ஆஸ்திரேலிய ஓபன் டென்னிஸ்: த்ரில் வெற்றியால் தப்பிய பெடரர்... வெளியேறிய பயஸ்!

ஆஸ்திரேலியாவின் மெல்போர்ன் நகரில் ஆண்டின் முதல் கிராண்ட்ஸ்லாம் டென்னிஸ் தொடரான ஆஸ்திரேலிய ஓபன் டென்னிஸ் தொடர் நடக்கிறது. இதில் ஆண்கள் ஒற்றையர் பிரிவு காலிறுதியில் சுவிட்சர்லாந்தின் ரோஜர் பெடரர், அமெரிக்காவின் டெனிஸ் சாண்ட்கிரெனை எதிர்கொண்டார்.

இதன் முதல் செட்டை பெடரர் 6-3 என எளிதாக தன்வசப்படுத்தினார். இதற்கு அடுத்த இரண்டு செட்களையும் 6-2, 6-2 என மிகச்சுலபமாக கைப்பற்றி டெனிஸ் பதிலடி கொடுத்தார். பின் எழுச்சி பெற்ற பெடரர், நான்காவது செட்டை 7-6 என வென்றார். வெற்றியாளரை தீர்மானிக்கும் ஐந்தாவது செட்டில் அசத்திய பெடரர் 6-3 என தனதாக்கினார்.

இறுதியில், சுவிட்சர்லாந்தின் ரோஜர் பெடரர், அமெரிக்காவின் டெனிஸ் சாண்ட்கிரெனை 6-3, 2-6, 2-6, 7-6, 6-3 என வெற்றி பெற்று அரையிறுதிக்கு தகுதி பெற்றார்.


அரையிறுதியில் ஆஸ்லே பார்டி
இதே போல பெண்கள் ஒற்றையர் பிரிவு காலிறுதியில், ஆஸ்திரேலியாவின் ஆஸ்லே பார்டி, செக் குடியரசின் பெட்ரா கிவிட்டோவாவை 7-6, 6-2 என்ற செட்களில் வீழ்த்தி அரையிறுதிக்கு முன்னேறினார். மற்றொரு பெண்கள் ஒற்றையர் பிரிவு காலிறுதியில், அமெரிக்காவின் சோபியா ஜெனின், துனிசியாவின் ஒன்ஸ் ஜாபியரை 6-4, 6-4 என்ற செட்களில் வீழ்த்தி அரையிறுதிக்கு தகுதி பெற்றார்.


பயஸ் சொதப்பல்
இதேபோல ஒயில்டு கார்டு முறையில் கலப்பு இரட்டையர் பிரிவில் பங்கேற்ற இந்தியாவின் லியாண்டர் பயஸ், லாட்வியாவின் ஜெலினா ஒஸ்டாபென்கோவுடன் இணைந்து விளையாடினார். இதன் இரண்டாவது சுற்றில் இங்கிலாந்தின் ஜெமி முர்ரே, அமெரிக்காவின் பெதானி மடேக் சாண்ட்ஸ் ஜோடியை எதிர்கொண்டது. இதில் ஆரம்பம் முதல் பயஸ் ஜோடி சொதப்பலான ஆட்டத்தை வெளிப்படுத்தியது. இதன் முதல் செட்டை 2-6 என இழந்த பயஸ் ஜோடி, இரண்டாவது செட்டை 5-7 என பறிகொடுத்தது. முடிவில், இந்தியாவின் லியாண்டர் பயஸ், லாட்வியாவின் ஜெலினா ஒஸ்டாபென்கோ ஜோடி, இங்கிலாந்தின் ஜெமி முர்ரே, அமெரிக்காவின் பெதானி மடேக் சாண்ட்ஸ் ஜோடியிடம் 2-6, 5-7 என்ற செட்களில் தோல்வியடைந்து வெளியேறியது.