கொரோனாவால் முன்னாள் ஆப்ரிக்க கால்பந்து வீரர் முகமது பராக் மரணம்!

முன்னாள் ஆப்ரிக்க கால்பந்து வீரரான முகமது பராக் (59 வயது), கொரோனாவால் பாதிக்கப்பட்டது கடந்த வாரம் உறுதி செய்யப்பட்டது. இதையடுத்து வடமேற்கு லண்டனில் உள்ள மருத்துவமனையில் அனுமதிக்கப்பட்டார். இந்நிலையில் இவர் சிகிச்சை பலன் இன்றி உயிரிழந்ததாக ஆப்ரிக்க கால்பந்து மற்றும் சோமாலியா கால்பந்து கூட்டமைப்பு உறுதி செய்துள்ளது.

ஆலோசகர்
உயிரிழக்கும் முன்பு வரை சோமாலியாவின் இளைஞர்கள் நலம் மற்றும் விளையாட்டு அமைச்சரின் ஆலோசகராக பராக் இருந்தார். சோமாலியாவின் தலைநகரான மொகதீசுவில் இருந்து சுமார் 342 கி.மீ., தூரத்தில் உள்ள பெலத்வேனியில் கடந்த 1961, பிப்ரவரி 15ஆம் தேதி பராக் பிறந்தார்.

கடந்த 1976 இல் பள்ளிகள் அளவிலான கால்பந்து தொடரில் பங்கேற்றார் பராக். தொடர்ந்து 1979 இல் அடுத்தகட்டதுக்கு முன்னேறினார் பராக். இதில் தனது திறமைகளை சிறப்பாக வெளிப்படுத்திய பராக், பட்ரூல்கா கால்பந்து கிளப் அணிக்காக தேர்வு செய்யப்பட்டார். அதில் 1980 வரை பராக் விளையாடினார்.

இந்நிலையில் கொரோனாவின் கொடூர ருத்ரதாண்டவத்துக்கு பலியான முதல் ஆப்ரிக்க கால்பந்து வீரரானார் பராக். உலகம் முழுதும் கொரோனாவின் தாக்கத்துக்கு 20,000க்கும் மேற்பட்டோர் பலியாகியுள்ளனர்.