போராடி தோற்ற சென்னையின் எப்.சி : கோவா திரில் வெற்றி!

இந்தியாவில் ஐபிஎல் பாணியில் உள்ளூர் கால்பந்து தொடரான இந்தியன் சூப்பர் லீக் (ஐஎஸ்எல்) கால்பந்து தொடர் நடக்கிறது. இதன் ஆறாவது தொடர் தற்போது நாட்டின் பல்வேறு பகுதிகளில் நடக்கிறது. இதில் நேற்று சென்னையில் நடந்த லீக் போட்டியில் சென்னையின் எப்சி அணி, கோவா எப்சி அணியை எதிர்கொண்டது.

தவறவிட்ட சென்னை
இதில் போட்டியின் துவக்கத்திலேயே (17ஆவது நிமிடம்) கோல் அடிக்க கிடைத்த வாய்ப்பை சென்னை அணி வீரர்கள் வீணடித்தனர். ஆனால் அசத்திய கோவா அணிக்கு 26ஆவது நிமிடத்தில் கிடைத்த வாய்ப்பை அசத்தலான கோலாக மாற்றினார் அஹமது. தொடர்ந்து 41ஆவது நிமிடத்தில் கிடைத்த மற்றொரு வாய்ப்பை பிராண்டன் இரண்டாவது கோல் அடித்தார். முதல் பாதியின் கூடுதல் நேரத்தில் (45+1) கோவா வீரர் கூகோ பாவுமஸ் மூன்றாவது கோல் அடிக்க, முதல் பாதியின் முடிவில் கோவா அணி 3–0 என வலுவான முன்னிலை பெற்றது.


திடீர் எழுச்சி
தொடர்ந்து பரபரப்பாக துவங்கிய இரண்டாவது பாதியில் சென்னை அணி வீரர்கள் எழுச்சிகண்டனர். போட்டியின் 57ஆவது நிமிடத்தில் ஆண்டிரே ஸ்கீம்ரி ஒரு கோல் அடித்தார். அடுத்த இரண்டாவது நிமிடத்தில் ரபெல் கிரிவெல்லாரோ (59ஆவது நிமிடம்) மேலும் ஒரு கோல் அடித்தார்.


இதற்கு கோவா வீரர் பெரன் கோராமினாஸ் 63ஆவது நிமிடத்தில் பதிலடி கொடுத்தார். தொடர்ந்து கூடுதல் நேரத்தில் (90+1) ரபெல் கிரிவெல்லாரோ சென்னை அணிக்கு மேலும் ஒரு கோல் அடித்தார். இறுதியில் சென்னை அணி 3–4 என்ற கோல் கணக்கில் தோல்வியடைந்தது.

கோவா நம்பர்-1
ஐஎஸ்எல் தொடரில் சென்னை அணி இதுவரை பங்கேற்ற 9 போட்டியில் 2 வெற்றி, 4 தோல்வி, 3 டிரா என 9 புள்ளிகள் பெற்றுள்ளது. புள்ளிப்பட்டியலி சென்னை அணி தொடர்ந்து 8ஆவது இடத்தில் நீடிக்கிறது. கோவா அணி பங்கேற்ற 10 போட்டியில் 6 வெற்றி, 1 தோல்வி, 3 டிரா என 21 புள்ளிகள் பெற்று முதலிடத்துக்கு முன்னேறியது.