறக்கப்பட்டார், அவர் களமிறங்கி செல்சீ அணிக்கு ஆட்டத்தின் 39வது நிமிடத்தில் கோல் அடித்து முன்னிலை பெறச் செய்தார்.

தொடர்ந்து தாக்குதல் ஆட்டத்தில் ஈடுபட்ட செல்சீ அணிக்கு அணியின் முன்கள வீரரான வெர்னர் இரண்டாவது கோல் அடித்து முன்னிலையை இரண்டு கோலாக நீடித்தார். இந்த கோல் 14 லீக் ஆட்டங்களுக்கு பின் வெர்னர் பதிவு செய்யும் முதல் கோல் என்பது குறிப்பிடத்தக்கது. முதல் பாதியில் முற்றிலும் ஆதிக்கம் செய்த செல்சீ அணி 2-0 என்ற கோல் கணக்கில் முன்னிலையுடன் முதல் பாதியை முடித்தது.

பெங்களூரு அணி அபார வெற்றி: 3வது தோல்வியை பதிவு செய்த மும்பை அணி!

இரண்டாம் பாதியில் நியூகாசில் அணி சற்று தாக்குதல் ஆட்டத்தில் ஈடுபட தொடங்கினர், அதேசமயம் மறுமுனையில் செல்சீ அணி நிதானமாக ஆடி வந்தனர், இரண்டாம் பாதியில் இரு அணிகளும் பெரிய அளவில் வாய்ப்புகளை ஏற்படுத்தவில்லை. முதல் பாதியிலேயே 2 கோல் முன்னிலை பெற்ற செல்சீ அணி இரண்டாம் பாதியில் சற்று நிதானம் காட்டியது.

நியூகாசில் அணியின் சார்பாக நடுகள வீரரான ஷெல்வி இரண்டு முறை செல்சீ அணியின் கோல் கீப்பர் கெப்பாவை சோதிதார், தற்காலிகமாக நியூகாசில் அணியில் இணைந்து இருக்கும் ஜோ வில்லக் தலையால் முட்டி நியூகாசில் அணிக்கு முதல் கோலை பதிவு செய்ய முற்பட்டார் ஆனால் அதை செல்சீ அணியின் கோல் கீப்பர் கெப்பா பாய்ந்து தட்டிவிட்டார். செல்சீ அணியின் சார்பாக பெரிய அளவில் யாரும் வாய்ப்புகளை ஏற்படுத்தவில்லை, ஆட்டத்தின் 80-வது நிமிடத்தில் ஜேம்ஸ் ராக்கெட் வேகத்தில் கோலை நோக்கி அடித்த பந்தை நியூகாசில் அணியின் டார்லோ தனது கால்களை வைத்து தட்டிவிடார். இறுதியில் செல்சீ அணி 2-0 என்ற கோல் கணக்கில் வெற்றி பெற்றது.

இந்த வெற்றியின் மூலம் செல்சீ அணி லிவர்பூல் மற்றும் வெஸ்ட் ஹாம் அணியை பின்னுக்கு தள்ளி நான்காம் இடத்திற்கு முன்னேறியது. மறுமுனையில் நியூகாசில் அணி புள்ளிப் பட்டியலில் 17வது இடத்தில் தவித்து வருகிறது.