சானியாவின் ஆண் குழந்தைக்கு பெயர் இஜான் மிர்சா மாலிக்

இந்திய டென்னிஸ் வீராங்கனை சானியா மிர்சா தனது ஆண் குழந்தைக்கு இஜான் என பெயரிடப்பட்டுள்ளார்.

ஹைதராபாத்தை சேர்ந்த டென்னிஸ் வீராங்கனை சானியா மிர்சா, பாகிஸ்தான் கிரிக்கெட் வீரர் சோயிப் மாலிக்கை காதலித்து 2010ஆம் ஆண்டு திருமணம் செய்துகொண்டார்.

கடந்த ஆண்டு அக்டோபருக்குப் பின் போட்டிகளில் பங்கேற்காமல் இருந்த சானியா இந்த ஆண்டு ஏப்ரலில் தான் கர்ப்பமாக இருப்பதாகக் கூறினார். பிரசவத்திற்காக ஹைதராபாத் தனியார் அனுமதிக்கப்பட்ட அவருக்கு செவ்வாய்க்கிழமை அதிகாலை ஆண் குழந்தை பிறந்தது.

இது குறித்து ட்விட்டரில் பதிவிட்ட சானியாவின் கணவர் மாலிக், “இதை பரவசத்துடன் அறிவிக்கிறேன். எங்களுக்கு ஆண் குழந்தை பிறந்திருக்கிறது. குழந்தையும், என் சானியாவும் நன்றாக இருக்கிறார்கள். உங்கள் எல்லோரின் வாழ்த்துக்கும், பிரார்த்தனைக்கும் நன்றி” எனக் கூறியிருக்கிறார்.

குழந்தைக்கு இஜான் மிர்சா மாலிக் என பெயர் சூட்டியுள்ளனர். இஜான் என்றால் அரபு மொழியில் ‘கடவுளின் பரிசு’ என்று பொருள். ‘மிர்சா மாலிக்’ என்பது குடும்பப் பெயர்.