தயான் சந்துக்கு மரியாதை செலுத்திய கிரண் ரிஜிஜூ: ‘ஃபிட் இந்தியா’ இயக்கத்தில் சேர அழைப்பு!

கடந்த 1905ல் உத்தரபிரதேசத்தின் அலஹாபாத்தில் பிறந்தவர் முன்னாள் இந்திய ஹாக்கி விளையாட்டு வீரர் தயான் சந்த். தனது 17வது வயதில் இந்திய போர்ப்படையில் சேர்ந்தார்.

400 கோல்கள்
கடந்த 1926 முதல் 1948 வரையிலான 22 ஆண்டுகால சர்வதேச ஹாக்கி பயணத்தில் 400க்கு மேற்பட்ட கோல்கள் அடித்து அசத்தியுள்ளார் தயான் சந்த். சந்திரனைப்போல பிரகாசம் கொண்டவர் என்பதால் மக்கள் இவருக்கு ‘சந்த்’ என பாசமாக அழைத்தனர். தவிர, இவருக்கு மந்திரவாதி என்றும் மக்கள் அழைத்தனர்.

ஒலிம்பிக் பதக்கம்
இவர் தனது மாயாஜால ஹாக்கி வித்தையால் உலகளவில் இந்தியாவுக்கு பெருமை சேர்த்தவர். இவர் கடந்த 1928, 1932, 1936ல் தங்கம் வென்ற இந்திய ஹாக்கி அணியில் இடம் பெற்றவர். இவருக்கு கடந்த 1956ல் பத்ம பூஷன் விருது வழங்கப்பட்டது.


மறுத்த தயான் சந்த்
கடந்த 1936ல் பெர்லினில் நடந்த ஒலிம்பிக்கில் இவரின் ஆட்டம், ஹிட்லரை மிகவும் ஈர்க்க, இவருக்கு ஜெர்மனி ராணுவத்தில் வேலையும் ஜெர்மனி குடியுரிமையும் வழங்க முன்வந்தார். ஆனால் அதை தயான் சந்த் மறுத்துவிட்டார்.


தேசிய விளையாட்டு தினம்
இந்த ஹாக்கி ஜாம்பவானின் பிறந்ததினம் ஆண்டுதோறும் தேசிய விளையாட்டு தினமாக கொண்டாடப்படுகிறது. இவரின் பிறந்தநாளில் விளையாட்டுத்துறை அமைச்சர் கிரண் ரிஜிஜூ, தயான் சந்துக்கு மரியாதை செலுத்தியுள்ளார்.


இதுகுறித்து கிரண் ரிஜிஜூ கூறுகையில், ‘தயான் சந்த் பிறந்தநாளான இன்று தேசிய விளையாட்டு தினத்தை அனைவரும் கொண்டாடுகிறோன். சர்வதேச அளவில் இந்தியாவை பெருமை அடையச்செய்த முதல் இந்தியர் அவர் தான். ‘ஃபிட் இந்தியா' இயக்கத்தில் சேரும்படிஅனைவரையும் கேட்டுக்கொள்கிறேன். தயான் சந்த் பிறந்ததினத்தில் இத்திட்டம் துவங்கப்படுவதன் மூலம் அவருக்கு மரியாதை செலுத்துவது பெருமையாக உள்ளது.’ என்றார்.