பிரீமியர் லீக் கால்பந்து போட்டி: பட்டம் வென்று சாதனை படைத்தது லிவர்பூல் அணி!

அரையிறுதி, இறுதிப் போட்டி என பல்வேறு சுற்றுகள் நடத்தப்படாமல் புள்ளிகள் அடிப்படையில் வெற்றியைத் தீர்மானிக்கும் வகையில் பிரீமியர் லீக் கால்பந்து போட்டி நடைபெற்று வருகிறது. 2019-2020 சீசனில் நடைபெற்று வரும் இத்தொடரில் லிவர்பூல் மற்றும் நடப்புச் சாம்பியனான மான்செஸ்டார் அணிக்கு இடையில் கடுமையான போட்டி நிலவி வந்தது. நேற்று நடந்த ஆட்டத்தில் லிவர்பூல் அணி கிரிஸ்டல் பேலஸ் அணியை 4-0 என்கிற கோல் கணக்கில் வெற்றி கொண்டது. நேற்று நடைபெற்ற மற்றொரு ஆட்டத்தில் மான்செஸ்டர் சிட்டி அணி செல்சி அணியிடம் 2-1 என்கிற கோல் கணக்கில் தோல்வியைத் தழுவியது. ஏற்கனவே, லிவர்பூல் அணியை விட மான்செஸ்டர் அணி புள்ளிப் பட்டியலில் பின்தங்கி இரண்டாம் இடத்திலிருந்தது. நேற்று நடைபெற்ற போட்டியில் மான்செஸ்டார் அணி தோல்வியடைந்ததால் லிவர்பூல் அணியை விட 23 புள்ளிகள் பின்தங்கி உள்ளது.

லிவர்பூல் அணி 31 ஆட்டங்களில் விளையாடி 86 புள்ளிகளைப் பெற்றுள்ளது. இன்னும் 7 போட்டிகள் எஞ்சியுள்ளது. இரண்டாம் இடத்தில் உள்ள மான்செஸ்டார் அணி 7 போட்டிகளிலும் முழுமையான வெற்றி பெற்றாலும் 84 புள்ளிகள் மட்டுமே பெற முடியும். இதனால், லிவர்பூல் அணி ரசிகர்கள் வெற்றிக் கொண்டாட்டத்தில் ஈடுபட்டு வருகின்றனர். இங்கிலாந்தில் உள்ள லிவர்பூல் நகரம் சிவப்பு வண்ணத்தில் ஜொலித்து வருகிறது. ஏற்கனவே இவ்வணி, கடந்தாண்டு நடைபெற்ற ஐரோப்பா சாம்பியன்ஸ் லீக் தொடரில் சாம்பியன் பட்டம் வென்றிருந்தது குறிப்பிடத்தக்கது.

வெற்றி குறித்து ட்விட்டர் பக்கத்தில் லிவர்பூல் அணி மகிழ்ச்சி செய்தி ஒன்றைப் பகிர்ந்துள்ளது. ‘நாம் இப்போது பிரீமியர் லீக் சாம்பியன். இது மிகமுக்கிய தருணம். இதை, நாம் வீட்டிலிருந்தபடியே உற்சாகத்துடன் கொண்டாடுவோம். தேவைப்பட்டால் பக்கது வீட்டினருடன் பாதுகாப்பாக வெற்றியை கொண்டாடுங்கள். இந்த வரலாற்றுச் சிறப்புமிக்க தருணத்தை இணைந்து கொண்டாடுவோம்’ என்று குறிப்பிட்டுள்ளது.

லிவர்பூல் அணியின் கேப்டன் ஜோர்டன் கென்டர்சன் வெற்றி குறித்துப் பேசியபோது ‘நாங்கள் நம்பினோம். அதேபோல், வென்றுவிட்டோம். இது எங்களுக்கு மறக்க முடியாத நிகழ்வு. இதோடு நாங்கள் நின்று விடப்போவதில்லை. வருங்காலத்தில் வெற்றிகளைக் குவிப்போம்’ என்று தெரிவித்துள்ளார். இங்கிலிஸ் பிரிமியர் லீக் கால்பந்து தொடரில் இரண்டாம் இடத்தில் உள்ள மான்செஸ்டர் அணி தனது ட்விட்டர் பக்கத்தில் லிவர்பூல் அணிக்கு வாழ்த்துக்கள் தெரிவித்துள்ளது.