ஜூலை 24ஆம் தேதி முதல் டோக்யோவில் ஒலிம்பிக் போட்டி நடத்த ஏற்பாடுகள் நடைபெற்று வருகின்றன. சீனாவில் தொடங்கி கிழக்கு நாடுகள் வரை கொரோனா வைரஸ் தொற்று தீவிரமடைந்துள்ளதால் ஒலிம்பிக் போட்டியை தள்ளிவைக்கும்படி கடந்த சில நாட்களாக கோரிக்கைகளும், எதிர்ப்புகளும் எழுந்துள்ளன. பல நாடுகளை சேர்ந்த ஒலிம்பிக் குழுக்களும் போட்டியை தள்ளிவைக்கும்படி கோரிக்கை விடுத்துள்ளன.
கொரோனா வைரஸ் தொற்றால் உலகம் முழுவதும் 13,000க்கும் மேற்பட்டோர் உயிரிழந்துள்ளனர். இதை கவனத்தில் கொண்டு, ஒலிம்பிக் போட்டியை ஓராண்டுக்கு தள்ளிவைக்க வேண்டுமெனவும், அதற்கு தேவையான முழு ஆதரவையும் வழங்கி மறு அட்டவணைக்கு ஏற்ப போட்டியை நடத்த உதவுவோம் என்று சர்வதேச ஒலிம்பிக் குழுவிடமும், சர்வதேச பாராலிம்பிக் குழுவிடமும், உலக சுகாதார மையத்திடமும் கனடா ஒலிம்பிக் குழுவும், கனடா பாராலிம்பிக் குழுவும் கோரிக்கை விடுத்துள்ளன.
இதுகுறித்து இரு குழுக்களும் வெளியிட்டுள்ள அறிக்கையில், “ஒலிம்பிக் போட்டியை தள்ளிவைப்பதால் எழும் சிக்கல்கள் குறித்து நாங்கள் அறிவோம். ஆனால், விளையாட்டு வீரர்கள் மற்றும் உலக சமூகத்தின் சுகாதாரத்தையும், பாதுகாப்பையும் விட வேறு எதுவும் முக்கியமில்லை” என்று தெரிவிக்கப்பட்டுள்ளது.
ஒலிம்பிக் போட்டியை தள்ளிவைப்பது குறித்து தீர்வு காண ஆலோசனை நடத்தப்படும், ஆனால் போட்டியை ரத்து செய்வதால் யாருடைய பிரச்சினையும் தீராது, யாருக்கும் உதவாது என்று சர்வதேச ஒலிம்பிக் குழு தெரிவித்துள்ளது. ஏற்கெனவே விளையாட்டு வீரர்களின் நலன் கருதி ஒலிம்பிக் போட்டியை தள்ளிவைக்க வேண்டும் என்று விமர்சனங்கள் எழுந்துள்ள நிலையில், போட்டியிலிருந்து கனடா விலகுவதாக அறிவிக்கப்பட்டுள்ளது சர்வதேச ஒலிம்பிக் குழுவுக்கு அழுத்தத்தை அதிகரிக்கும்.
இதற்கு முன்பு ஒலிம்பிக் போட்டி எப்போதுமே தள்ளிவைக்கப்பட்டதுமில்லை, ரத்து செய்யப்பட்டதுமில்லை. ஆனால் இப்போது போட்டியை தள்ளிவைப்பது குறித்து பரிசீலிக்கப்படும் என்று சர்வதேச ஒலிம்பிக் குழு தெரிவித்திருப்பது முக்கிய பங்குதாரர்களுக்கு நம்பிக்கையளிக்கும் வகையில் உள்ளது.
Mobile AppDownload Get Updated News